Atos 7:3-49

³Deua vara bini'a'aha: “Abraão, ai vihi'a avaibavinia. Va'ora nahojaha'a bana adani kadabi'i kaija'ari. Avikha'a bana arabo hoariha ira onanokiahivini hiki kaimonia.” Niha ada Deus.

⁴Oniaroa, ai vihi'aha adani Abraão Caldéia ibavi onikia. Avikha'aha, ibavi Harã onikia vakaikahi'aha, vahoja'aha. Vahojana oadani abini'aha ada Abraão kaabi'i. Abinina naothinia ai vihi'ianaha adani Abraão. Deus va'ora kaboa'iha hihida arabo avahojakia vikha'ina.

⁵Asia Estêvão vara va'ora ni'a'aha adani kidija'ari vanava'isohiva abono: —Deus ni-va'ora no'ajoraki araboa. Ni-pa'itxia Abraão-ra no'a'iaki. Bini'aha ada Abraão: “Ira ono'aki bana i hihida araboa kadaimoni, kadaisai kahanodi vavijavaronisiagaki vakadimoni.” Niha ada Deus. Isana bikahivini kaba'i, ni-isa'iaki kaho ada Abraão.

⁶Deua bivava'isohihijoraki ida namithaki kaimoni. “Abraão, arabo hoariha avikhaki bana adani kadaisai kahanodi vavijavaronisiagaki. Vakadiani hirihi ida arabo hoariha vavahojaki bana. 400 badara ipohini vahojana oadani arabo hoariha kaija'arini va'ora vanajaharihariki bana adani kadaija'ari. Honai abono vagathaki kaimoni adani kadahanodi vavijavaronisiagaki.” Nimania ida Deus athi Estêvão va'ora ni'avini hiki.

⁷Estêvãoa vara bivani'a'ianahi ida Deus athi: —“400 badara ipohini radahani naothinia va'ora onaima'banaki bana adani arabo hoariha kaija'arini kadaija'ari-ra va'ora vanajahariharibakhia'iki. Naothinia ai vihi'iki bana adani kadahanodi vavijavaronisiagaki. Hihida araboa vikhaki bana adani, hora vakanamasiviki bana adani.” Niha ada Deus.

⁸Asia kidija'ari vavaka'da'diva-ra vara va'ora ni'aha ada Estêvão: —Oniaroa, Deua bihonariaha ada Abraão kohana: “Va'ora bana karajomi adani makhira isani hahavi bana. 8 mahi-ra vahoja'aha ada isai, a'boa'ihi ida asafi pa'itxi rajomi kaimoni. Vavahojaki ida siikosida karajomihi kodija'ari vihira kaimoni.” Nimania ida Deus kava'iponahi a'bo'daki athini. Oniaroa, Abraão kohana bikarajomiha ada kidisai Isaque. Tanana kari 8 mahi-ra vahojavini vani bikarajomi'aha ada Isaque. Karaho'ina ada Isaque, bikarajomiha ada kidisai Jacó. Karaho'ina ada Jacó, va'ora karajomi'aha adani kidisai 12 vihiki vaipohina. Akadi'arahoda kohana avikhananavaki adani Jacó kaisai.

⁹Hari. Avakabai'aha ada vakadikajo'o José, pavakari vaniha'aha. Vakapavakariva avisa'aha Egito kaarabonia. Kidikariva bikapavakariki ada José. Honai abono gathaki hi'ina ada José kohana. Egitoa hojana oadani Deua biakodia'aha.

¹⁰José va'i rogo inibakhiani kaba'i Deua bikajoamora'aha, kidi'ogahaia bino'a'aha. Deua biakodiavini mani ida Egito kaaraboni kaka'da'dini José-ra vajahavini hija. Faraó oniki ada. Oniaroa, Faraó José-ra honaria'aha va'ora vaka'da'dira kaimoni adani Egito kaaraboni kaija'arini, vakadiarabo hiki. José va'ora vaka'da'diki jaboni adani Faraó gorana kaija'arini hahavi.

