Text copied!
CopyCompare
Ritonõpo Omiry - Atos - Atos 2

Atos 2:1-45

Help us?
Click on verse(s) to share them!
1Morarame oximõme toto ahtao ro juteu tõ otuhtoh konõto toehse, Pẽtekoxite toehse. Moroto tapyi tao Jezu poetory to kynexine.
2Morarame tyryrykane konõto panõ totase toto a topozakoxi xine. Tyhtose tapyi taka tyryrykane panono.
3Morarame apoto panõ tõtumakase. Tororo kane pano toepukase tapyitaõkõ pona.
4Morarame morotõkõ aka Ritonõpo zuzenu tomõse. Tyotyorõkõ omiryae tõturupitose toto Ritonõpo zuzenu poe.
5Moroto Jerusarẽ po juteu tõ kynexine, Ritonõpo omipona exiketõ tuhke. Juteu tõ otuhtoh konõto pokoino, tuhke tosae xine toh tooehse, imeimehnõ maro tuhke toh tooehse morotona.
6Morarame moro ekary etaryhtao morohnome toytose toto tururume, enese.
7Tõsenuruhkase toto tõmirykõae Jezu poetory otururuke. —To! Otãto yna omiry waro toehse matou?
8Karireapõkõ amarokõ repe. Yrome yna omiry waro amarokomo!
9Taro ynanase, Paratiapõkomo, Metiapõkomo, Erãopõkomo, Mesopotamiapõkomo, Juteapõkomo, Kapatoxiapõkomo, Põtupõkomo, Aziapõkomo,
10Piritiapõkomo, Pãpiriapõkomo, Ejitupõkomo, Xirenepõkomo (Ripiapõ Xirene), Romapõkomo,
11Arapiapõkomo, enara. Toitoine Kereta poe aehtyã ynanase. Imehnõ Arapia poe aehtyã roropa ynanase. Toitoine juteu tõ ynanase. Toitoine juteu poenopuhpõkõ ynanase. Moxiaro etãko ynanase yna omiryae toto exiryke. Morararo nase moxiamo tõmirykõme exiryke etãko toto Ritonõpo kypyno xine exiry poko, tykase toto.
12Moroto toh kynexine tõsenuruhkarykõ poko. Toepohnohse toto. —Oty moro? tykase toh tõturupose.
13Yrome imehnomo a tounohse toto, —Moxiã aetỹtyã rokene, tykase toto. Toetỹse tokarose toto a.
14Morarame Peturu tooehse 11mãkõ maro. Opore tõturuse imoihmãkomo a, —Etatoko pahne Juteapõkomo, Jerusarẽpõkõ roropa.
15Oty katohme, “Toetỹse,” ãko matou yna poko? Etỹtoh zano pyra nase. Xixi onuhpyra ro nase. Etỹpyra ynanase.
16Yrome pake Ritonõpo nymeropohpyry Joeu a sero poko. Ynara tykase,
17“Nono atakurohkary moe pyra ahtao ynara tyrĩko ase, ãko Ritonõpo. Juzenu ekarõko ase oya xine. Morarame omũkuru tõ oẽxiry tõ roropa jomiry ekarõko mana. Nuasemãkomo a osenepõko ase. Tãhpomãkomo a oturũko ase aosenety xine.
18Ỹ, ypoetory pona emero Juzenu aropõko ase, orutua kõ pona, nohpo tõ pona roropa.
19Morarame jomiry ekarõko toh mã rahkene. Tyoro sã tyrĩko ywy kapu ao, nono po roropa, õsenuruhkatohkõme, munu te, apoto te, orexĩto konõto.
20Xixi zarumãkapõko ase. Nuno kamirarame exĩko mana munu samo. Morarame okynã pyra ynymenekahpyry oehnõko ropa mana, tuisamehxo, ẽmepyry kure moroto ahtao.
21Morarame ‘Tuisa oenupunako ypoko,’ karyhtao oya xine ynymenekahpyry a, enupunãko mã rahkẽ opoko xine, tykase Ritonõpo,” me tymerose Joeu a Ritonõpo omi poe.
22—Etatoko pahne orutua komo, juteu tomo. Jarao nexiase Jezu Nazarepono. Ritonõpo zamaro ynororo kynexine. Morara exiryke tyjamihtanohpose eya kurãkõkara kurãkatohme ropa eya. Zuaro ro matohu?
23Pake Ritonõpo zuaro kynexine, Jezu exixihmapotoh waro. Toxixihmapose oya xine, zehnotokomo a. Moro waro Ritonõpo kynexine Jezu orihpyra ro ahtao. Yrome, “Ah nexixihmã toto,” tykase Ritonõpo.
24Mame tõsemãkapose ropa ynororo Ritonõpo a. Jũme orihpynỹpo sã toehse ropa ynororo typoremãkapory se pyra toexiryke toorihtopõpyry a.
