Atos 10:6-23

⁶Tosetyae exikety maro reh mahna, okyno pihpyry rine mahro. Itapyĩ mã tuna ehpio. Ãmorepãko mã mokyro Ritonõpo omiry poko zuaro oehtohme, tykase Ritonõpo nenyokyhpyry Koneriu a.

⁷Morarame tymaro auturuhpyry toytose ropa ahtao, tynamoto tonehpose tyya, oseruao soutatu maro, toto a tõturutohme.

⁸Mame tõsenehtopõpyry poko toto zuruxĩpo, tonyohse toto Jope pona.

⁹Yrokokoro Koneriu poetory moe pyra Jope poko toehse toto ahtao, Peturu tõnuhse tapyi mypatarãnaka, tõturutohme Ritonõpo a, tãxiahtao toehse ahtao.

¹⁰Morarame Peturu tomitapãse. Tõtukuru se repe. Yrome tõsẽ atahnopyra ro ahtao tõsenehse ynororo Ritonõpo poko.

¹¹Kapu atapiakary tonese eya. Otuato konõto panõ tyhtose eary poko Peturu myhtokoxi.

¹²Moro tapo onokyro panõ tonese eya, nono po ro ytoketomo, torõ tõ roropa.

¹³Morarame ynara tykase Ritonõpo, —Mokaro etapako õtyme, tykase Peturu a.

¹⁴—Onetapara ase. Moinoro ase tõsẽ rypyry onõpyra ypoetoae ro, tykase Peturu eya.

¹⁵Morarame sekere tykazomose inetaryme, —Õtyme ynekarohpyry poko, “Tõsẽ rypyryme nase,” kara exiko, tykase.

¹⁶Mame tõnuhse ropa otuato panono. Morarame tyhtozomose osemazuhme ayhtohpyry saaro. Mame tõnuhse ropa rahkene, jũme, kapu aka.

¹⁷Morarame Peturu toepohnohse tynenehpyry poko. Aemynyhmary rohtao Koneriu nenyohtyã toeporehkase toto. —Otokohko Ximão tapyĩ nae? tykase toto osemataõkomo a. —Seny, tykase toto.

¹⁸—Taroh Ximão Peturu nahe? tykase toto tõturupose.

¹⁹Morarame toepohnopyryhtao ro Ritonõpo zuzenu omiry totase Peturu a, —Etako pahne, ahno mokaro oupĩko.

²⁰Oyhtoko. Enaromyra exiko. Toto maro ytokose. Ynenehpotyã mokaro, tykase Ritonõpo zuzenu eya.

²¹Morara kary etaryke tyya Peturu tyhtose ropa zara tae Koneriu nenyohtyã omikase. —Taro ase. Oty kase moehtou? tykase Peturu eya xine.

²²Morarame tõturuse toh eya. Ynara tykase toto, —Koneriu yna enehpoase tarona, tykase toto. —Kure ynororo, Ritonõpo omipona exikety. Emero juteu tõ, “Kure mana,” ãko roropa ipoko toh mana. Ritonõpo nenyokyhpyry kapu ae imaro tõturuse, itapyĩ taka oytotohme, imaro õturutohme, tykase toto Peturu a.

²³—Omõtoko tapyi taka, tykase Peturu eya xine. Mame moro tao tynyhse toto. Yrokokoro toto maro Peturu toytose imehnõ Jezu poetory tõ maro, Jopepõkõ maro.