¹¹Hari. Oniaroa, Egito kaaraboni kaija'arinia vakainamo'ihi ida vakadi'bai, kiivi hiki, oniani ida va'ora naima'banaja. Badara ipohiki ni-movaki ida vakadirakhajahi. Canaã kaarabonia jaboni vakadirakhajahi ni-movaki. Ni-akadi'arahoda avikhananavakia vakaragajanaki ida vahaki kaimoni.

¹²Hari. Vakadiabi'i Jacóa bikamitha'ihi ida trigo varani hini Egito kaarabonia hojani, oniani ida kidisai-ra va'ora honariavini hija avikhana trigo-ra vakapavakarihavini. Sa'ai ko'bamihani vihiki adani Jacó kaisai Egitoa avikhabiininiki.

¹³Hari. Ihimi'ini ida trigo, Jacó avikhana va'ora honaria'ianaha. Vakaikahi'ianaha, José va'ora nanamitha'aha: “Avakadikajo'o mani ho.” Niha ada José. Faraóa bikamithahi ida José igamina vakaikahina varani hini.

¹⁴José va'ora kaboa'iha adani kidiabi'i Jacó, igamina vihiki afohahavi vikhana kidiania vahojara kaimoni Egito kaarabonia. 75 vihiki vaipohina adani Jacó kaija'ari kohana.

¹⁵Oniaroa, avikhaha adani Jacó, kidisai vaipohiki khama. Egito kaarabonia vahoja'aha. Badara îpohiki vahoja'aha. Na'arihavi vihi'ina adani Jacó, kidisai hahavi vihiki vaabini'aha afohanana.

¹⁶Vaabinihanana'aha vaba'ona-ra avisanana'aha vakadika'damahi ibavini Siquém oniki kania. Abraão kohana hokina kari bikapavakariki ida ja'di hodijama'oki vakadika'damahi ibavini kaimoni Emor kohana kahanodi vakadiania.

¹⁷Hari. Oniaroa, maakari'ihi ida badara Deus Abraão kohana-ra nava'iponijora'avini hiki namithaki kaimoni. Egito kaarabonia vahojana oadani vaabono avanaipohi'aha adani akadija'ari avikhananavaki kohana.

¹⁸Oniaroa, arabo kaka'da'dini hoariha va'ora vaka'da'di'aha adani Egito kaija'arini. Onina jaboni Faraó. Ni-biogaki ada José kohana varani hina. Abini'bo'da'iki ada José.

¹⁹Egito kaaraboni kaka'da'dini va'ora korijanahaha adani akadija'ari avikhananavaki. Va'ora vanajaharihari'aha, va'ora vahonariahiha adani isai vatanaki osahi vihina gora baninija vaabinira kaimoni.

²⁰Hari. 'Bana'aha ada Moisés. Jaha'oamanira ada isai. Masiko ahoarabakosiki hojaha kidiabi'i gorana bodinia ahojana.

²¹Nihanikia avanahojajanariha ada Moisés vagorana bodinia, vaini vadinia avisa'aha. Faraó kaisaia bikaraga'aha ada Moisés bavi bodinia, bikanaisaiha'aha, binavijava'aha.

²²Moisé-ra vaka'ojomo'i'aha adani Egito kaija'arini vakadi'ogahaia. Moiséa biogajahaki'ihi ida vakadi'ogahai, oniani ida Moisé-ra ka'da'di nihaja. Biogajahakiki ida ija'ari-ra nasohivini kavaranihi.

²³Asia Estêvão vara va'ora ni'aha: —Moisés kabadarana 40 hiki ipohini. Egito kaija'arini vakadiania hojana oadani va'ora navanavanaha'aha adani kidija'ari, hi'adani Israel kaija'ari, kidi'arahoda kohana kaija'ari vavijavaronisiagaki adani.

²⁴Moisés va'ora navanavanahavini, binokiha ada Egito kaija'arini kidija'ari hoarana najahariharina hina. Israel kaija'ari-ra akava'ijoa'aha. Kidija'ari ka'da'di-ra kanaabosivini, binaabini'aha ada Egito kaija'arini.

²⁵Moisés abono-ra ni'aha: “Kodija'aria avigaki ida Deus hora karonavini, va'ora oakava'ijoara kaimoni.” Abono-ra kava'ibodivaraniha ada Moisés. Ni-avigapa'itxiki ada Moisés Deua bikaronavini.

