Aten gagalowa 2:10-23

¹⁰Nitu uduudu ewamodina dewamopina os menanedio ita dewamodine, nitu sa uduudu dewamodina nuaeuneapona baiwa ita rua nuaeuneiena. Ne nolana sa nuaeuneiena, sa ipa ne nolana sa dewamodina malesawa wadana.

¹¹Tane ne nola sa pokawau dewamona insaisawantedine, atentena nola sa ipa ipasiawaia diapana, lanunu tanone wadasusana rua. Ita nolana sa mai ipawa da euda tawo emauwo donsape wadapa, dia.

¹²Ne aten insaisawa euda, ita oo insaisawa ita do insakadisa insaisau wadedine. Apana mida ne aupana wadepie warerelepia, me mai nitu da sanaa dewasapi, dia.

¹³Tane ne ewane atenten aten insaisawa wadee manawosaa ipa euda, tane insakadisa wadee manawosaa sa ipa dewa kadiwa. Sapa ewaewa ipa euda mai dubawa rua.

¹⁴Insadewasa apanawa sala ewedidewae aleide, tane insakadisala me ipa dubawa bedewainta aleide. Tane ne ewane atenten, mo nata ando ompa osowe deawaa donsapu.

¹⁵Ita ne neba wane wanaase, “Dima ne ompa osowe donsapa deawaida insakadisa apanawa donsapi. Tauma dima euda ne aten insaisawa euda bedewe donsane wadana? Ema do ipa ipasiawaia.”

¹⁶Mai mida da ando insadewasala ba insakadisala insamopie umanau wapi, dia. Apana insadewasala ita insakadisala bo deawa bontopu.

¹⁷Nitu uduudu tawo ema osowe wainite dewasaitana sa ipa sai wadeite osombo ituitana. Sa baiwa ina tawo ema osowe wainitana ne dabuasadina. Ema uduudu ipa ipasiawaia lanunu tanone wadasusana rua.

¹⁸Ne nolana uduudu dewamodina epe bonteapo aupanawo apana da wadepi, sa baiwa ne nola tawo ema osowe etedabuantedina.

¹⁹Tane mida atenlen apana sa ne aupanawo nitu sa uduudu nolawantene pokanena bopawa wadepia me ipa insadewasa apanawa ba, dia? Tane dewa ema uduudu ipa ipasiawaia.

²⁰Sa baiwa ne nolana pokawaa tawo ema osowe dewamodina insaisawantedine nuana pareidalen.

²¹Naita apana insaisa euda, aten ita nitu dewawa atemba apanawa nolalempe nitu uduudu ipawa segantopuo, tane emopio aupe apana da mai nolalepona di bopawa otamopi. Ema do ipa ipasiawaia mai dodomana.

²²Nitu dainea euda apana tawo ema osowe nolawa pokamodia bedewe donsapue wadapu?

²³Mo walama uduudu nolau bedewe poka ita nuapare wadeie mamposai do tadino mai itudewantoipe insaisau bubuasaipona, dia. Ema do ipa ipasiawaia.