25Ynara tymerose kytamurukomo a, Tawi a, Jezu omiryme, Ritonõpo omi poe, “Papa, kokoro rokẽ oenẽko ase ymaro. Torẽtyke pyra ase, yjamihtanohneme oexiryke.
26Tãkye ase opoko. Kure mase Papa. Oeahmãko ase ypyno oexiryke. Torẽtyke pyra ase, jorikyryhtao ro urumekara oexiryke.
27Toorihse jahtao jekepyry onymotanohpopyra mase omũkuru nymyryme jexiryke.
28Jẽsemãkapõko ropa mase, orihpỹme jehtohme. Tãkye rokẽ jyripõko mase oẽmyty eneryke ya,” me tymerose Tawi a Jezu omiryme.
29—Wekyry tomo, topohme oturuxi amaro xine. Pake kytamurukõ Tawi toorihse. Ekepyry tonẽse. Ekepyry esary mõto mana seroae ro.
30Yrome Tawi urutõme kynexine Ritonõpo zuzenu omi poe. Zuaro ynororo Ritonõpo omi poe, Kyrixtu typaryme exiry waro. Tuisa konõtome Kyrixtu exiry poko tuaro roropa, tymyakãme aexiry waro.
31Ritonõpo omiry waro Tawi kynexine. Jezu ẽsemamyry ropa waro roropa kynexine. Morara exiryke morara tykase ynororo, “Zuzenu onynomopyra Ritonõpo mana aorihtyã esao. Ekepyry motara roropa mana,” tykase ynororo.
32Tõsemãkapose ropa Jezu Ritonõpo a. Ynanenease. Morara exiryke ourutorỹko ynanase.
33Seromaroro Jezu tuisamehxo tyrise Ritonõpo a. Ritonõpo maro mana. Pake Ritonõpo tõturuse eya, “Juzenu ekarõko ase oya,” tykase Ritonõpo. Mame Tuzenu tokarose Jezu a rahkene. Morara exiryke senohne enẽko matose. Õmirykõae Ritonõpo omiry etãko matose.
34Kapu aka onuhpyra Tawi ekepyry kynexine. Jezu rokẽ tõnuhse. Ynara tymerose roropa Tawi a, “Ritonõpo tõturuse Kuesẽkomo a, ‘Oporohko seino, japotunuru wino, tuisame oexiryke,
35oepetõkara ke anamotomatohto ya,’ tykase Ritonõpo Tumũkuru a.” Morara tymerose Tawi a pake.
36Izyraeu tomo, tuaro ehtoko. Jezu mokyro onexixihmahpyrykomo. Tuisame tyrise ynororo Ritonõpo a Kuesẽkõme aehtohme, tykase Peturu eya xine.
37Morarame toemynyhmase toto Peturu omiry etaryke tyya xine, —Morara ahtao oty rĩko ynanah? tykase toto Peturu tomo a, tõturupose.
38Peturu a tozuhse toto, —Oorypyrykõ irumekatoko Jezu omipona oehtohkõme. Osẽpurihkapotoko Jezu Kyrixtu omi poe, oorypyrykõ korokatohme Ritonõpo a. Mame Ritonõpo nekarory apoĩko matose. Zuzenu kurã apoĩko matose.
39Ritonõpo mã Tuzenu ekarory se oya xine, opoenomo a, moemoẽkõ patatõpõkomo a roropa, emero tyneahmatyamo a, tykase Peturu toto a.
40Morarame Peturu toto zurune itamurume Jezu poko. Otuhparo turuse toto, —Emero iirypyryme matose. Iirypyryme oexirykõ se pyra Ritonõpo mana. Naeroro oorypyrykõ irumekatoko awãnohpyra xine Ritonõpo ehtohme, tykase Peturu eya xine.
41Morarame mokaro a Jezu tonetupuhse Peturu omiry etaryke tyya xine. Tõpurihkase toto Peturu tomo a. Moro ẽmepyryae tuhke tomãse toto Jezu poetoryme, 3.000me.
42Morarame kokoro rokẽ tõximõse toto Jezu omiry etatohme, Peturu tomo a ekarory etatohme. Kure tõturuse toto. Oximõme tõtuhse toto. Kokoro rokẽ tõturuse roropa toto Ritonõpo maro.
43Morarame emero Ritonõpo zuno toehse toto, Peturu to nukurãkatyã eneryke roropa tyya xine, kurãkõkara tukurãkase ropa exiryke Peturu tomo a.
44Morarame Jezu omipona exiketõ oximõme kynexine. Tymõkomorykõ tapiakase eya xine imehnõ Jezu poetory tomo a.
45Tymõkomorykõ tokarose roropa eya xine imehnomo a tineru apoitohme tyya xine, apiakatohme imehnõ Jezu poetory tomo a, etuarimara toehtohkõme.

Read Atos 2Atos 2
Compare Atos 2:1-45Atos 2:1-45