Atos 7:1-38

¹Morarame Ritonõpo maro oturuketõ tuisary a tõturupose, —Ajohpe pyra moxiã na? tykase ynororo Exitewão a.

²Ynara tykase Exitewão eya xine, —Wekyry tomo, kuetatoko, orutua kõ roropa. Pake Aparão a Ritonõpo tõsenepose saerehkane panõ ezure, Mesopotamia po Aparão ahtao ro Xarã pona ytopyra ro ahtao.

³Ynara tykase Ritonõpo eya, “Oesary irumekako, oekyry tõ roropa. Ymaro eropa. Imepỹ pata enepõko ase oya,” tykase Ritonõpo eya.

⁴Morarame Kautea turumekase Aparão a Xarã pona toytotohme. Morarame tumy orihxĩpo tosary turumekase eya. Tarona tooehse kuesaka xine.

⁵Ritonõpo onesaripopyra repe. Yrome ynara tykase ynororo eya, “Sero imeĩpo ekarõko ase oya oesaryme, oesahpyo apakõ esaryme roropa toorihse awahtao,” tykase Ritonõpo Aparão a tumũkue pyra ro ahtao.

⁶Mame ynara tykase roropa ynororo, “Apakõ mã imehnõ esaka ytõko osesarise. Moroto 400me zeimãnõko mã toto imehnõ esao.

⁷—Morarame apakõ tuarimahpõkõ wãnohnõko ase,” tykase Ritonõpo Aparão a. “Morotoino xiaro oehnõko ropa toh mana jeahmatohme kure,” tykase Ritonõpo Aparão a.

⁸Morarame Aparão tamorepase Ritonõpo a aipotapihpyry sahkary poko. Ynara tykase ynororo, “Kure rokẽ oritorỹko ase. Morara exiryke aĩkõpotapihpyry sahkapõko ase oya xine,” tykase Ritonõpo eya. Morarame Aparão toemũkuase, Izakeme. Mame oma etato irãnao ae aenurutopõpyry ahtao, tumũkuru aĩpotapihpyry tysahkase eya. Mame tuãtase Izake ahtao toemũkuase ynororo Jakome. Mame Jako toemũkuase 12me, kytamurukõme.

⁹—Morarame kytamurukomo a takorõkõ tokarose imehnomo a jehno toexirykõke. Ejitu pona tarose ynororo. Yrome Ritonõpo imaro kynexine.

¹⁰Toenupunase ipoko. Tutuarimakehpose eya. Morarame Ejitu esẽ Joze se toehse, tuaro aexiryke. Esety Parao kynexine. Joze kowenatume tyrise eya tytapyĩ esẽme roropa.

¹¹Morarame konopo toehkehse Ejitu po, Kanaã po, enara. Toetuarimase toto.

¹²Kytamurukõ nykyryry tonahse. Yrome Ejitupõkõ nykyryry nae ro kynexine. Morara kary etaryke tyya tumũkuru tõ tonyohse Jako a tỹkyryrykõ epekahse.

¹³Morarame toytozomose toto ahtao Joze tõsenepose turui tomo a. Tyekyry tõ tonepose Parao a eya.

¹⁴Morarame, “Kumykõ enehtoko xiaro,” tykase Joze turui tomo a. Mame emero morotona toytose toto, 75me.

¹⁵Morarame kytamurukõ toorihse moroto,

¹⁶Jako, imũkuru tõ, enara. Yrome toto ekepyry tarose Xikẽ patahpyry pona zonẽtohme, Aparão nepekatyhpyry aka. Emo poenomo a topekahse eya orihpyra ro toto ahtao. Xikẽ zũ Emo kynexine.

¹⁷—Morarame Aparão pakõ toemũkuase Ejitu po. Tuhke toehse toto moroto. Morarame tynekarotopõpyryae ro toto arory se ropa Ritonõpo kynexine esaka xine.

¹⁸Morarame imepỹ Ejitu tuisaryme toehse, Joze warõkara.

¹⁹Kytamurukõ tonekunohse eya. Tyyryhmase toto eya. Toto zehno toehse ynororo toto emamyryke. Imũkurukõ typahpose eya nakuaka.

²⁰Morarame Moeze tonuruse, poeto kuranoryme. Tumy tapyĩ tao oseruao rokẽ nuno taropose eya.