²⁶Ka'afokajomani va'ora noki'aha adani Israel kaija'ari vi'bamiki vaabono vakodakhamaki. Moisés va'ora honaria'aha vaabono avakakariakakhamavini. Va'ora ni'aha: “A'onivani avaigamini avi'bamiki a'oni. Nahina mani ida avaabononi avakakaihamahikhamavini hija?” Va'ora ni'aha ada Moisés.

²⁷Oniaroa, hoariha-ra dakia biarokojoho'aha ada Moisés, bini'aha: “Nahina vani ira honariaja haria ivaka'da'divini. Ni-anofiki ida haria inasohivini.

²⁸Hidanija inaabini'iki ada Egito kaaraboni kaija'arini. Hora inaabinimaniki koda i jaboni?”

²⁹Moiséa mitha bini'ahi ida kaabinina varani hini, ofini'aha, oga'aha. Egito kaarabonia ajihiha, arabo hoariha Midiã onikia okha'aha. Midiã hojana oadani kagamo'aha. Vaisa'aha vakadisai vi'bami'aha.

³⁰Hari. Oniaroa, radaha'ihi ida 40 badara ipohini. Oniaroa, adaha'aha ada Moisés amasia, arabo namahiki monte Sinai onikia maakarini. Deus ibavi kaija'arini abono-ra nanokia'iki Moisés kania. Ava patxaniki ha'diki kania binoki'aha.

³¹Bikava'ibodivarani'ihi, binavanavanaha'ihi. Binamaakarivini kaba'i, bikamithahi ida Deus athi:

³²“Hovani avakadi'arahoda avikhananavaki vakadiDeus ho, Abraão, Isaque, Jacó vakadiDeus ho.” Niha ada Deus. Thararara'aha ada Moisés, imahida'ina, nokho-ra aka'oaha'aha, binokijanarara kaimoni.

³³Deua bini'aha ada Moisés: “Hihida ibavia ohojaki ho. Ojahaka'oaki ho, oniani ida kadasandália-ra ikaanivini-ra ohonariavini hija.

³⁴Egito kaarabonia va'ora onokihaha'oadahaki adani kodija'ari vajaharihari'ina. Vaimana 'banani va'ora nabarariahavini okamitha'iki jaboni, oniani ida hora rakhaja va'ora oakava'ijoahavini va'ora onofivini, oniani ida Egito kaarabonia iajoini-ra ohonariavini hija.” Moisé-ra ni'aha ada Deus.

³⁵Asia Estêvão vara va'ora ni'aha adani kidija'ari vavaka'da'diva. —Egito kaarabonia Moisés hojana kari kidija'ari Moisé-ra vakajoni'aha, vani'aha: “Nahina vani ira honariaja haria ivaka'da'divini? Ni-anofiki ida haria inasohivini.” Vakhaniha. Deus vania bikarona'aha vakadiania va'ora akava'ijoaki kaimoni, vakadika'da'di hira kaimoni. Deus ibavi kaija'arinia biakodiaki ada Moisés, hi'ada ava ha'diki kania nokia'iki.

³⁶Egito kaarabonia hojana kari, vikhaonanina viahania Moiséa bada bini'a'iki ida Deus kabadani danoki, ija'ari-ra nava'ibodivaranikarahoki. Naothinia paha kajokiraki ibavi, mar Nadaraki onikia vikafianina bada bini'a'ianahi ida badani danoki. 40 badara ipohini amasia vahojana oadani, bada bini'a'ianahi ida kidibadani danoki.

³⁷Moisés vani va'ora nava'isohijoraha adani kidija'ari: “Akadija'ari vahararana Deua binagathogathoki bana ada athi namoniva abono hoariha. Hofori hiki bana ada.” Va'ora ni'aha ada Moisés.

³⁸Moisés hoja'iki kidija'ari vajoroni'iki vakadiania amasia. Moisés vani-ra vara ni'a'aha ada Deus ibavi kaija'arini monte Sinaia nokia'ina. Moiséa bikamitha'ihi ida Deus athi, haria nava'isohivini hi'ihi.

