Atos 9:18-31

¹⁸Atsoko Sauro hyriziktsa piknu piakyridi tsa watsa inatsunaha. Iwatatu ebyk waha botu zoezo iktsazo niy. Zizororowy. Niytahi kyik niy. Sesus humo tispirikporẽta iwaze Ananias ity ziharasusuhik.

¹⁹Tadisahakazoze tsipaikrẽta niyzikzo.

²⁰Sauro Damasko eze Sesus tuktsa tuk niapykyrykspyk. Iwaze ziakbata Sesus soho nitsasoko. Sesus soho Deus wahoro eze nitsasoko. Atahi: — Sesus Deus tse — nikara.

²¹Ziwabykynahatsa sipybyrẽtsa nikaranaha. Asahi nipamykysokonaha: — Atahi ja Serusarẽhe eze tuze Sesus tuktsa nisioktyhyryk. Atahi Damasko bo niukuru iwatahi Sesus tuktsa mysioktyhyryk ja. Bykyze ziknapamykysokonahatsitsa bo mysioktyhyryk. Ata hiba — nikaranaha.

²²Sauro Sesus soho nitsasoko. Iharere humo kytsa sizubarẽtsa Sesus humo sispirikporẽtsa. Atahi: — Sesus Deus zipehata babata — nikara. Tsihyrinymyrẽta kytsa iharere bo yhỹ nikaranaha. Nisihyrinymyrykyze wasani nikaranaha. Iwatsahi Sudeutsa batu sihyrinymyry iwatsahi hawa sa ibo mopamykysokonaha batu zikaha. Paikpa mytsaty nikaranaha.

²³Bykyze Sudeutsa inazuzuknahaze nipamykysokonaha: — Hawa sa Sauro tabezehik — nikaranaha.

²⁴Sauro siharere ziwaby tahi hawa pikbeze tsihikiknaha anahi ziwaby. Zikzibyituhukutu Damasko hudikhudikwy hokbowy baze ziperykynaha. Okoroze unata kino niwatihi nizokparakanaha. Iwatsahi Sudeutsa pokso Sauro tuktsa zioktyhyryknaha.

²⁵Unata zioktyhyryknaha. Tsoromapeza sihezõnikita eze tu zikorokyryknaha. Sauro tsoromapeza sihezõnikita eze inazipiknaha. Iwaze inazipiknahaze niparakik. Iwaze Sauro Damasko hudikhudikwy ekze niwakik.

²⁶Kyze Sauro Serusarẽhe bo ziksizo. Sesus tuktsa tuk tasapy tsihikik. Sauro Sesus tukta niyzik iwatsahi simytsatyharẽtsa nikaranaha, ipokso sipybyrẽtsa.

²⁷Baranabe hi zitsumuẽhĩkĩ. Sakzohotsa bo zioktyhyryk. Iwatsahi sibo itsyhyryze nipamykysoko: — Sauro mypehakatsa ziny. Damasko bo niukuruze mypehakatsa ziny. Mypehakatsa ibo nipamykysoko itukta niyzik. Iwatahi Damasko eze tuze Sesus soho ty nipamykysokoze batu ipyby — nikara. Iwatsahi Sesus tuktsa Sauro humo batu sipyby.

²⁸Iwaze Sauro situk inapykyk. Serusarẽhe eze tu situk zikzuruku. Sesus soho ty ziknapamykysoko.

²⁹Sudeutsa Kereka harere zinymyrykynahatsitsa bo ziknapamykysoko. Asahi ibo nahapepehakanaha. Sisakparẽtsa nikaranaha. Zibeze tsihikiknaha.

³⁰Sesus tuktsa anahi ziwabykynahaze Sauro Sesareja bo zioktyhyryknaha: — O ikia Taraso bokta! Tsikpuruk naha botu tsiksizokta — nikaranaha.

³¹Iwaze kytsa Sesus tuktsa nanabyitaba zisapywykynaha. Sudeja eze Karireja eze Samarija eze iwaha eze zisapywykynaha. Sesus tuktsa niobaranaha sizubarẽtsa niyziknaha. Deus hyrikoso humo niobaranaha. Deus hyrikoso nisitsumuẽhĩkĩ iwatsahi Sesus humo sispirikporẽtsa.