Atos 19:1-25

¹Morarame Aporu Korĩto po ahtao, Pauru toytose osemae pata tõ poro Epezu pona. Moroto Jezu poetory tõ tonese eya.

²Mame mokaro a tõturupose Pauru. Ynara tykase ynororo eya xine, —Ritonõpo a Tuzenu tokarose oya xihne, Jezu enetuputyryhtao oya xihne? tykase Pauru toto a tõturupose. —Kũ. Tuaro pyra reh ynanahse Ritonõpo zuzenu poko, tykase toto tozuhse Pauru.

³—Onoky omi poe tõpurihkase matou? tykase Pauru eya xine. —João namorepatopõpyry poe rokẽ tõpurihkase yna, tykase toto.

⁴Ynara tykase Pauru eya xine, —João omi poe tõpurihkase awahtao xine kure repe, oorypyrykõ turumekase oya xine ahtao. Yrome ynara tykase João tuhkãkomo a, “Okomino imepỹ oehnõko mana Ritonõpo mũkuru. Mokyro enetupuhtoko oesẽkõme,” tykase João, Jezu poko, tykase Pauru eya xine.

⁵Morarame morara etaryke tyya xine tõsẽpurihkapose ropa toto eya, Jezu Kyrixtu enetuputyryke tyya xine.

⁶Morarame toto zupuhpyry pona Pauru a tomary tyrise ahtao, tomõse Ritonõpo zuzenu toto kurohtaka. Tyotyorõkõ omiryae tõturuse toto Ritonõpo zuzenu poe. Ritonõpo omiry poko roropa tõturuse toto.

⁷Morotõkõ tuhke hkopyra kynexine, 12me orutua komo.

⁸Mame juteu tõ atamorepatoh taka Pauru toytose. Orẽpyra tõturuse toto a. Oseruao nuno taropose eya toto amorepary poko Ritonõpo tuisame exiry poko.

⁹Yrome imehnõ Pauru omipona pyra kynexine, Jezu enetuputyry se pyra toh kynexine tosẽkõme. Pauru namorepatopõpyry Jezu poko typoihtose eya xine tuhkãkõ netaryme. Morara exiryke mokaro turumekase Pauru a, Jezu poetory tõ maro tõturutohme. Mame kokoro rokẽ tamorepapitose toto Pauru a Tiranu namorepatoh tao.

¹⁰Moroto asakoro ikonopory taropose Pauru a toto amorepary poko rokene. Emero morotõkõ Aziapõkõ tutuarõtase Ritonõpo omiry poko, juteu tomo, juteutõkara, enara.

¹¹Pauru tyjamihtanohse Ritonõpo a kurãkõkara kurãkatohme ropa eya.

¹²Morarame Pauru wino kamisa pitiko tarose toto a, upo roropa tarose kurãkõkara apotohme, toto kurãkatohme ropa. Moro a tukurãkase ropa toto Ritonõpo poe. Joroko tõ roropa tutũtase ropa zae xine.

¹³Mame juteu tõ kynexine pata tõ poro ytoketomo. Pyaxime toh kynexine. Joroko tõ tũtanohpory ropa waro sã toh kynexine. Mokaro Pauru poenopyry se kynexine repe. Yrome Jezu waro pyra toh kynexine. —Joroko tõ tũtanohpory waro ynanase ahno ae, tykase toh repe. Mame ynara tykase toto jorokohpano a, —Joroko, otũtako ropa mokyro ae Jezu omi poe, Pauru nekarohpyry omi poe, tykase toh repe.

¹⁴Morara tykase Xikiwa poenomo 7mãkomo. Jũkõ juteu. Ritonõpo maro oturuketyme kynexine, tamuximehxo exikety.

¹⁵Yrome joroko a tozuhse toto, —Jezu waro ase, Pauru roropa. Yrome awaro xine pyra ase, tykase joroko eya xine.

¹⁶Mokaro pona tarĩnase jorokohpã orẽpyra. Tyyryhmase roropa toto itamurume eya. Toepase toto ikurũke tupoke pyra, typitypipokurukõke.

¹⁷Mame mokaro ryhmatopõpyry poko jorokohpano a tutuarõtase toto, morotõkomo, juteu tomo, kyreku tomo, enara. Tõserehse toto porehme. —Imehxo Jezu mana, tykase toto. Ajoajohpe Jezu onekaropyra toehse toh rahkene.

¹⁸Morarame tuhke Jezu enetupuhnanõ tooehse tyyrypyrykõ rumekary se toexirykõke.

¹⁹Tuhke pyaxiamo a roropa tykyryrykõ tonehse, typapẽkõ maro, jahkatohme, imoihmãkõ ahno ẽpataka. Atapona pape epehpyrỹpyry 5 mirião motye tyahkase eya xine.

²⁰Tuhke Jezu omipona toehse toh kynexine aomiry jamihme exiryke.

²¹Morarame pata tõ poro Pauru toytory se toehse, Masetonia poro, Kyrexia poro roropa Jerusarẽ pona ropa. Ynara tykase ynororo, —Jerusarẽ poe Roma pona jytory se ase ipunaka, tykase.

²²Morarame asakoro takorehmananõ taropose eya Masetonia pona Timoteu, Eraxitu, enara. Yrome Pauru moroto kynexine, Azia po, okynã samo.

²³Morarame Jezu poetory tõ zehno toehse morotõkõ kynexine.

²⁴Moroto orutua kynexine esety Temetyriu. Parata tyrise eya Tiana kuhtohme, “Ritõ mosero,” katohme tyya repe. Moro poko rokẽ tinerutãko toh kynexine, imehnõ parata rinanõ maro.

²⁵Mokaro tykohmase tyya tõturutohme. Ynara tykase ynororo eya xine, —Jepe tomo, sero poko rokẽ tinerutãko sytatose.