³⁹Akadi'arahoda avikhananavakia vanaabarihi ida Moisés athi. Vakapoariravini ida athi, vanofiki ida avajoi'ina Egitoa.

⁴⁰Vani'aha ada Moisés ka'aajo Arão oniki: “Inamonaha'a bana ida deus amovana avaadahaki kaimoni, haria avanamithahaki kaimoni hagihia. Arabo namahikia ogaimori'aha ada Moisés, ni-aogajanaki hana hojana. Egito kaarabonia arihojana kari haria banani'iki ada. Ogaimori'ina avisoni'iki ada.” Vani'aha ada Moisés ka'aajo.

⁴¹Oniaroa, vanamonahahi ida deus amovana 'daama kahidari dorona nokiana fori hiki. Avanaha'dihi ida igitha abononi, deus amovana-ra vakavaihinikavini kaimoni. Khai vani'ahi ida vakadiamonahi.

⁴²Deu-ra naihamahiki amovana vanamonahavini, oniani ida akadija'ari avikhananavaki-ra va'ora nahojahavini hi'ia. Va'ora arakhavini mani ida safini, masiko, boviri hiki-ra vakanamasivivini hija, vakadideus ipohina hira kaimoni. Deus athi namoniva abono kohana vakadipapira hojaki hida Deus athi: “A'onivani Israel kaija'ari Deus athi-ra mitha vani'a. 40 badara ipohini hora avakaabinihivini hiki ida igitha avaranaha'di'iki kaimoni. Hora avakavaihinikamaniki koda a'oni? Iniani. Kodimoni hirihi ida avakadibadani. Avakadiamonahi oamani ida avakavaihinikaja.

⁴³Avanamonahaki ida makari kagorahi amovani avakadideus amovana Moloque oniki kaimoni hina. Avanamonahaki ada boviri amovana avakadideus Renfã oniki kaimoni hina. Avakaiba'ihi ida avakadiamonahi, avakadideus hi'oamanija ida. Avakanamasivi'ihi ida avakadiamonahi, oniani bana ida napaja a'onira okaronavini hija, avakadiaraboa avahojajanaria kaimoni. Babilônia ibavi onikia a'onira okaronaki bana ho.” Nimania ida Deus athi papira hojaki.

⁴⁴Asia vara va'ora ni'aha ada Estêvão. —Oniaroa, akadija'ari avikhananavakia vavahojaki ida makari kagorahi amasia. Deu-ra khai vani'avini kagorani ida. Deua bihonariaha ada Moisés makari kagorahi-ra namonahavini. Moisé-ra nanokiahivini hi'ihi ida makari kagorahi hoariha vadami fori hikia, biogaja kaimoni ida amonahani.

⁴⁵Akadija'ari avikhananavakia vagathani'ihi ida makari kagorahi amasia. Deus vakadiania hojahaha'oadahana karajomini ida. Josué vakadika'da'di hina kari vavikha'ihi ida makari kagorahi hihida araboa. Josué khama va'ora vanihima'aha adani ija'ari hihida araboa vahoja'iki. Deus va'ora kakodiaha vakadiarabo kaimoni ahoroania. Hari. Vaabini'aha adani akadija'ari avikhananavaki. Vakadisai vania vavahoja'ihi ida gora. Badara îpohiki hojahi. Davi kohana ka'da'di hina kari asia mani hojahi ida makari kagorahi.

⁴⁶Davia bikanikhariaha ja'di kagorahi maina amonahania ija'ari Deu-ra khai vani'avini kagorani kaimonia. Davi-ra vajahavini kaba'i, ni-Deua biva'ahavini hiki ida badani.

⁴⁷Davi kaisai vani ada Deua biva'ahaha ja'di kagorahi-ra namonahavini.

⁴⁸Salomãoa binamonahavini kaba'i ida gora, ni-gora ija'aria vanamonahakia hojaki ada Deus hahavi-ra kaabokaki. Ibavi hahavia hojaki hada. Nimania ida Deus athi namoniva abono kohana vakadipapira athini. Deua bini'aha:

⁴⁹“Kodivithi ibavini ida nama. Arabo vania o'dama kakatiraja. Nahina kagorahi-ra koda avanamonahaki a'oni kodimoni? Hanajaja vania oakoiriki koda ho?