Atos 5:3-38

³Morarame Peturu tõturuse Anania maro, —Jepe, oty katoh joroko tamuru omipona mahno? Yna enekunopyry se hma repe? Yrome Ritonõpo zuzenu zuaro mana. Otupi epehpyry emero pyra mekaro yna a. Makoinohno otinerũkõme.

⁴Otupi onekaropyra awahtao xine otupime ro exiry. Tupito epehpyry morararo, otinerũkõme ro exiry. Oty katoh popyra oexirykõ se hmatou, yna enekunopyry se? Ajohpe mase Ritonõpo a yna a rokẽ pyra, tykase Peturu eya.

⁵Morara kary etaryke tyya nono pona toepukase Anania. Toorihse. Morarame, “Mokyro norihno Ritonõpo poe,” kary etaryke tyya xine tõserehse toto itamurume.

⁶Mame nuasemãkomo a ekepyry tanỹse. Tyõtose, enara. Tarose toto a, zonẽtohme.

⁷Morarame tẽ pitiko tykase ahtao ipytỹpyry tooehse, tuaro pyra.

⁸Mame Peturu tõturupose nohpo a, —Moro rokẽ kynako otupi epehpyry? —Ỹ moro rokẽ kynako, tykase nohpo.

⁹Morarame Peturu a tozuhse. Ynara tykase ynororo, —Oty katoh moturutou onio maro, “Senekunohne,” mykã onio a? Yrome Ritonõpo zuzenu oenetou. Eneko pahne moxiã, onio ekepyry zonemyhpõkõ noehno ropa toto tapyi eutary pota taka. Oekepyry arõko roropa toh mana zonẽtohme, tykase Peturu eya.

¹⁰Axĩ toepukase nohpo nono pona. Toorihse. Morarame nuasemãkõ tooehse ropa ahtao tapyi taka, nohpo orihsẽ tonese eya xine. Tarose toto a zonẽtohme inio ekepyry myhtokoxi.

¹¹Morarame tõserehse Jezu poetory tomo. Mokaro ekary etahpõkõ tõserehse roropa toto.

¹²Kokoro rokẽ tõximõse toh rahkene Peturu tõ maro, Ritonõpo maro oturutoh taka, Saromão nyrihpyry taka. Mame jamihme tyrise toto Ritonõpo a kurãkõkara kurãkatohme ropa eya xine.

¹³Mame imehnõ mokaro maro oximõpyra toehse toto, zuno toexirykõke. Yrome kure tõturuse toto ipoko xine.

¹⁴Mame tuhke Jezu poetory tõ toehse, orutua komo, nohpo tomo, enara. Tuhke tomãse toto.

¹⁵Morarame kurãkõkara kurãkary ropa eneryke tyya xine tuhke kurãkõkara tonehse eya xine etuehkõ tapo, osema taka Peturu zuzenu rokẽ ytotohme epozakuroko, osemae Peturu ytoryhtao.

¹⁶Tuhke roropa imeimepỹ pata tõ poe tooehse toto Jerusarẽ pona. Kurãkõkara tonehse roropa toto a, jorokohpãkõ roropa tonehse eya xine. Emero toh tukurãkase ropa eya xine.

¹⁷Morarame Ritonõpo maro oturuketõ tuisary tõ, satuseu to maro Peturu tõ zumoxike toehse toto.

¹⁸Tapoise toto a ẽmatohme ãpuruhpyry taka.

¹⁹Yrome Jezu nenyokyhpyry toytose koko ãpuruhpyry apuruhmakase ropa. Mokaro tutũtanohpose ropa eya.

²⁰—Ytotoko Ritonõpo maro oturutoh taka. Oturutatoko mokamo a Jezu poko, Jezu poetoryme toto ehtohme, orihpyra toto ehtohme jũme, tykase Jezu nenyokyhpyry eya xine.

²¹Morara tykase exiryke toytose toto pakeimo Ritonõpo maro oturutoh taka imehnõ amorepase. Yrome mokaro Ritonõpo maro oturuketõ tuisary tymarõkõ maro juteu tõ tuisary tykohmase tyya xine. Peturu tõ enehnanõ taropose eya xine ãpuruhpyry taka.