²¹Mame tapyi tae jeny a tarose ynororo nakuataka. Mame Parao ẽxiry a tanỹse ropa tunuãtanopyryme tumũkurume.

²²Ejitupõkomo a tamorepase ynororo itamurume. Tõtururu waro toehse. Emese kure toehse roropa ynororo otyro riry poko.

²³—Morarame Moeze tykaripãse ahtao, 40me jeimamyry taropose ahtao tyekyry tõ enese toytose ynororo, Izyraeu tõ enese.

²⁴Morarame tyekyry osanumary tonese tyya ahtao typynohse eya. Ejitupõ totapase eya.

²⁵“Wekyry tõ pynohneme jenetupuhnõko toh mana. Ritonõpo nenyokyhpyryme jekarõko toh mana,” tykase Moeze tukurohtao repe. Yrome onenetupuhpyra toh kynexine.

²⁶Yrokokoro tyekyry enese toytory ropahtao, atatapoiketõ tonese eya. Toto zupokary se kynexine repe. “Aimo, ãkorõ ananapoipyra exiko. Oxiehno pyra ehtoko,” tykase ynororo eya xine repe.

²⁷—Yrome ajoajohpano a tupurohmase. “Onoky omi poe upokato mano tuisame awahtao samo?

²⁸Ejitupõ etapahpõ mase. Jetapary se roropa hma?” tykase ynororo Moeze a.

²⁹Morara kary etaryke tyya toepase Moeze Mitiã pona. Toetapyirise moero. Toemũkuase asakoro.

³⁰—Morarame 40me tyeimãse ahtao moroto, Ritonõpo nenyokyhpyry tõsenepose Moeze a ona po, Xinai zopino. Xinai moro ypy esety.

³¹Moroto pika zatyry tonese Moeze a tororo ãko. Moro eneryke tyya toemynyhmase ynororo. “Otãto puhkoke pika ezehpyra nae? Eneta aporo,” tykase ynororo tukurohtao. —Morarame enese toytose tahtao Ritonõpo omiry totase eya, ameke pyra toehse tahtao. Ynara tykase Ritonõpo eya,

³²“Ritonõpo ase, atamurukõ esemy, Aparão, Izake, Jako. Emero oesẽkõme roropa ase,” tykase ynororo eya. —Morara kary etaryke tyya tykytyky tykase Moeze. Osenuhmara toehse ynororo tõserepyryke.

³³Morarame ynara tykase Ritonõpo eya, “Asapatũ touko jẽpataka oehtohme. Onoupyra awahtao orihnõko mase,” tykase ynororo eya. —Mame morara kary etaryke tyya tysapatũ touse eya. Mame ynara tykase Ritonõpo eya,

³⁴“Ypoetory tõ tuarimary enẽko ase Ejitupõkomo a. Morara exiryke oehno toto pynohse. Seromaroro aaropõko ase Ejitu pona,” tykase Ritonõpo Moeze a.

³⁵—Moeze mokyro ro. Apitoryme ise pyra toh kynexine repe tutuisarykõme. “Onoky omi poe upokato mano tuisame awahtao samo?” tykase toto eya. Yrome mokyro ro tyrise Ritonõpo a toto tuisaryme. Juteu tõ pynohneme tyrise ynororo Apotohtaonõpo a.

³⁶Morarame tarose ropa toto eya Ejitu poe. Tyjamitunuru tonepose roropa eya moroto Ejitu po, typoetory anaropopyra ropa Ejitupõkõ exiryke. Tuna purohpokuroko tarose toto eya. Moro tuna esety Tahpiremy. Mame ahno esao pyra 40me ikonopory taropose toto a, Ritonõpo jamitunuru enery poko roropa tyya xine. Tỹkyryneke pyra toto ahtao tỹkyrynehtose toto Ritonõpo a.

³⁷Mame Moeze ynara tykase Izyraeu tomo a, “Urutõ enehpõko Ritonõpo mana, kuekyrykomo, ysã exikety,” tykase Moeze pake tyekyry tomo a.

³⁸Moeze mokyro Ritonõpo poetory amorepahpono ahno esao pyra. Ritonõpo nenyokyhpyry maro roropa kynexine ypy po, Xinai po. Imaro tõturuse ynororo moro ypy po kytamurukõ netaryme. Eya Ritonõpo omiry tymerose, kyya xine ekarotohme roropa.