Atos 4:9-36

⁹oty katoh, “Onoky poe ytoytopynỹpo mukurãkatose rohpa?” ãko matou oturupõko yna a?

¹⁰Jomiry etatoko Izyraeu tomo. Mokyro ynanukurãkase ropa Jezu poe. Jezu mokyro Nazarepono, Ritonõpo mũkuru. Onexixihmahpyrykõ mokyro. Yrome tõsemãkase ropa mana Ritonõpo a. Jezu poe mokyro toekurãkase ropa mana.

¹¹Jezu Kyrixtu poko pake tymerose Ritonõpo omiryme. Ynara tymerose urutõkomo a, “Tapyi rinanomo a wewe turumekase repe. ‘Popyra nase,’ tykase toh repe. Yrome tapyi nikapuru apoihtyme tyrise ropa, imepỹ pyra exiryke, jamihme tapyi ehtohme,” tykase.

¹²Jezu rokẽ kyyrypyrykõ korokaneme mana, toiro. Imepỹ kyyrypyrykõ korokane pyra, Jezu rokene, tykase Peturu eya xine.

¹³Morarame Peturu tõ otururu totase tyya xine ahtao, tõturuse toto oxime rokene, —Otokoino moxiã enaromyra toehse nae? Atamorepara toh nase repe. Yrome Jezu maro monexiã toto atamorepãko. Otarãme morara exiryke zuaro toehse toh mana, Jezu maronõpotõme toexirykõke, tykase toto. Oxime tõturuse toto.

¹⁴Mame mokyro kuranõpokara eneryke tyya xine toto maro, “Ajohpe matose,” kara toto.

¹⁵Morarame tosae xine Peturu tõ tutũtanohpose ropa toto a, oxime rokẽ tõturutohkõme,

¹⁶—Otara ãko sytatou mokaro a Jezu poko toto oturukehtohme? tykase toto, tõturuse oxime rokene. —Kurãkara kurãkahpõ mokaro. Tarõkõ emero zuaro mana, Jerusarẽpõkomo. “Ajohpe,” kara sytatose ipoko xine.

¹⁷Jezu poko oturupyra rokẽ syripotone toto. Senaroximatone toto imehnõ onurupyra Jezu poko toto ehtohme, tykase toto.

¹⁸Morarame tykohmase ropa toto tyya xine, —Imehnõ onurupyra ehtoko Jezu poko, tykase toto.

¹⁹Yrome ynara tykase Peturu tomo, —Oty Ritonõpo a kure nae? Õmipona xine yna exiry, tõmipona yna exiry?

²⁰Yna a tonese exiryke oturukehpyra ynanase Jezu poko, tykase toto.

²¹Morarame Peturu tõ enaroximary se toh kynexine repe, —Ytotoko ropa. Awãnohtorỹko ynanase imehnõ zururuhtao Jezu poko oya xine, tykase aroporykõme ropa toto. Peturu tõ wãnopyry se toh kynexine repe. Yrome onuãnohpyra tokurehse toto, tuhkãkõ Peturu tõ pyno exiryke. —Kure Ritonõpo mana, ãko rokẽ toh kynexine.

²²Tãtãkyemase toto, ytoytopynỹpo ikaripamyhpyry tukurãkase ropa exiryke.

²³Morarame tonyohse ropa toexirykõke Peturu tõ toytose ropa João maro, imehnõ Jezu poetory tomo a. Juteu tõ esã omihpyry tokarose eya xine.

²⁴Morarame toto omiry etaryke tyya xine tõturuse toto Ritonõpo maro, Jezu poetory tõ oximõme. Ynara tykase toto, —Yna esẽme mase Ritonõpo. Kapu rihpõ mase, kapu, nono, tuna, tunakuaõkomo, nonopõkomo, emero tyrise oya.

²⁵Pake moturune yna tamuru a, Tawi a. Ynara tymerose eya õmiryme Ouzenu poe, “Oty katoh Izyraeu tõ maro imehnõ maro yzehno toh nae?

²⁶Typatakã maro typoetory tõ maro Kuesẽkõ zehno, Kyrixtu zehno,” tykase Tawi.

²⁷—Morararo taro nase Jerusarẽ po seromaroro, tykase Peturu Ritonõpo a. —Erote tuisame nase. Põtiu Pirato kowenatume roropa nase. Mokaro oximõme Romapõkõ maro Izyraeu tõ maro Omũkuru zehno.

²⁸Zehnotokõ moxiaro Omũkuru exixihmahpõkomo. Morara tyrise eya xine onekarotopõpyryae ro, tuarohxo oexiryke, orẽpyrahxo roropa oexiryke.

²⁹Seromaroro mokaro eneko Papa kapuaono, yna enaroximary se aehtyamo. Yna akorehmako enaromyra yna ehtohme, õmiry ekarotohme yna a.

³⁰Kurãkõkara ikurãkako ropa. Ajamitunuru enepoko ropa Omũkuru kurã pokoino, Jezu pokoino, tykase Peturu Ritonõpo a.

³¹Morarame tõturukehse toto ahtao, moro tapyi kywyhkywyh tykase. Ritonõpo zuzenu tomõse toto aka. Orẽpyra Ritonõpo omiry tokarose eya xine imehnomo a.

³²Morarame Jezu poetory tõ oximõme toehse, omomỹke pyra toh kynexine toenupunarykõke imehnõ poko.

³³Orẽpyra imehnõ turuse eya xine Jezu ẽsemamyhpyry ropa poko. Kure rokẽ toh kynexine oximõme, tãkye rokene. Imehnõ roropa ipyno xine.

³⁴Morara exiryke etuarimara toh kynexine emero. Tutupikamo a tutupikõ tokarose eya xine Peturu tomo a. Tytapyikamo a roropa tytapyĩkõ tokarose tineru apoitohme tyya xine,

³⁵ekarotohme Peturu tomo a, apiakatohme ise exiketomo a etuarimara aehtohkõme.

³⁶Morarame Joze kynexine, Xiperepono, Rewi pary. Mokyro tosehpase Panapeme, oxiehnotokõ kurãkaneme ropa aexiryke.