Atos 2:9-24

⁹Akadiarabo ipohiki onini Pártia, Média, Elão, Mesopotâmia, Judéia, Capadócia, Ponto, Ásia,

¹⁰Frígia, Panfília, Egito hiki. Vahoariha vaibavi Líbia kaaraboni Cirene maakarinia hojaki ida. Vahoariha vaibavi Roma, Creta, Arábia hikia oniki ida.

¹¹Harivani judeus kaija'ari hari. Vahoariha akadiania vahojana akadija'ari vihirina kaba'i harifori vihiki adani, akadiDeu-ra vanofijahaki'iki adani. Akamitha'ihi ida Jesus vaipohihava abono ariathi ipohikia vara vakhani'ina, vara vavani'avini ida Deus kabadani danoki — vakhanimanira adani arabo hoariha kaija'arini.

¹²Vakava'ibodivaranikaraho'ihi ida vakadiarabo ipohiki kaija'arini athini-ra vidionivini adani Jesus vaipohihava abono. Vaabono vakanana'dohikhama'aha: —Niha vakhanimanira adani ija'ari ariathi-ra avigaravini kaba'i, ariathia vara vakhaniki?

¹³Vahoariha vani adani va'ora vakanahahanihara: —Vakahanoki adani Jesus vaipohihava abono — vaabono vakani'akhama'aha.

¹⁴Hari. Oniaroa, vigaa'aha adani Pedro, Jesus athi avavaadahaoniva abono khama. Athi 'barakia va'ora vara ni'a'aha adani judeus kaija'ari vajoroniki Jerusaléa: —Kodija'ari, a'onira onava'isohivini hiki bana hida namitha'iki akadiania. Kodivarani-ra bana mitha vani'ajahaki.

¹⁵Akahanoki haria avavanihamania koda? Akadihojai hirihi ida ija'ari kavi-ra avivini safini namahikajomana. Akahanorihi.

¹⁶Namitha'iki hida hidakaba'i, Deus Joel kohana-ra nava'isohijoravini hi'iki. Deus athi namoniva abono ada Joel kohana. Deua bini'aha:

¹⁷“Mahi ihimini kamahini amaakarini okaronaki bana ada Ma'onahai Jahaki ija'ari hahavi vakadiania. Avakadisai vakadiania kha'ina mani ida vidionivini hija bana oathi namithaki kaimoni. Avakadimakhinava vakadiania kha'ina mani ida vavadirina kaba'i vadami fori hiki-ra vanokivini hija bana. Avakadina'arihavi vakadiania kha'ina mani ida vadami-ra vanokivini hija, nini vani jaboni va'ora onava'isohivini hija ida oathi.

¹⁸Kodihonai abono makhira, gamo vihiki hahavi vakadiania okaronaki bana ada Ma'onahai Jahaki, oniani ida vara vavani'avini hija va'ora onava'isohivini hi'ikia.

¹⁹Onanokiaki bana ida kodibadani danoki nama, arabo hikia, ija'ari-ra nava'ibodivaranija kaimoni. Okananokiaki bana ida siho kaha'dini, kaojini kaodoki kihiki nama. Ama onanokiaki jaboni nama. Rajomi kaimoni ida nahina va'ora onanokiahivini hiki bana nama, arabo hikia.

²⁰Ka'da'di ka'oa khana kamahini viahania mokhiki bana ada safini vagana. Nadaraki bana ada masiko, ama nadarani fori hina. Jaha'oamanija ida khana kamahini. Nokiaki bana ida ka'da'di ka'oa vagana, danona, jahana.

²¹Hari. Oniaroa, ija'ari kaka'da'di ka'oa-ra vakanikhariaha va'ora akava'ijoaki bana adani.” Nimania ida Deus athi Joel kohana binajiri'iki.

²²Asia Pedro va'ora vara ni'aha adani Israel kaija'ari: —Mitha vani'a bana hida kodivarani. Vara ovani'aki bana ada Jesus. Bivavijavaki ibavi onini Nazaré sidaji. Deus vania bikarona'ara ada Jesus avakadiania. Kidibadani ija'ari-ra nava'ibodivaranibakhiaki. Jesu-ra kakodiavini mani ida badani danoki ipohiki-ra bada ni'avini hi'ia. Jesus kabadani danoki-ra avanokivini mani ida Deua bikaronavini avarigavini hija.

²³Hari. Deus Jesu-ra karonavini viahania biogaki ida avanaabinivini bana. Biva'aha'iki ada Jesus okhana avakadiania, abinira kaimoni. Ida Deua binofiki namitha'ihi. Oniaroa, va'ora avahonaria'aha adani makhira hojai jaharikia vakahojaiki Jesu-ra avaka'itapoamisahanavini ava akasanakhamakia.

²⁴Hari. Avanaabinivini naothinia Deus vania bianahoki'ara ada. Deua bianaihotavini mani ida Jesus aba'ona anahoki'ia joira kaimoni hidiaja. Abinia ni-bikaaboka'iki ada Jesu-ra gathivini kidiania.