'At 15:1-13

¹Hãpxip kutõgnãg 'ĩhã Yonex yõg tikmũ'ũn nũn, tu nũktu mõxaha 'Ãtikit tu', tu' nõy xop yũmmũgãhã', hu: —'Ãxop yã puknõg. 'Ãpu, tik xop nãg xax mep 'ũyĩmap, puyĩy Topa 'ãxop kuxa kummuk xit, nũy 'ãkuxa max tat 'ũyãnãn tu'. Mõyyex yõg xat'ax hittap te 'ãxat, yĩy hõmã xix hõnhã, hãmyãxatamuk xohix punethok hã, Yoneo tik xop xohix te' mĩy, yã kakxop pit 'ĩhã' mĩy. Kaxĩy.

²Pa Paot xix Maname te: —Kaxĩy hok! 'Ãmhok! Topa te' puknõg xop xat 'ohnãg, pu yãy xax xak. Kaxĩy. Tu hãm'ãktux hã' nõy yãnãn nãm punethok, ha' kuxa mãm ka'ok xop te Paot xix Maname yĩmõgatux, tu mõ'pok, xix 'Ãtikit yõg nõy xop mõ'pok, pu' mõg Yenoyanẽn tu', nũy Yeyox yõg tik xop yĩkopit, xix tik pẽnã max xop yĩkopit.

³Tu ta' mõg, Penix kotit hã' mõg, xix Xãmãnit kotit hã' mõg, tu' puknõg xop te Topa ha' mõg 'ãktux, ha' kuxa mãm xop xohix hittup xexka'.

⁴Ha mõktu mõxaha Yeyoyanẽn tu', ha' kuxa mãm ka'ok xop hittup xexka kamah, xix Yeyox yõg mõ'pok xop, xix tik pẽnã max xop, ha Paot te Topa yõg hãpxopmã'ax 'ãktux, Topa te hãpxopmã Paot hã, xix Maname hã, yĩ' xuktux.

⁵Pa Paniye yõg kuxa mãm ka'ok xop tek-nĩhã' pip, tu: —Topa te' xat, pu tik xop nãg xax yĩmap mep. 'Ãpu, hãmpuknõg yõg tik xop xax mep kutõgnãg, nõm xop kuxa mãm ka'ok Yeyox kopah, puyĩy Mõyyex yõg xat'ax hittap xohix pu' yĩpkox pi'. Kaxĩy.

⁶Ha mõ'pok xop, xix tik pẽnã max xop nũn, tu nũktu nũ'nãhã', nũy hãmpe tu pãnõm.

⁷Tu hãm'ãktux hã' nõy yãnãn nãm, ha Pet tek-nĩhã' xip, tu: —'Ũkxape xop: Hõmã Topa tek yãykutnãhã 'ãxop kopah, 'ãxop te' yũmmũg, ha mõgkutnãhã', 'ũ hãm'ãpak max'ax 'ãktux hãmpuknõg xop pu', ha' puknõg xop te hãm'ãpak, tu' yĩpkox pip, tu' kuxa mãm ka'ok Yeyox kopah.

⁸Topa te tikmũ'ũn xop kuxa yũmmũg, tu Topa Koxuk nũ'kutnãhã' puknõg xop hah, 'ũgmũg putuk,

⁹ha' puknõg xop te Yoneo yõg tikmũ'ũn mũtik yãy putuk Topa pu', tu' kuxa mãm ka'ok Yeyox kopah, ha Topa te' yõg hãpkummuk mĩy'ax xaxogãhã', pu tu' kux.

¹⁰Tep tu 'ãkuxa mãm 'ohnãg Topa yõg hãpxopmã'ax kopah? Mõyyex yõg xat'ax xohix tox xexka', yũmũg'ãte yãy yũmmũgã hok, 'ap mĩy yũmmũg'ah, xix mõnãyxop te' mĩy hok kamah. Tep tu 'ãxop te' puknõg xop xat, 'ĩhãg mũ'ãte Mõyyex yõg xat'ax xohix mĩy hok? 'Ap max'ah nũhu'.

¹¹Pãyã yũmũg xuxyã Yeyox te' hok hã hãmmaxnãhã', tu yũmũg kuxa kummuk xit, xi' puknõg xop kuxa kummuk xit kamah, nũy yãnãn tu' kuxa max tat, yã yãy putuk. Yũmũg xuxyã Yeyox te' hok hã' yãnãn, nõm xop kuxa mãm ka'ok nõm kopah. Kaxĩy.

¹²Ha tik xop yĩy 'ohnãg, yĩy Maname yõg hãm'ãktux'ax 'ãpak, xix Paot yõg, ha Topa te hãpxopmã xe'ẽgnãg, puyĩ' puknõg xop pẽnã', ha tik mõ'pok'ax te' xuktux,

¹³tu hãm'ãktux kux, ha Tiak te: —'Ũkxape xop, 'ũg'ãpax: