Apostolo 5:14-38

¹⁴Ngane e huriki ala kupo hateka ri luhoi torea e Bakovi Dagi, ri dili turane ria.

¹⁵E huriki ri lohoka vona a maka nivakasiri e huriki a apostolo ri rata, lakea ri kaloho valai e huriki ri giloa, ri vakamahita ria na kiri ne ria, a moke ne ria na hare dala. Na tahuna e Petrus i laho polo, ri ngarua a maniruna ge tarui ria.

¹⁶E huriki lobo na maka tanga kiroko tabukoi o Ierusalem ri kaloho valai ne huriki a apostolo e huriki ri giloa, e huriki i dili ne ria a hanitu, lakea ni vakamahuri lobo ria.

¹⁷Pali a prister dagi, turane huriki a tara vona re huriki a Sadusi, i madihi a hatene ria.

¹⁸Ri lakavu e huriki a apostolo, ri ru dili ria na bavi.

¹⁹Pali na rodo a agelo ne Bakovi Dagi i talea a logo na bavi, i tuli tala ria. Lakea i taki ria,

²⁰“Mu vano, mu pesi na roho na Vure, mu vakalongo e huriki na ngava lobo na nimahuri karaba.”

²¹Na tahuna i mavida a more, ri dili na roho na Vure, ri vakatubu ni tovo e huriki. Na tahuna a prister dagi turane huriki a tara vona ri bele, ri gale palupu e huriki a tara na Sanderin ra tara na vaponga ne huriki a Israel. Muri ri rudu e huriki a bolekori, ri lakea na bavi, ri gi tuli valai ne ria e huriki a apostolo ne Kristo.

²²Na tahuna e huriki a tagari ri bele na bavi ta ri gi turari e huriki a apostolo, i uka ma ri matai ria vonga. Lakea ri hamule, ri vakalongo maea:

²³“Mi masia a logo na bavi ni tukari kamumu. E huriki a tagari ri pesi polovavo. Pali na tahuna mi talea a logo, i uka ma mi masia tara bakovi ge made pololilo.”

²⁴Na tahuna a ubu na tagari na roho na Vure, turane huriki a prister dagi ri longoa ngava iea, ri loho lege, e huriki a apostolo ri lokovai? Ri nana rovi lae a ra maki ge bele ngane.

²⁵Muri a bakovi tara i valai, i ta maea, “Longo valai! Re huriki a bakovi mu ru dili na bavi, ngane ri pepesi na roho na Vure, ri tovo e huriki vonga.”

²⁶Muri a ubu i vano turane huriki a tagari vona, ri tuli mule e huriki a apostolo. I uka ma ri turari ria, a vuhuna ri mangenge ne huriki, ma ri gi padimate ria na kedo.

²⁷Ri tuli valai e huriki a apostolo, ri vakapesi ria na matane huriki a tara na vaponga na Sanderin. Lakea a prister dagi i nana ria,

²⁸i ta maea, “Mi vakuku pali mua, nahea mu gu tovo e huriki vona a rana bakovi iea. Pali mu valai, mu tovo e huriki lobo koea o Ierusalem. Pali a maki tara mu ratea, mu ngaru ni vakarare mia vona a nimatena bakovi iea.”

²⁹Pali e Petrus turane huriki a apostolo, ri koli, ri ta maea, “Mi gi longototo kunanea a Vure. I uka ma mi gi longototo e huriki a bakovi!

³⁰Mu paditatea e Isu na kai tavalavala, i mate. Pali a Vure ne huriki a gare ne hita i vakamahuri mulea na matenga.

³¹A Vure i bibi rikea a rana e Isu, i vakamadea na limana kanena, ge muga ne hita, ge korimule hita, ge rata e huriki a Israel ri gi pulo a vilone ria, ge puga a naro hale ne ria.

³²Mia mi masia. A Hanu Kiripiripi tara i masia. A Vure i habi a Hanu Kiripiripi ne huriki ri longototo a nitana.”

³³Na tahuna ri longoa a ngava iea, i madihi a hatene ria, ri ngaru ni rabalaki e huriki a apostolo.

³⁴Pali a Pariseo tara, e huriki lobo ri togoa, a rana e Gamaliel. Ia a mari ni tovo a vinara. I pesi rike, i taki ni gi tono tala taro e huriki a apostolo.

³⁵Muri i taki e huriki a tara na vaponga, i ta maea, “Mua o huriki a bakovi o Israel, mu luhoi kamumu a naro mu ngaru ni rata virihi ne huriki a bakovi nga.

³⁶I uka ma i hosi hateka e Teudas i bele, i takia ta ia a bakovi dagi, lakea e huriki ala 400 ri muri vona. Muri ni rabalaki, lakea e huriki a murimuri vona ri ha vapida, i lobo tavula a tara vona.

³⁷Muri na tahuna ni here a rane huriki lobo, e Iudas a bakovi o Galili, i bele. I tuli e huriki a bakovi, ri vakabele a vabinga ri ngaru ni lili e huriki ri matakari ria. Ia tara ni rabalaki, ri vapida rere e huriki a murimuri vona.

³⁸I mavonga, e huriki nga, naha ni padoi ria! Mu mata taro ria ri gi vano! A leho ne ria, ge valai na bakovi kunana, bara i lobo tavula.