Text copied!
CopyCompare
BIBOLO DABUŊ - Apostolo - Apostolo 7

Apostolo 7:2-26

Help us?
Click on verse(s) to share them!
2Tec Stepan kêsôm gebe “O tamocac to ŋoc lasitêwaac, aŋ ŋoc biŋ acgom. Gêmuŋgeŋ aêac abeŋi Abraham gêŋgôŋ Haran atomgeŋ, gêmoa Mesopotamiageŋ e ŋawasi ŋatau Anôtô geoc tau lasê
3ma kêsôm gêdêŋ eŋ gebe ‘Ondec nêm gamêŋ ênêc to nêm lau sêmoa ma ôna ôŋgôŋ gamêŋ, taŋ aê oc jatôc êndêŋ aôm naŋ.’
4Tec eŋ gedec Kaldeanêŋ gamêŋ gêcŋa ma gêdi mêŋgêŋgôŋ Haran. Gêmoa e tama gêmac êndu acgom, go Anôtô gêwê eŋ aŋga tonaŋ mêŋgelom gamêŋ tau tec galoc êmac aŋgôŋ nec.
5Gêdêŋ tonaŋ ênê ŋapalê masi, ma Anôtô kêkêŋ eŋ gêwê kaiŋ gamêŋ ŋagec atomanô, mago Anôtô gêjac matageŋ gedeŋ eŋ gebe êkêŋ gamêŋ tonec êndêŋ eŋ to nê wakuc, taŋ sêjô eŋ su naŋ.
6Ma Anôtônê biŋ amboac tonec gebe ‘Nêm wakuc oc têtu lau jaba sêmoa lau teŋ nêŋ gamêŋ, ma malacm oc sêkôniŋ esêac têtu nêŋ gêŋôma to sejoŋ êsêac êtôm jala 400.’
7Ma Anôtô kêsôm gêwiŋ gebe ‘Lau tau, taŋ sêkôniŋ êsêac têtu nêŋ gêŋôma naŋ, aê oc jamêtôc êsêac. Tonaŋ su, go êsêac sêc sêmu mêŋsênam sakiŋ aê aŋga gamêŋ tau tonec.’
8Go Anôtô kêmoatiŋ poac sêsa ŋapalêŋa gêdêŋ Abraham gêwiŋ, tec kêka Isak lasê ma kêsa eŋ gêdêŋ ŋabêc kêtu 8, ma Isak gêgôm gêdêŋ Jakob, ma Jakob gêgôm gêdêŋ aêac abeŋi 12 amboac tonaŋgeŋ.’
9“Aêac abeŋi têntac sec gêdêŋ Josep e sêkêŋ eŋ gêdêŋ lau sêjam ôli eŋ ma sêkôc eŋ sêja Aiguptu, mago Anôtô gêwiŋ eŋ.
10Tec kêjaŋgo eŋ su aŋga nê ŋandaŋ samob to kêkêŋ moasiŋ ma kauc mêtêŋa gêdêŋ eŋ kêkô kiŋ Aiguptuŋa, Parao, laŋônêm. Ma Parao kêkêŋ eŋ gêjam gôliŋ Aiguptu to ênê gôlôac samob.
11Tôbôm kêsa Aiguptu to Kanaan ŋagamêŋ samob e sêŋgôŋ jageo ŋanô ma tameŋi têtap nêŋ gêŋ sêniŋŋa sa atom.
12Jakob gêŋô polom gêc Aiguptu ŋawae, tec kêsakiŋ tameŋi sêsêp sêja kêtu ŋamata.
13Sêmoa e sêsêp sêja kêtu luagêcŋa naŋ, tec Josep gêwa tau sa gêdêŋ têwai ma Parao gêŋô Josep tau nê gôlôac ŋam.
14Go Josep kêkêŋ biŋ gêja ma kêkalem tama Jakob to nê gôlôac samob sêja. Ma lau tau têtôm 75.
15Jakob tau kêsêp gêja e gêmac êndu aŋga Aiguptu, ma tameŋi amboac tonaŋ.
16Go sêkôc êsêac sêja Sikem ma sêsuŋ êsêac sêc sêô, taŋ Abraham gêjam ôli ŋa silber toŋ teŋ gêdêŋ Hamor latui aŋga Sikem naŋ.
17“Ŋanoc sêwi gamêŋ tau siŋŋa, taŋ Anôtô gêjac mata gêdêŋ Abraham naŋ, kêdabiŋ gebe êmbacnê, ma lau têtu taêsam e sêjam Aiguptu auc.
18Sêmoa e kiŋ wakuc teŋ, taŋ gêjam kauc Josep naŋ, gêjam gôliŋ Aiguptu.
19Ŋac tonaŋ kêsau kêtim aêacnêŋ lau ma gejoŋ tameŋi ma kêkac êsêac gebe sêwi nêŋ gêŋ dedec siŋ paliŋ-paliŋgeŋ gebe sêmoa mateŋ jali atom.
20Gêdêŋ ŋasawa tonaŋ Mose têna kêkôc eŋ, ma Anôtô gêlic eŋ ŋajam, tec agêc sêlôm eŋ sêmoa nêŋ andulêlôm e ajôŋ têlêac.
21Go sêwi eŋ siŋ paliŋ-paliŋgeŋ e Parao latuo kêkôc eŋ sa jagêlôm eŋ kêtôm latu teŋ.
22Ma têdôŋ Aiguptunêŋ mêtê samob gêdêŋ Mose, gêmoa e kêtu ŋac ŋajaŋa biŋ to kômŋa.
23“Ŋac tau gêmoa e nê jala kêtu 40 su, go taê gêjam gebe ênac lasitêwai Israelŋa kêsi.
24Gêlic ŋac teŋ kêlêsu ŋac Israelŋa teŋ, tec gêjam Israel tonaŋ kêsi ma gêjac ŋac Aiguptuŋa naŋ êndu kêtu kêlêsu ŋac tonaŋŋa.
25Mose geboc lasitêwai sêjala Anôtô gebe ênam êsêac kêsi ya ey lêma, mago nêŋ kauc kêsa su atom.
26Ŋabêbêc lau ŋagêdô sêsôm tauŋ sêmoa e eŋ gêlic, tec gê wama êsêac ma kêsôm gebe ‘Lauac, amac lau ŋam tageŋ. Amboac ondoc tec abe aŋgôm taôm kwalec nec.’

Read Apostolo 7Apostolo 7
Compare Apostolo 7:2-26Apostolo 7:2-26