Atos 14:5-22

⁵Morarame morohnome tooehse toto Pauru ryhmary se exiketomo, juteutõkara, juteu tomo, pata esamo, enara.

⁶Yrome Pauru tõ tuaro kynexine. Toepase toto Rixityra pona, Terepe pona roropa Rikaoniapõ pona.

⁷Mame morotõkõ Ritonõpo omiry poko tamorepase Pauru tomo a.

⁸Morarame Rixityra po orutua kynexine. Moinoro tonurutopõpyry poero jaxiry ãtakamahpyry kynexine.

⁹Mokyro a Pauru omiry totase kure.

¹⁰Zae tonetupuhse eya rahkene. Mame Ritonõpo omiry enetuputyry eya eneryke tyya ynara tykase Pauru eya, —Owõko xikihme, tykase eya. Morarame pyhsekyh tykase ynororo xikihxikihme toytose.

¹¹Mokyro ekurãkasẽ eneryke tyya xine tõturuse toto oxime tõmirykõae imoihmãkomo. Ynara tykase toto, —Ritõ kõ noehno kyya xine ahnome, tykase toh repe, Pauru tõ poko.

¹²Morarame Panape tosehpase Jupiteme toto a. Pauru roropa tosehpase Mekuriome, ynororo rokẽ oturuketyme exiryke.

¹³Morarame pyaxi tooehse Jupite pyaxiry. Pui tonehpose eya jahkatohme pata ehpikoxi tynekarorykõme Pauru tomo a repe. Otyro ekuru roropa tonehse eya xine ekarotohme Pauru tomo a.

¹⁴Yrome moro eneryke tyya xine tururume toytose ynaroro toto htoko. Tupõkõ tyxihxihkase eya xine. Tõmitase ynaroro eya xine,

¹⁵—Oty katoh pui zahkãko matou? Ahno rokẽ ynanase, ritõ kara. Ritonõpo omiry ekarose ynanoehno oya xine, oorypyrykõ rumekatohme oya xine, tykase Pauru tõ eya xine. —Ritonõpo omipona rokẽ oexirykõ se ynanase. Ritonõpo mokyro kapu rihpono, nono roropa, tuna roropa, kapuaõkõ roropa, nonopõkõ roropa, nakuaõkomo, enara. Emero tyrise Ritonõpo a, tykase Pauru eya xine.

¹⁶—Pake Ritonõpo tõturuse tyya rokene seropõkõ poko emero porehme. Ynara tykase ynororo, “Ah tamoreme nexĩ toto,” tykase Ritonõpo.

¹⁷Yrome tahxime kynosenepone samo. Tynyrihpyry kurã enepone roropa. Ynororo rokẽ konopo enehpõko mana kỹkyryrykõ ahtatohme, eperytatohme roropa. Kuohkõ ekarõko roropa mana tãkye kuehtohkõme kutuarõtatohkõme typoko, tykase Pauru Rixityrapõkomo a.

¹⁸Morara karyke eya kuremỹme pui tõ onyahkara toh kynexine.

¹⁹Morarame juteu tõ tooehse Ãtiokia poe Ikoniu poe roropa. Tuhkãkõ maro tãtaomihtose toto Pauru etapatohme. Mame topu ke totapase eya xine rahkene. Ekepyry tarose eya xine soororome pata ehpikoxi etapahpõkomo a. —Toorihse nase, tykase toto.

²⁰Yrome topoe xikihxikihme Jezu poetory tõ ahtao, towõse ropa Pauru. Mame pata pona toytose ropa toto. Mame yrokokoro toytose ropa Pauru, Panape maro Terepe pona.

²¹Morarame Ritonõpo omihpyry kurã tokarose moro patapõkomo a Terepepõkomo a. Turuse toto ahtao Pauru a Jezu poetoryme toehse toto tuhkãkomo. Moromeĩpo toto tamorepakehse tyya xine ahtao toytose ropa toto Rixityra pona. Morotoino toytose toto Ikoniu pona. Morotoino Ikoniu poe toytose ropa toto Ãtiokia pona, Pizitiapõ pona.

²²Moroto Jezu poetory tõ tyjamihtanohse ropa Pauru tomo a. Turuse roropa toto eya xine jũme Ritonõpo omipona toto ehtohme. —Jetujetũ kuahtao xine Jezu maro ytõko sytatose Ritonõpo esaka, tykase toto Jezu poetory tomo a.