Text copied!
CopyCompare
Ritonõpo Omiry - Atos - Atos 13

Atos 13:16-50

Help us?
Click on verse(s) to share them!
16Morarame Pauru towõse xikihme. Tõsemahxirarahmase ynororo tõturutohme toto netaryme. Ynara tykase ynororo, —Wekyry tomo, Ritonõpo omipona exiketomo, kuetatoko ke.
17Izyraeu tõ sytatose. Kuesẽkõme Ritonõpo mana. Eya kytamurukõ tymenekase typoetoryme. Toenupunase ynororo kytamurukõ poko imehnõ patao toto ahtao, katonõme Ejitu po toto ahtao, tykase Pauru eya xine. —Morarame Ejitu poe tonehpose toto Ritonõpo a tyjamitunuru enepotohme eya xine.
1840me ikonopory taropose kytamurukomo a Ritonõpo kerekeremary poko ona po, ahno esao pyra, tykase Pauru eya xine. —Mame tõseanahtose rokẽ ynororo tykerekeremary poko kytamurukomo a.
19Morarame tuhke pata tamurupõkõ typoremãkapose Ritonõpo a. 7me pata tamuru kynexine Kanaã po. Morarame toto patahpyry tapiakase kytamurukomo a tosarykõme.
20—Morarame terekatu tõ tokarose Ritonõpo a kytamurukõ tuisaryme. Tuhke ikonopory taropose eya xine 450me, Samueu enurutãne rokene.
21Morarame imepỹ tutuisarykõ konõto se toto exiryke, Sauru tokarose Ritonõpo a toto tuisaryme. Kixi mũkuru mokyro, Pẽxamĩ pary. (Mokyro tuisame kynexine okynano. 40me ikonopory taropose eya.)
22Morotoino mokyro tymyakãmase Ritonõpo a Tawi ke. Ynara tykase Ritonõpo Tawi poko, “Tawi kure mana, Jese mũkuru. Yzamaro mana jomipona exiryke,” tykase Ritonõpo Tawi poko. Mame ynara tykase roropa ynororo Tawi a,
23“Izyraeu tõ poko enupunaketyme apary rĩko ase. Iirypyrykõ poe toto anỹneme,” tykase Ritonõpo Tawi a. Morotoino Tawi paryme Jezu tonuruse rahkene. Izyraeu tõ pynanohneme tyrise ynororo rahkene tõmihpyryae ro.
24Yrome Jezu oehsasaka ahtao, João ahno ẽpurihkane osemazuhme tooehse Izyraeu tõ zuruse, “Oorypyrykõ irumekatoko Ritonõpo omipona oehtohkõme. Oorypyrykõ rumekary se awahtao xine oẽpurihkatorỹko ase,” tykase João eya xine.
25Morarame tõturukepyry aka ynara tykase ynororo eya xine, “Ritonõpo mũkurume jekarõko matohu? Ynoro kara ase. Okomino oehnõko mã oneraximarykomo, Ritonõpo mũkuru nymyry, Kuesẽkõ kurano. Imyhtokoxi typorohse jahtao ihxitapãnõko ase tuisa konõtome exiryke, Kuesẽkõme exiryke,” tykase João eya xine, tykase Pauru eya xine.
26—Wekyry tomo, Aparão pakomo, oya xine mã Ritonõpo a tõmiry tonehpose, opynanopyrykõ se toexiry poko. Oya xine rokẽ pyra imehnomo a roropa tõmipona exiketomo a tõmiry tonehpose, tykase Pauru toto a.
27—Yrome Jerusarẽpõkõ Jezu onenetupuhpyra. Tosẽkõ onenetupuhpyra toto Ritonõpo omiry waro pyra toexirykõke. Oserematohae rokẽ Ritonõpo omiry sekeremãko toh repe. Yrome Jezu exixihmary se toehse toto. Tosẽkõme pyra tokarose eya xine. Moro poko Ritonõpo poe urutõkomo a tymerose Jezu orihmapory poko. Yrome onenetupuhpyra toto.
28Kure Jezu exiry waro toh kynexine repe. Yrome tõturuse toto Pirato maro, “Jezu exixihmapoko ajohpãme samo,” tykase toto.
29Morarame Ritonõpo nekarohpyryae ro toxixihmase Jezu eya xine. Morotoino ekepyry touse ropa wewe pokoino, zonẽtohme topu aka.
30Yrome Ritonõpo a tõsemãkase ropa ynororo.
31Tuhke tõmehse Jezu tõsenepory poko tymaro aytotyamo a Jerusarẽ pona Karirea poe. Mame imehnõ tutuarõtanohse roropa mokaro a Jezu poko.
