Apostolo 8:1-37

¹Ma Saul i mulaot tana upi na mat. Ta nam ra bung a ngala na milmilikuan i arikai tadav ra lavur ekelesia aro Ierusalem ma dia vana varbaiai vurvurbit ta ra gunagunan Iudaia ma Samaria; ma ra umana apostolo pata.

²A umana tena variru dia punang Stepano, ma dia tangtangie muka.

³Ma Saul i vakavakaina ra tarai na ekelesia, ma i rukruk ta ra lavur pal, ma i al pa ra tarai ma ra vaden, ma i varuk diat ta ra pal na banubat.

⁴Ma diat dia ga varbaiai dia vanavana vurvurbit ma ra varvai na tinata.

⁵Ma Pilipo i vana ura ra pia na pal Samaria, ma i varveai ure Kristo ta diat.

⁶Ma ra lavur kor na tarai ba dia valongore ra tinata Pilipo i tatike, ma dia gire ra umana vakilang i papait ia, dia torom tana ma ra kopono nuknuk i diat.

⁷Tago, a umana tabaran dia irop kan mangoro nina dia ga ovai ta diat, ma dia kukukula mat; ma di valagar ra mangoro dia kakak ma diat bula dia kekebau.

⁸Ma i ngala ra gugu ta nam ra pia na pal.

⁹Ma tika na tutana abara, a iangina Simon, lua i agagar ta nam ra pia na pal, ma i ga vakavakaian ra tarai Samaria, ma i ve diat ba ia ra ngala muka;

¹⁰ma ra tarai vakuku ma ra umana luluai bula, dia vura kapupi ia, ma dia biti ure: Go ra tutana ia ra dekdek kai God, nina di vatang ia ba ra Ngala.

¹¹Ma dia kapupi ia, tago papa amana iat i ga vakavakaian diat ma kana lavur papait.

¹²Ba dia tar kapupi Pilipo ma kana vartovo ure ra lavur bo na varvai ure ra varkurai kai God, ma ure ra iang i Iesu Kristo, a tarai, ma ra vaden bula, di baptaiso diat.

¹³Ma Simon bula i nurnur, ma ba di tar baptaisoa, dir varagur ma Pilipo; ma ba i gire ra lavur vakilang ma ra lavur dekdek na papalum i papait ia, i manga kaian tana.

¹⁴Ba ra umana apostolo nina diat, dia ki Ierusalem, dia valongore ba ra Samaria bula dia tar kapupi ra tinata kai God, dia tulue Petero ma Ioanes tadav diat;

¹⁵ba dir tar vut, dir aring ure diat upi diat a vatur vake ra Takodo na Tulungen;

¹⁶tago pa i ti irop boko taun ta na, di tar baptaiso diat ta ra iang i ra Luluai Iesu.

¹⁷Ma dir palagur diat ma ra lima i dir ma dia vatur vake ra Takodo na Tulungen tana.

¹⁸Ba Simon i gire ba ra ura apostolo dir palagur diat ma ra lima i dir ika, ma di tabar diat ma ra Takodo na Tulungen tana, i kap tar ra mani ta dir,

¹⁹ma i biti: Amur a tul tar go ra dekdek tagu, upi ba ina palagur ta tikai ma ra limagu, na vatur vake ra Takodo na Tulungen tana.

²⁰Ma Petero i biti tana: Amur ma kaum mani amur a virua, tago u nuk ia ba una kul ra vartabar kai God ma ra mani.

²¹Pa kaum ta tiniba ba ta ngungu ta go ra magit; tago pa i dovot ra balam ta ra mata i God.

²²Una nukpuku kan kaum lavur varpiam, ma una aring ra Luluai ba na pun vue bar go ra nuknuk ta ra balam;

²³tago iau gire ba u ki ta ra magit i mapak muka, ma ta ra vinivi kai ra varpiam.

²⁴Ma Simon i tatike bali ia dari: Amur a aring ra Luluai ure iau, upi koko ta tikai ta go ra umana magit, amur tar vatang ia, na tadav iau.

²⁵Ba dir tar varvai, ma dir tar tatike ra tinata kai ra Luluai, dir talil mulai Ierusalem, ma dir varvai vanavana ta ra bo na varvai ta ra mangoro na pia na pal Samaria.

²⁶Ma ra angelo kai ra Luluai i tatike tadav Pilipo dari: Una tut, ma una vana uro ra matana taubar tadav ra nga marama Ierusalem ura Gasa; a nga ra pupui.

²⁷Ma i tut, ma i vana ka; ma dir varkuvo ma ra tutana Itiop, a ngala na luluai kai Kandake, a tadar na vavina pire diat a tarai Itiop; i kure kana tabarikik par, ma i ga vana urama Ierusalem upi na lotu ie;

²⁸ma go i talil, ma i kiki ra ul a kiki na vinavana, ma i lukbuk tai Iesaia ra propet.

²⁹Ma ra Tulungen i biti tai Pilipo: Una vana maravai pirana, ma una mur go ra kiki na vinavana.

³⁰Ma Pilipo i vutvut tadav ia, ma i valongore ba i lukbuk tai Iesaia ra propet, ma i tir ia: Dave, u nunure nam u lukluk ia?

³¹Ma i biti: Ina nunure davatane, ona pa ta i tovo iau tana? Ma i ting pa Pilipo ba na koa ma na ki pirana.

³²Ma ra pakana Buk Tabu i lukluk ia, go dari: “Di ga ben ia da ra sip tadav ra vardodoko; Ma da ra nat na sip i tur mut pire ra tena varkukut, Damana ia bula pa i tata;

³³Ba i ga malari pa di ga kure vadovot pa ia; To ia na varveai ta ra taraina; Tago di tak vue kana nilaun kan ra rakarakan a gunagunan.”

³⁴Ma ra luluai i biti tai Pilipo: Iau tir iu, ba ra propet i tatike ra dari ure to ia? Ure ia mulai, ba ure ta ra tikai?

³⁵Ma Pilipo i tata, ma i tur pa ia ta nam ra pakana Buk Tabu, ma i varvai. pirana ure Iesu.

³⁶Ba dir vanavana na nga, dir tadav tika na tava, ma ra luluai i biti: Gire, a tava go kari, ava i tur bat iau upi koko da baptaiso iau?

³⁷Ma Pilipo i biti: Ona u nurnur ma ra balam parika, i tale. Ma i balbali: Iau nurnur ba Iesu Kristo ia ra Natu i God.