Aten gagalowa 12:2-11

²Mida e dewaena insena ipawa ando omo, uaboa ita kipora dubantopuo mai sala ewaadewaitaa, ita unu wapia baiwa giou dubaleidia mai punwapie dialepi, dia.

³Mida e dewaena insena e witaa tauma mukamukaua wineie oniaeia ando oauarantopue uwauwantopu, ita waa tauma mukamukaua wineia ando oauarantopu. Mida e dewaena insena ando e moaa nepa nonosintopuo nana mai naadewaitaa, ita e emaa sala mai ewepidewalepi.

⁴Mida e dewaena insena ando asia potalepio aia mai etadewaitaa, e nana laulantompa ba sino epompa moinawa mai etaa. Tane nene aiawa e wadamesaepi.

⁵Mida e dewaena insena ando e sala awoia awa inguguraitone saitona kadi donsaa sawa, ita e uwaa lagunalepie sapa wapi, e kapoi rua mamoo teteite aitaa, ita e eba mai aitaa rua, dia. Ita nitu daitada nuaeubu manawo dialepi. Mida e dewaena insena ando apana uduudu bontompe bubua bolawe antompa, ita apana into ke wampe leumpa.

⁶Mida e dewaena insena ando ia kampa idia, ipituwapi ita isana obasalepi do ando sala pola wadia obasalepi, ita ando nene mabupa imba empio rowolepie alepi.

⁷No bontato etemba leulepie dogo popokauwa wanalepi, ita aleumba leulepie God mida dewasana mampe alepi.

⁸Sa baiwa Waeuwa Apanawa wadiase, “Nitu uduudu ipa diapanau, diapanauida ipusiawaia.”

⁹Waeuwa Apanawa insadewasala ita me apana aten umanawa waeuwamodie. Me aten waeuwa tontawa deaitopa insadewasamodie ita ulaipa mampe empuempumodie intaweintawe girumamodio wineie.

¹⁰Waeuwa Apanawa aia dainea dodomana mampelepio girumamopia ita rua dima girumamona ipa ulaipa.

¹¹Insadewasala apanawa waeuwa ipa gamo onioniala koinawa moamoaua wadedie sipsipwa bodamodio adewantoia rua. Me aiawa ipa tutu moamoaua ia bedewe epeio aidaleidia rua. Aia sa ipa God me mida no uduudu onianedia mampee wisen.