Apozelɨyara 2:20-32

²⁰Nyɨlyai mavuri yojɨ jɨhɨnyai yɨmaꞌnadelyɨ. Lawei wayaaka taweꞌbɨꞌ yɨmaꞌnadelyɨ sagaaꞌ. Kwanganapɨri Naangere dɨragɨnyagaaꞌ naangegaaꞌ yɨmaꞌnadehaakɨ.

²¹Gazaizai gaimwangeꞌna Naangerɨ jaka kadanganori Naangei kavadaihasamaarojɨ Naangerei yɨmaꞌnadelyɨ sahwai.’ Sara dɨnɨkesɨra.

²²Yɨzɨrelɨyareihi yagaala dangɨ kadɨka duꞌnyɨla! Gotɨyai yawɨꞌna ‘Aꞌmwera dara yawɨpɨꞌdeꞌ “O, Gotɨyai Naazaretɨ mwaalyai Jizaazarɨ wɨdasɨwaabɨkei daaka!” ’ Sara yawɨraka gannya dɨragɨnyaꞌ sahwarɨ kujaavaꞌ sai dɨragɨnyajɨ atɨka maruꞌnasaꞌnejɨ wɨjɨwaainyaꞌnejɨ yɨna yaꞌ. Sara yada dava sarɨmɨnyaba yadaasɨyaꞌna sahwaihi mena yawɨꞌmwaasaihɨlyɨ.

²³Kɨgaaꞌ Gotɨyai sɨduꞌnakei dɨragɨnna yawɨraka ‘Aꞌmweraavɨre kayaaꞌnanyanna Nyɨbwaalɨvaangei baladeꞌna wɨdaasɨdeinyɨ.’ Gotɨyai sara dakei Jizaazarɨ kyɨhɨmaaryaꞌ sarɨmɨ ‘Aala!’ dɨna yeva dɨnyɨna ‘Yɨsavɨri Gotɨyare kɨwɨnya maayara sahwarɨ nilɨya tabɨka!’ Dɨnyɨna kyeꞌ Romɨyara sahwarɨ tamaketa sarɨmɨre wawɨnyasɨra.

²⁴Sarɨmɨ sara yesaꞌ kɨrɨꞌ Gotɨyai sarɨ ayɨna yɨdɨkaavaꞌ. Jizaazai yuyagaaꞌ baryai mwari kyadɨkeꞌna gɨleangeba taanga kɨnɨnnakeba padaihasamaaꞌna yaka yɨdɨkaavaꞌ.

²⁵Sareꞌ dareꞌnesɨ. Ne Devitɨ gamɨnyɨna yɨdaꞌnɨka wɨjaaꞌ ‘Yuyagaaꞌ sɨnnyɨmagɨ Naangei mwaaida wangadɨnyainyɨ. Nɨmɨre aangasɨmagɨ mwaaideꞌna lɨka myɨwɨneinyɨ. Sai “Lɨka nyadɨkajɨ,” dɨragɨnyainyɨ nyɨmwaaihɨwaꞌ.

²⁶Savɨna nɨmɨre sɨmunyavɨ yɨlaaya yadɨ Nɨmɨre taalɨsasɨ yɨleyagaainakeinyɨ wɨdadɨnyainyɨ. Nɨmɨre kɨlaakejɨꞌ wakadehaaꞌ Gotɨyarɨ yemwaalɨdezɨkɨ.

²⁷Gɨlaayaraavɨreba nɨmɨre kuryai myagalyaꞌmayɨ jɨtheigɨnyɨ. Jɨwaalɨvaanga tewaanyainyɨre kɨlaakejɨꞌ bwia maburannejɨkɨ.

²⁸Gaalyaburɨne tusanna nawɨꞌnyɨna nyɨjɨwainɨwaana. Nɨmɨnyaba mwaaidɨnyaꞌna yɨlaayabwi dɨnyekuꞌdeinyɨra.’ Ne Devitɨ sara yɨdaꞌnɨkesɨra.

²⁹Nyaꞌmweihi, Ne sɨnnawɨnyai Devitɨmɨna nayaa nebwina yɨhɨthɨma! Devitɨ gamɨnyɨna myɨdayaaꞌ. Aawa, sahwai kabalaꞌ kwakyaaꞌ sai madɨkaayɨ yaaꞌ. Madɨkaayɨ kyaaꞌ dahaasagaaꞌna dava nemɨnyaba gamɨre wakɨnɨkevɨ wangadaanyainera.

³⁰Devitɨ pɨropetɨyai Gotɨyarɨ wɨꞌnawɨjɨwakyaakei mena yawɨryaaꞌ. Gotɨyai Devitɨmɨ yagaala dɨragɨnyaꞌ wɨjaaꞌ ‘Gɨmɨ kingɨyaigɨ maremwaaidɨnyabaaibɨꞌ gɨnnyai aꞌmweraavɨ maremwaaladerɨ wɨmwaaihɨdelyɨ.’

³¹Sarevɨdaaꞌnyɨ yawɨraka dara wanganyaakeꞌ ‘O, Gotɨyai sara yadei daaka!’ Daka Kɨraazɨtɨyai baryai ayɨna dɨkaasaꞌna dɨnɨkesɨ. ‘Gotɨyai gɨlaayaraavɨreba myagalyaꞌmayɨ yakelyɨ. Gamɨre kɨlaaka bwia maburyakelyɨ.’

³²Sara dɨnɨkeꞌna Gotɨyai Jizaazarɨ yɨdɨkaavakelyɨ aꞌmwe dai baryai. Kyɨdɨkaavaꞌ nemɨ yuyaina sahwarɨ tɨnna wanganorɨna yɨhɨzalɨkurakɨvanɨgoinera.