Atos 13:34-43

³⁴— “Kâingonotyby igueduo, kurâem ietonze urâ, eguepybyry niwânzepa itoem” kewândymy Deus. “ ‘Koendâ ise urâ agâ’ uguely akâwândy Daviram. Davi agâ koendâ watobyry ara ise agâmo koendâ wawyly. Xirâ auguehobyry ara aiese urâ” kewândymy Deus.

³⁵— Warâ lâpylâ myakâwândy Davi iwenibyem awyly, Deus aguehobyry Messias eguepybyry wâgâ: “Imarybyry, toenzepa âinwânnipyry eguepybyry mâinwânzeânehomba ise âmâ” kewândymy Davi Deusram — kely myani Paulo.

³⁶Aituo myani agueondyly: — Tywâgâpa Davi aguely awyly, tutuze kurâ, arâ aguehobyry wâgâ. Deus tâinwânse, koendâ kydamudo iwymâryem awyly warâ mykâinane. Iguewâm olâmy. Idamudo eguepybyry etadâdobyry odajilâ myakâwândy eguepybyry âzetadâoly. Târâlâ myakâwândy eguepybyry iwânzely.

³⁷Jesus eguepybyry olâ myani niwânzepa. Deus myani kurâem tyetonze — kely.

³⁸Warâ tâkeze myani Paulo: — Ypemugudo, mâuntudyzemo urâ, Jesus kieinwântuo lelâ inakanhe aguitobyry Deus nhygakely awyly. Jesus wâgâlâ iwerâ xina âyanmo aguely.

³⁹Jesus mâinwântuomo lelâ inakanhe amitomobyry âdygakeoly. Inanajimo olâ inakanhe amitomobyry âdygakeoybyem, Moisés inweniby ara amidylymogue kulâ. Arâpa olâ. Jesus mâinwântuomo lelâ âdygakeoly.

⁴⁰Saguhoem Deus wâgâ aguewâni modo, “Deus Ingonokyly eynynâbaom modo âsenagazeze” tâkezemo myakâwândy. Eynynâ itaungâ, mâsenagazebyra mitomoem. Warâ myakâwândy Deus aguehobyry Habacuque inwenily:

⁴¹“ ‘Auguely mâinwântaymba âmaemo. Âwankuem yedâmo lelâ. Âpaunzedaungâ, âseanedaungâ warâ! Âdyoze âmaemo, ytaumbyry mâindadyseba mawylymogue. Iwerâ agânhekyly ise mâuntulymoemba kuru, tâwâlâ wâne koendâ âyanmo egatuly’ kewândymy Deus” — kely myani Paulo.

⁴²Adâkebygueduolâ myani Paulo, Barnabé warâ egaselymo mârâ âtâ tâdâtâdyguyho odayba. Idâdaymo myani tonlo modo eyanmo aguely: — Imâem tindadyse xina Jesus wâgâ. Tâzekobyzegueho oday âetondaungâne, xinaram agueonse — kelymo myani.

⁴³Idâdaymo toenzepa judeu domodo, Paulo, Barnabé warâ tyampyguezemo myani. Judeu keba, judeu nheinwânkyly einwânni modo eagâmo tâtâzemo lâpylâ myani. Paulo, Barnabé warâ eyanmo aguely myani: — Kagâ koendâ tawyly Deus nimowâbyra. Einwânsezedaungâ lakuru awylygue anhekyly modo âmaemoenlâ awyly — kelymo.