²²Morarame toytose toto ãpuruhpyry taka. Yrome tynẽmatyãkõ onenepyra tokurehse toto. Naeroro toytose ropa toto kõseriu a oturuse. Ynara tykase toto eya xine,

²³—Ãpuruhpyry tapuruse kynako. Erase tõ rokẽ moroto kynako. Ynanetapuruhmaka repe. Yrome arypyra toh kynako, tykase toto.

²⁴Morara kary etaryke tyya xine tõserehse toto, Ritonõpo maro oturuketõ tuisary tomo, oturutoh erase tõ maro. —Otara toehse toh nae? —Kũ. Aza rokẽ nytõ toto? tykase toto.

²⁵Morarame imepỹ tooehse oturuse. Ynara tykase ynororo, —Mokã mõto, onẽmatyãkomo. Oturũko toto Ritonõpo maro oturutoh tao. Imehnõ amorepãko mã toto, tykase ynororo eya xine.

²⁶Morarame soutatu tõ esẽ toytose, typoetory tõ maro, Peturu tõ apoise ropa. Opore pyra tõturuse toto eya xine sekerereme, imehnõ kurũke, totaparykõ se pyra toexirykõke.

²⁷Morarame tarose ropa Peturu tomo kõseriu ẽpataka ropa.

²⁸—Oty katoh imehnõ amorepãko matou mokyro poko? Toto anamorepapopyra ynanexiase ipoko oya xine. Seromaroro emero Jerusarẽpõkõ tamorepase oya xine. Ynahxirõko roropa matose mokyro exixihmatopõpyry poko, tykase mokyro Ritonõpo maro oturuketõ tuisary.

²⁹Morarame Peturu tomo a tozuhse, —Ritonõpo omipona se ynanase. Õmirykõ omipona se hkopyra ynanase.

³⁰Ritonõpo mokyro kytamurukõ esemy. Eya Jezu tõsemãkase ropa onexixihmahpyrykomo wewe pokona.

³¹Mame tuisa konõtome tyrise ropa ynororo Ritonõpo a, emero Kuesẽkõme aehtohme. Kypynanohnekõ mokyro. Kyyrypyrykõ korokary se ynororo. Kyyrypyrykõ rumekary se kuahtao xine ikorokãko mana.

³²Naeroro imehnõ tuarõmãko ynanase morohne poko. Yna maro Ritonõpo zuzenu mana yna akorehmãko. Tõmipona exiketomo a Tuzenu ekarõko Ritonõpo mana, tykase Peturu.

³³Mame morara kary etaryke tyya xine tyekĩtapãse toto. “Setapatone,” tykase toto.

³⁴Yrome toiro towõse tõturutohme. Parixeume ynororo, esety Kamarieu. Moeze omihpyry poko amorepatõme ynororo. Emero ise roropa toh kynexine. Mokyro a Peturu tõ jarãnaka taropose aporo. Mame ynara tykase ynororo,

³⁵—Izyraeu tomo, tomeseke ehtoko mokã poko.

³⁶Pake imepỹ tamuxime toehse, Teuta. Tuhke auturuhpyry ynororo tuisame toexiry poko. Imehnõ roropa toytose imaro, 400mãkomo. Yrome totapase ynororo ahtao, tãtahpahse toh emero, aomipona aehtyamo. “Tuisa konõto mokyro,” kara toehse toto.

³⁷Okomino tyoro, Juta, Karireapono kowenu tineru apoiryhtao ahno a. Tuhke roropa imaro tãtãnonohse toh repe. Yrome toorihse ynororo ahtao ipoetohpyã toytose ropa toto tosaka xine.

³⁸Naeroro ourutorỹko ase mokã poko pyra oehtohkõme. Ah nytõ toto. Ahno omi poe rokẽ toto ahtao toto namorepatary enahnõko rokẽ mana. Yrome Ritonõpo omi poe toto ahtao enahpyra mana imehnõ amorepary eya xine.