'At 12:7-24

⁷Hãpxip 'ohnãg 'ĩhã pexkox yõg nũ'kutnã'ax xip, ha kuyãnãm xexka', ha pexkox yõg mõ'kutnã'ax te Pet nuhuk, tu: —'Ũpitnãy, nũy mõg mõ'ka'ok! 'Ãyok, nũy 'ãk-nĩhã xihip! Kaxĩy. Ha pipkup mãg xap 2 te' yĩy yãy ko'a'.

⁸Ha nũ'kutnã'ax te: —'Ãxax mõ'tat, tu 'ãpata xax tat. Kaxĩy. Ha' tat, ha nũ'kutnã'ax te: —Kap mõ'tat tu mõyãy nĩy, tuk pe mõg. Kaxĩy.

⁹Ha' pe' mõg, pa Pet te hãmpe'paxex, tu yãy koxuk hã' pẽnã'ax pe'paxex.

¹⁰Ha tik te xonat hã' yẽn, tu' mõg, tu xonat nõy hã' yẽn, ha pipkup mõ'yĩnnĩn'ax yãy xõn, ha kõmẽn kotit hã' mõg, ha nũ'kutnã'ax te yãy xaxogãhã'.

¹¹Ha Pet te hãmyũmmũg, 'ap yõtkup'ah, tu: —Topa te pexkox yõg nũ'kutnã'ax nũ'kutnãhã 'ũghah, pu 'Enot yõg kanet kopak xut, ha 'Enot tek xũygãp-tup hok! 'Ap Yoneo yõg tikmũ'ũn tek xok'ax pẽnãp-tup'ah. Kaxĩy.

¹²Tu ta' mõg, tu hãmpe'paxex, tu mõktu xupep Mãnix pet tu', yã Yoãm Mã'ak mũg tut, ha' kuxa mãm ka'ok xop xohix te yãy tu nũ'nãhã', tu Topa pu hãm'ãktux pax, tu Pet pupi hãm'ãktux.

¹³Ha Pet te hãptopa tu' xãnãhã', hu: —Hãpxõn! Kaxĩy. Ha kakxop hex 'ãxet'ax Hone nũn,

¹⁴tu Pet yĩy'ax yũmmũg, tu' kuxa hittup xexka', hu' mõg mõ'ka'ok 'ũxape xop tu', tu: Ya' xip Pet! Kaxĩy.

¹⁵Ha' kuxa mãm ka'ok xop te: —'Ãp-tox kummuk! 'Ap hamũn'ah! Kaxĩy. Pa Hone te: —Hamũn! 'Ãte' yĩy'ax 'ãpak! Kaxĩy. Tu xe' xuktux, ha' xape xop te: —'Õhõm yã pexkox yõg nũ'kutnã'ax, nõm te Pet pẽnã max. Kaxĩy.

¹⁶Pãyã Pet te: —Hãpxõn, hãpxõn! Kaxĩy. Tu xe: —Hãpxõn! Kaxĩy. Ha hãpxõn, tu' pẽnãhã', tu' yẽy.

¹⁷Ha Pet te' yĩm nuhuk, tu: —'Ãyĩy hok, pu xonat xop nũn hok. Kaxĩy. Tu hãm'ãktux pu'uk, hu: —Topa te hãpxopmã max, puk mũn xut. Mõg, Tiak pu hãm'ãktux, nũy kanet kopak xut 'ãktux 'ũxape xop pu'. Kaxĩy. Tu' mõg, tu mõktu xupaha'.

¹⁸Ha hãptup ha ta xonat xop te Pet xak kanet kopah, pãyã 'ap xip'ah, ha xonat xop kuxãnõg, tu: —Pi'yã' xip Pet? Kaxĩy.

¹⁹Ha 'Enot te' xat, pu tu Pet xax, ha' xak, pãyã 'a' pẽnã'ah, yĩy 'Enot gãy xexka', tu xonat xop mũg, tu' yĩkopit, tu' kix kakixnãg, ha' xakix. Ha 'Enot mõg, tu ta' mõg tu mõktu Xeyanet tu', tu 'ãmnĩy xohix hã' nox xip.

²⁰Tu ta tu' gãy Tinok yõg tikmũ'ũn tu', xix Xinõm yõg tikmũ'ũn tu', hu 'ap hãpxop mõgãp-tup'ah. Ha nõm tikmũ'ũn kuxãnõg, tu' gãy kux xak, pu 'Enot te hãpxop xe mõgã'. Ha yãy tu nũ'nãhã' 'Enot pet xexka kopah, tu 'Enot yõg kãmãnat Manax yũmmũgãhã', pu 'Enot pu nõm tikmũ'ũn pupi hãm'ãktux.

²¹Hãptup nõy 'ĩhã 'Enot te tik te' xat'ax yõg topixxax max mõ'tat, tu' xat'ax yõg mĩmpe' yũm'ax yĩmũ' yũm, nũy tu tikmũ'ũn xat, tu hãm'ãktux tox, tu hãm'ãktux kux,

²²ha tikmũ'ũn yĩy ka'ok, tu: —Topahnãg 'ũm yĩy'ax putuk, 'ap tik yĩy'ah. Kaxĩy.

²³Ha hãpxip 'ohnãg 'ĩhã pexkox yõg nũ'kutnã'ax te 'Enot kix, tu' pakutnãhã', ha puxõ'õy te' mãhã', ha' xok, Topa 'ãktux max 'ohnãg tu'.

²⁴Ha' kuxa mãm ka'ok xop mõg hãptox tu', tu Yeyox yõg hãm'ãpak max'ax 'ãktux, ha tikmũ'ũn punethok kuxa mãm ka'ok Yeyox Kunnix kopah.