'At 5:18-36

¹⁸tu' xat, pu Yeyox yõg mõ'pok xop mũy, tu kõmẽn yõg kanet ha mõ'tat, tu' xex.

¹⁹Pa 'ãmnĩy koxtap 'ĩhã pexkox yõg nũ'kutnã'ax nũn, tu hãmyĩnnĩn'ax xõn, tu tik xop mõy kanet kopah, tu hãptopa' mõgãhã', tu' xat, hu:

²⁰—Mõg, mõg, Topa pet xexka ha mõg, nũy Yeyox 'ãktux, nõm te tikmũ'ũn xop xohix hĩnnã'ax. Kaxĩy.

²¹Ha hãm'ãpak, tu' mõg, tu mãyõn xupep 'ĩhã tikmũ'ũn yũmmũgãhã Topa pet xexka kopah. Ha ta tik te 'ãmãnex xop xat'ax nũn, xi' yõg xop xohix, tu Yoneo xexka xop xohix xãnãhã', pu yãy tu nũnnãy, ha' xat, hu: —'Ãpu, kanet tu nũnnãy Yeyox yõg mõ'pok xop. Kaxĩy.

²²Ha xonat xop mõg kanet hah, tu' xak, pãyã 'ap ti'ah, yĩy putpu' nũn, tu' xexka xop pu' xuktux,

²³hu: —Pipkup ka'ok hã mõ'yĩnnĩn, ha' xõn ha' xĩy 'ohnãg, ha xonat xop te hãmyĩnnĩn'ax yĩka' pip, nũy pẽnã', hak mũ'ãte kanet yõg hãmyĩnnĩn'ax xõn, pãyã 'ap tik 'ũm xip'ah kanet kopah. Kaxĩy.

²⁴Ha Topa pet xonat xop yõg kapitãm te' xupak, xix 'ãmãnex xexka xop te' xupak kamah, tu: —'Ĩhok, pute 'ũm? Kaxĩy.

²⁵Ha tik 'ũm nũn, tu: —Hõmã 'ãxop te tik tigãhã kanet kopah, yã hõnhã Topa pet xexka tu' pip, tu tikmũ'ũn yũmmũgãhã'. Kaxĩy.

²⁶Ha xonat xop te tikmũ'ũn yĩpkutuk, tu hãmpe'paxex, hu “Pe yã 'ã mĩkaxxap tux!” kaxĩy. Hu mõ'pok xop xũygã 'ohnãg, pãyã' mũg, tu' nũnnãhã',

²⁷tu' xexka xop keppa' xex, ha tik te 'ãmãnex xop xat'ax te' yĩkopit, hu:

²⁸—'Ok 'ãyĩpkox hok? Hõmãg mũ'ãte xa' xat, hu: “'Ãyĩy hok, Yeyox 'ãxet'ax hã yũmmũgã hok!” kaxĩy. Pa 'ãxop te tikmũ'ũn xohix yũmmũgãhã Yenoyanẽn kopah, nũy 'ũgmũg kupex Yeyox xok'ax hah, pu tikmũ'ũn 'ũgmũg 'ãktux kummuk. Kaxĩy.

²⁹Pa Pet xix mõ'pok xop te hãm'ãktux hã' nõy yãnãn, tu: —'Ũgmũ'ãte Topa yĩy'ax 'ãpak, tu Topa puk yĩpkox pip hãmãxap, tuk-nãy tu tikmũ'ũn puk mũg yĩpkox pip.

³⁰'Ãxop te Yeyox putex mĩpkupnix tu', pipkup hã' xup mĩpkupnix tu', nũy tup-tex, ha mõnãyxop yõg Topa te' putpu' hĩnnãhã',

³¹tu' xexkanãhã yãy yĩpxe'e hã', nũy hãpkummuk mĩy'ax xaxogã', pu tu' kux.

³²'Ũgmũ'ãte' pẽnãhã', xix Topa Koxuk te' pẽnãhã', tu hãm'ãpak, tu xe hãm'ãktux, ha Topa te yãy Koxuk Xe'ẽgnãg nũ'kutnãhã tikmũ'ũn hah, nõm xop kuxa mãm ka'ok xop ha nũ'kutnãhã'. Kaxĩy.

³³Ha' xupak, tu' gãynãm, tu' kix putup,

³⁴pa Paniye xop yõg tik xip, 'ũxuxet'ax Gãmãniet. 'Õhõm tik te hãmyũmmũg xexka', tu Topa yõg xat'ax yũmmũgãhã', ha tikmũ'ũn xohix tep-tup pax. Hak-nĩhã' xip, tu' xat, hu: —'Ãpu, tik xop hãptopa mõgã'. Kaxĩy. Ha' mõgãhã Yeyox yõg mõ'pok xop.

³⁵Ha Gãmãniet te' xexka xop pu hãm'ãktux, hu: —'Iyaet yõg tik xop, 'õg pa mõxip, xayĩy 'ãmpe'ãpaxeh, nũy hãpkummuk 'ũm mĩy hok.

³⁶Hõmã Teot te tikmũ'ũn xat putup, tu tik xop te 400 mõgãhã', hap-tex, ha nõm xop te' pe' mõg te' xaxok, ha' kux.