Apostolo 7:25-37

²⁵Mose geboc lasitêwai sêjala Anôtô gebe ênam êsêac kêsi ya ey lêma, mago nêŋ kauc kêsa su atom.

²⁶Ŋabêbêc lau ŋagêdô sêsôm tauŋ sêmoa e eŋ gêlic, tec gê wama êsêac ma kêsôm gebe ‘Lauac, amac lau ŋam tageŋ. Amboac ondoc tec abe aŋgôm taôm kwalec nec.’

²⁷Ma ŋac-kisa-môkêwaga tonaŋ kêtiŋ eŋ ma kêsôm gebe ‘Asa kêkêŋ aôm kôtu aêacma gôliŋwaga to mêtôcwaga.

²⁸Oc gobe ônac aê êndu amboac nôgeŋ gôjac Aiguptu tau naŋ me.’

²⁹Tec Mose gêc su kêtu biŋ tonaŋŋa jakêtu ŋac jaba gêŋgôŋ nom Midian e kêka ŋapalê luagêc lasê aŋga tonaŋ.

³⁰“Jala 40 gêjaŋa gêwiŋ, go aŋela teŋ geoc tau lasê gêdêŋ eŋ aŋga gamêŋ sawa lôc Sinaiŋa, kêsêp ja ŋawaô, taŋ kêsa gamêŋdani naŋ ŋalêlôm.

³¹Mose gêlic gêŋ tonaŋ e gêŋac lêma ma kêtu gasuc gêja gebe êlic gêŋ tau ŋam acgom. Tec Apômtaunê awa teŋ kêsa gebe

³²‘Tamaminêŋ Anôtô, Abraham agêc Isak ma Jakob nêŋ Anôtô aê.’ Tec Mose kêtênêp ma kêtêc tau e gebe êlic gêŋ tau ŋam atom.

³³Go Apômtau kêsôm gêdêŋ eŋ gebe ‘Ôŋgamboac atapa su aŋga amkaiŋ gebe gamêŋ, taŋ kôkô naŋ, gamêŋ dabu ŋ.

³⁴Aê galic sejoŋ ŋoc lau aŋga Aiguptu e sêmoa jageo, ma gaŋô nêŋ taŋi, tec kasêp gamêŋ gebe janam êsêac kêsi. Amboac tonaŋ ômôêŋ, aê gabe jasakiŋ aôm êna Aiguptu.’

³⁵“Mose tau, taŋ êsêac sêsa eŋ auc ma sêsôm gebe ‘Asa kêkêŋ aôm kôtu gôliŋwaga to mêtôcwaga naŋ,’ tec Anôtô kêsakiŋ eŋ kêtu gôliŋwaga to kêsiwaga. Eŋ kêkêŋ aŋela geoc tau lasê gêdêŋ Mose aŋga gamêŋdani gebe êpuc eŋ tôŋ.

³⁶Ŋac tonaŋ kejoŋ êsêac sa ma gêgôm gêŋsêga to gêŋtalô aŋga gamêŋ Aiguptu to aŋga Gwêckoc ma gamêŋ sawa kêtôm jala 40.

³⁷Mose tau tec kêsôm gêdêŋ Israelwaga gebe ‘Anôtô oc êŋu amacnêm propete teŋ sa aŋga lasimi to tewemi nêŋ êtôm aê.’