'At 10:6-23

⁶ha Xĩmãm nõy pet tu' xip, nõm Xĩmãm nõy te xokxax hã' hãm, tu' xut, tu' hĩy, tu' xup, ha' nak, ha Xĩmãm pet te kõnãg xexka kux tu' yũm. Kaxĩy.

⁷Tu' mõg, pexkox yõg nũ'kutnã'ax mõg, ha Kohnẽn te' yõg kãmãnat 2 mõ'pok, xix xonat xe'ep-xet mõ'kutnãhã', ha xonat te Topa xak kamah.

⁸Ha Kohnẽn te mõ'pok xop pu hãmyũmmũgãhã', tu tu pexkox yõg nũ'kutnã'ax te hãm'ãktux 'ãktux, tu Yop tu mõ'pok.

⁹Ha hãptup ha ta' mõg, tu mõktu mõxaha kõmẽn Yop tu', 'ĩhã Pet te mãyõn te yãy kote' yũm 'ĩhã pepi' mõg, tu mĩptut xanep yĩmũ' yũm, nũy Topa pu hãm'ãktux.

¹⁰'Ũp-tup tep-tex, ha' xit putup, pa' xit'ax puk 'ohnãg, yĩ' hip, tu yãy koxuk hã' pẽnãhã', ha pexkox xõn,

¹¹ha Pet te' pẽnãhã', ha pexkox tu topixxax xexka yĩxohoh, tu' kuxyã hã' hĩy,

¹²tu xokxop kopa' xex, xix putuxnãg, xi' kep hã' mõg xop.

¹³Ha yãnmũn xupep'ax te: —Pet, 'ãyok, nũy kix, nũy mã'! Kaxĩy.

¹⁴Pa Pet te: —'Ak mũn'ah. 'Ãte' mã xet'ah xokxop mã hok xop. Kaxĩy.

¹⁵Ha' yãnmũn xupep'ax te xe': —Topa te nõm putup, yĩ' max. Kaxĩy.

¹⁶Ha' yĩxohoh, tu' nũn tehomip tikoxyuk, ha pexkox tu' mõg, tu yãy xaxogãhã'.

¹⁷Pa Pet te' yẽy, tu: —Topa tep-tep 'ũgyũmmũgãp-tup? Kaxĩy. Tu hãmpe'paxex, 'ĩhã Kohnẽn yõg kãmãnat nũn, tu nũktu mõxaha', tu Xĩmãm pet xak, tu yã' xipi', tu mĩptut yõg mõ'yĩnnĩn'ax tu' tihi',

¹⁸tu' xãnãhã', hu: —'Ok xip Xĩmãm Pet? Kaxĩy.

¹⁹Ha Pet te hãpxopmã'ax pe'paxex, 'ĩhã Topa Koxuk te: —'Ũpẽnã'! Yã tik 3 te 'ãxak.

²⁰'Ãpu, nãhãy, nũy nõm xop mũtik mõg. 'Ãkuxãnõg hok, 'ãte nõm tik nũ'pok 'ãhã. Kaxĩy.

²¹Ha Pet yĩxohoh, tu: —Yãk mũn Xĩmãm Pet. Tep ha 'ãnũn? Kaxĩy.

²²Ha' nõy te: —'Ãhak nũn. Kapitãm Kohnẽn tek mũg nũ'pok, yã' mãx, tu hãmyok mĩy, tu Topa xak, tu' kuxa te' yẽy Topa keppah, ha 'Iyaet yõg tikmũ'ũn xohix te nõm putup pax, ha pexkox yõg nũ'kutnã'ax te' xat, hãk mũg nũ'pok, ha 'ãxãnãhã', pu Kohnẽn pet ha mõg, 'ũyĩy 'ognũ hãm'ãktux'ax 'ũm 'ãpax. Kaxĩy.

²³Ha Pet te tik 3 tu' kax, pu' xit, nũy mõhõn yãy pet kopah. Hãptup ha ta' mõg Kohnẽn yõg tik mũtik, ha' xape xop mõg kamah,