Apostolo 7:19-38

¹⁹Aniꞌe goro ḡoeꞌa sauꞌa ohonadu, aḡife duḡuru sausauze ruziro, ebu 'Eneze guraḡa mae modoꞌi, zeḡe rudanoga veize!' rae tuḡutuḡuziro.

²⁰Eꞌe zamaḡano Moseꞌa fureraro. Aniꞌe Badiꞌa ubumao ene manoḡa tauḡi. Ebu bato uḡidu aniꞌe Mose ane moga neo ḡubuniro.

²¹Mose ani enoneo ti modirotene, Farao aboḡaniꞌa horone madu, ane ubuga raenaꞌa ḡubune borofiro.

²²Ebu Moseꞌe Izipi azaḡa edeḡa niduꞌa maꞌenaꞌa bororaro, ebu inaraḡeta ḡoerido zu haḡaiḡa haḡaido.

²³Mose ani muriḡa ḡae ḡazaḡa gaubanana (40) reirotene, ane nabuga Isaraela azaḡa ḡiaziꞌ onamihi reiro.

²⁴Aneꞌa ḡiaziꞌ onamiroteꞌe zamaḡano, Izipi vazeḡa ꞌahoganiꞌa Isaraela vazeḡa ꞌahoga sausauneꞌenogano horoniro. Eꞌanoꞌo aniꞌa dananeꞌenaꞌa, eꞌe naeḡa haḡaihi radu Izipi vazeḡa mau runiro.

²⁵Mose ani ꞌahige rae zamariro, nabuga duḡuruꞌe ederiꞌuma, aniꞌe zeḡe danazoga veize Badiꞌaꞌa tuḡuneha. Rehano ze ꞌouge mene zamariro.

²⁶Irarirotene, bare onamiro, ebu Isaraela vazeḡa aheuꞌa utiteꞌenogano horoziro. Ani utizeꞌa hauḡoga veize ꞌahige rae ziro, raenaꞌa, 'Nougaꞌahi ḡa negoḡota sausautiteꞌohe?'

²⁷Rehano nabuga sausauneꞌeteꞌe vazeḡaniꞌa Mose duine vaḡinadu ꞌahige reiro, raenaꞌa, 'Ḡaꞌe iniuꞌa emeḡe zuhiꞌafiꞌuma zu kotafiꞌuma vazeḡano ohoꞌiro? Ḡaꞌa mene zuhiꞌafiꞌuma.

²⁸Ḡaꞌe ohoḡore Izipi vazeḡa mau runateꞌe teige eḡe zuni uḡuhihi raꞌe hehe?'

²⁹Moseꞌa ḡoere eꞌe igirotene, ani Midiana habaꞌa ferau onamiro, ebu ani gariḡa rehano eꞌea radiudo, ebu hahuradu ubuga aheu reiro.

³⁰Muri ḡae ḡazaḡa gaubanana (40) enogano Sinai maḡa uhiḡano haba bohaꞌano butuꞌa duhuru radiuꞌeteꞌe zamaḡanonoꞌo, tuḡure vigaꞌa Mose mazao fureraro.

³¹Mose ani butuꞌa kode duhuruꞌenogano horonirotene, 'ꞌOmoꞌe nagini?' rae zamariro. Ani fairu ḡianoga radu uhiḡa onamirotene, Zuhiꞌa Boro ago igiro.

³²'Eꞌe vouḡaḡo Badiꞌa. Aberahamo, Isako, Iakobo duḡuru Badiꞌa.' Mose ani eꞌe igirotene, rihanadu rereraro, ebu ehamanoga zu mene idararo.

³³Ebu Zuhiꞌa Boroꞌa ninaꞌa, 'Tamaka mae vaḡinoꞌi, mazaḡa ḡaeꞌa edauꞌeteꞌe habaꞌaꞌe zaḡoḡa.

³⁴E hubehune Izipi habaꞌano Isaraela azaḡa sausauzeꞌeteꞌe horozeha, zu ḡaniḡanauꞌeteꞌe egeha. Eꞌanoꞌo aduganonoꞌo mae vaḡizoga veize ovaeha. Izidi ḡaꞌe Izipi habaꞌa bare tuḡuꞌe onamiꞌuma.'

³⁵Mose ꞌadiꞌe Isaraela azaḡaniꞌa heꞌeheꞌeneꞌenaꞌa, ꞌahige niroteꞌe vazeḡa. 'Ḡaꞌe emeḡe zuhiꞌafiꞌuma zu kotafiꞌuma vazeḡano iniuꞌa ohoꞌiro? Ḡaꞌa mene zuhiꞌafiꞌuma.' Rehano Mose aniꞌe Isaraela azaḡa zuhiꞌaziteꞌe zu aduganonoꞌo mae vaḡiziteꞌe veize Badiꞌa aneꞌa tuḡuniro. Aꞌe butuꞌa kode duhuruꞌeteꞌe zamaḡano tuḡure vigaꞌa Mose mazao fureranadu, ḡoere eꞌe haro.

³⁶Ebu Mose ani Isaraela azaḡa Izipi habaꞌanonoꞌo tutuze vaḡiziro. Eꞌe zamaḡano zaguzagaꞌuma haḡaiḡa zu Badiꞌa tahi gigiꞌa haḡaiḡa haḡaido. Ebu Izipi habaꞌano zu Davara Kanaḡa raꞌeteꞌea, ebu haba bohaꞌano muri ḡae ḡazaḡa gaubanana (40) ꞌouge haḡaido.

³⁷Mose ꞌadaꞌa Isaraela azaḡa ꞌahige rae ziro, raenaꞌa, 'Badiꞌaꞌa zae boꞌaḡanonoꞌo peroveta vazeḡa ꞌahoga eḡe heuḡa tuḡuniꞌuma.'

³⁸Mose ani haba bohaꞌano vouḡafe nuꞌonuꞌo zamaḡano radiro. Ebu vouḡafe zu tuḡure viga nemaḡano edaunu. Ebu Sinai maḡano tuḡure vigaꞌa Mose teite ḡoeradu, ḡabone ḡoeꞌa haro, ebu emeḡe mazao zuni riꞌiniro.