32—Mokaro saaro omi kurã poko ourutorỹko ynanase ipoko, aẽsemãtopõpyry ropa poko.
33Ritonõpo nekarohpyryae ro kytamurukomo a, Jezu ẽsemãse ropa tonepose yna a, tykase Pauru morotõkomo a. —Ynara Saumo poko tymerose Tawi a pake Ritonõpo omiryme, “Umũkuru nymyry mase. Seroae omyme exino,” tykase ynororo. Morara tymerose Tawi a Ritonõpo omiryme Jezu ẽsemamyry ropa poko.
34—Ynara mã tymerose ropa Ritonõpo omiryme Jezu ẽsemãkary ropa poko orihzomopyra aehtohme, “‘Apary rĩko ase tuisame,’ katopõpyryae ro Tawi a, ahno esẽme orĩko ase jũmanatome,” tykase Ritonõpo Tumũkuru a.
35Imepỹ Saumo poko Tawi ynara tykase, “Omũkuru ekepyry onymotanohpopyra mase,” tykase.
36—Tawi orihpyra ro tahtao Ritonõpo omipona kynexine. Toorihse ahtao ekepyry tonẽse. Ẽsemãpyra ropa tokurehse. Ekepyry tymotase.
37Yrome Jezu tõsemãkase ropa Jumy a. Ekepyry motara tokurehse.
38Wekyry tomo, etatoko ke jotururu. Jezu rokẽ oorypyrykõ korokapõko mã Tumy a, emero.
39Jezu enetuputyryhtao oya xine oesẽkõme okurãkatorỹko Ritonõpo mana. Oorypyrykõ korokãko mana. Moeze nymerohpyry omipona kukuruhtao oya xine oorypyrykõ onykorokara mana.
40Pake Ritonõpo omipona pyra exiketõ toorihse. Naeroro tomeseke ehtoko mokaro sã pyra oehtohkõme. Toto poko ynara tymerose pake Ritonõpo omiry ekaronanomo a,
41“Enetoko ke Ritonõpo kerekeremary se exiketomo. Emynyhmatoko. Orihtoko roropa. Yjamitunuru enepõko ase oya xine. Yrome onenetupuhpyra matose. Yjamitunuru poko ourutorỹko imehnõ mã repe. Yrome onenetupuhpyra matose,” me tymerose Ritonõpo omiryme, tykase Pauru juteu tomo a, toto amorepatoh tao.
42Morarame tutũtase ropa ahtao oturutoh tae toahmase ynororo eya xine zomory auturutohme ropa, —Mo oserematohae yna amorepako ropa onurutopõpyry samo, tykase toto Pauru a.
43Mame aytorykõ ropahtao, Pauru tõ tokahmase jekyry tomo a, imehnomo a roropa juteu tõme aehtyamo a. Mokaro turuse Pauru tomo a Panape maro, jũme Ritonõpo omipona toto ehtohme. Tãkye tyripose toto eya xine.
44Morarame imepỹ oserematohae moro patapõkõ emero tõximõse toto Ritonõpo omiry etase.
45Mokaro oepyry eneryke tyya xine Pauru zumoxike juteu tõ toehse. Tykerekeremase ynororo eya xine, typoihtose roropa eya xine imoihmãkõ zururuke eya Ritonõpo poko. —Oenekunohtorỹko rokẽ mana, tykase toto.
46Mame Pauru orẽpyra toehse Panape maro. Ynara tykase ynororo juteu tomo a, —Osemazuhme Ritonõpo omiry ynanekaroase oya xine repe. Yrome aomiry se pyra matose, esaka oytorykõ se pyra oexirykõke. Morara exiryke juteutõkara a aomiry ekarõko ynanase, tykase Pauru eya xine.
47—Ritonõpo yna enehpoase tarona moxiaro amorepase. Ynara nase ynororo yna a, “Aaropotorỹko ase moinõkõ pataka juteutõkara kurãkaneme oehtohkõme ypoetoryme toto ehtohme,” nase Ritonõpo yna a, tykase Pauru eya xine.
48Morara kary etaryke tyya xine tãkye toehse toto, juteutõkara. —Kure mã Ritonõpo omiry yna a, tykase toto. Mame Ritonõpo napoihpyry tomo a Jezu tonetupuhse tosẽkõme. Ipoetoryme toehse toto.
49Mame Ritonõpo omiry tokãtose toto a emero pata tõ poro.
50Yrome Pauru tykerekeremase juteu tomo a typatakã pyxiã netaryme. Morara exiryke typatakamo a Pauru tõ tonyohse ropa moro pata poe Panape maro jetũ ke.

Read Atos 13Atos 13
Compare Atos 13:16-50Atos 13:16-50