Apostolo 4:9-37

⁹odaḡa sauꞌa vazeḡa mazao haḡai manoḡa haḡaateꞌe zu nouge nouge ani fainateꞌe ḡadimuꞌe hehe?

¹⁰ꞌOugine, zae zu Isaraela azaḡa niduꞌa ꞌadi ederoꞌi! Iesu Keriso, Nazareta neḡa vazeḡa niḡano vaze ꞌadiꞌe manore hunadu, zae zamao edauꞌohe. Iesuꞌe zaeꞌa satauroniro rehano, Badiꞌaꞌa runeonoꞌo bare ḡaboniroteꞌe vazeḡa.

¹¹Aniꞌe 'Zae, ne ogoruꞌeteꞌe azaḡaniꞌa, heꞌeheꞌeniroteꞌe hadiḡa rehano, izidi duꞌeꞌeteꞌe hadiḡa boro reꞌ onaeha.' (Salamo 118:22)

¹²Eꞌanoꞌo Iesu aneꞌa daꞌo emeḡe ḡabofiꞌuma. Mazaḡa haba niduꞌa zamaḡano Badiꞌaꞌa emeḡe ḡabofoga veizeꞌe ane daꞌo tuḡuniro.”

¹³Vaze boroboroꞌe, Petero zu Ioaneꞌa inare ḡoeroga horozirotene, zaguzagaro, mazaḡa zeḡeꞌa ḡiazirotene, Petero zu Ioaneꞌe mene mirihiroteꞌe azaḡa, edeḡa oꞌoꞌa. Zu ze edeḡa, anianineꞌe Iesu teite raudoteꞌe azaḡa.

¹⁴Zuni odaḡa sauꞌaniꞌa manoriroteꞌe vazeḡaniꞌa Petero zu Ioane teite edanoga horoniro ꞌahine, ḡoere ꞌahoga rouga mene idararo.

¹⁵Eꞌanoꞌo “Petero zu Ioaneꞌe kanisoro nuꞌonuꞌo habaꞌanonoꞌo mae buzoꞌi” radu, zeꞌe zeḡe daꞌo ḡoꞌaniro,

¹⁶raenaꞌa, “Eme zeḡe mazao nagini haḡaine manoḡa?” rae ḡadititiro. “Ierusalema azaḡa niduꞌaꞌe edeḡa, zeḡeꞌa gigiꞌa haḡaiḡa boro haḡaataꞌaꞌe. Eme zeḡe haḡai oꞌonoga mene idaḡa.

¹⁷Rehano hari ꞌadaꞌa ne azaḡa boꞌaḡano bororatiteꞌe ꞌuoga veize, riho ḡoeꞌa ziniꞌuma, raenaꞌa, 'Iesu niḡano vaze mazao ago bare ḡoeroꞌi!'

¹⁸Ebu zeꞌe bare huze zouzadu, “Iesu niḡano ago hune zu bare ḡoeroꞌi, zu ago hune zu bare ihozoꞌi!” rae ziro.

¹⁹Rehano Petero zu Ioaneꞌa naenaezinaꞌa, “Zaeꞌa zae bare ḡadizoꞌi! Badiꞌa ubumao, Badiꞌa ḡoere mene egadu, zae ḡoere egogaꞌe manoḡa ga?

²⁰Mazaḡa emeꞌe nagini horoniroteꞌe zu igiroteꞌe ḡoeꞌa mene rae furenineꞌe mene idaḡa.”

²¹Ebu kanisoro azaḡaniꞌa bare riho ḡoeꞌa zeadu, tuḡuze buziro. Zeꞌe adugano tuḡuziteꞌe ibiḡa mene horoniro, mazaḡa naginiꞌa fureranateꞌe uꞌano vaze niduꞌa Badiꞌa niḡa nigune radiro ꞌahine.

²²Gigiꞌa haḡaiḡano manoriroteꞌe vazeḡa muriḡaꞌe ḡae ḡazaḡa gaubanana (40) vitinoga.

²³Petero zu Ioaneꞌe tuḡuze buzirotene, Iesu mone azaḡa vaḡe onamiro, ebu dibuꞌo hauꞌeteꞌe boroboro zu vaze boroboroꞌa ziroteꞌe ḡoeꞌa meꞌodo ziniro.

²⁴Zeḡeꞌa ḡoere eꞌe igirotene, zamaze tibano teadu agoze borofeꞌenaꞌa Badiꞌa mazao kuraro, raenaꞌa, “Zuhiꞌa Boro, ḡaꞌe adure, raha, davara zu eꞌe zamaḡano radiuꞌeteꞌe ḡauḡa niduꞌa haḡairo.

²⁵Ḡaeꞌa Vine Zaḡoḡa tuḡunadu, ḡae tuḡure vazeḡa vouḡafe Davida hebeonoꞌo ḡoeriro, raenaꞌa, 'Nougaduni Iuda mene azaḡaniꞌe maḡune rudaro, zu haba ꞌahoga ꞌahoga azaḡaniꞌe huga mene hidiꞌuma haḡaiḡa haḡaihi rae neneḡaniro?

²⁶Kini azaḡa haba ḡianeꞌeteꞌeꞌa utitoga radu onairo, ebu vaze ḡihiꞌa ḡihiꞌaniꞌa zeḡe teite tibano nuꞌoraro, Zuhiꞌa Boro Badiꞌa zu Keriso teite utitoga veize.' (Salamo 2:1-2)

²⁷Eꞌe haḡaiḡaꞌe hubehune fureraro. Heroda zu Pontio Piratoꞌa Iuda mene azaḡa zu Isaraela azaḡa teite Ierusalema neḡano nuꞌoranadu, Iesu matihi rae neneḡaniro. Iesuꞌe ḡae Tuḡure Vazeḡa zaḡoḡa, ḡaeꞌa Keriso rae ohoniroteꞌe vazeḡa.

²⁸Rehano zeꞌe, ḡaeꞌa irina ḡae gigiꞌao zu urao fureraꞌuma rae reiroteꞌe haḡaiḡa Iesu mazao haḡairo.

²⁹Zuhiꞌa Boro, izidi zeḡeꞌa riho ḡoeꞌa efateꞌe zamaroꞌi! Eme, ḡae tuḡure azaḡa inara rifoꞌi, emeḡeꞌa inare hunadu ḡae ḡoere rae furenoga veize!

³⁰Ebu evoꞌo ꞌeinoꞌi, ugi azaḡaniꞌa manoroga, zu ḡae tahi gigiꞌa furenoꞌi ebu zaguzagaꞌuma haḡaiḡa haḡaoꞌi, Iesu, ḡae Tuḡure Vazeḡa zaḡoḡa niḡano!”

³¹Ze kurau hauḡirotene, zeḡeꞌa nuꞌoraroteꞌe habaꞌaniꞌa hagahagariro. Ebu zeḡe niduꞌa Vine Zaḡoḡaniꞌa irivaꞌoziro, ebu Badiꞌa ḡoere inare rae fureniro.

³²Iesu mazao fieꞌeteꞌe azaḡaꞌe zama zu zamaroneze tibano tinu. Vaze ꞌahoganiꞌa “ꞌadiꞌe eḡe daꞌo tohe” rae mene reiro, rehano “vaze niduꞌa tohe” rae ḡahugo titiro.

³³Ebu apostolo azaḡaniꞌa inare huneꞌenaꞌa Zuhiꞌa Iesuꞌa bare ḡabodiroteꞌe hariḡa rae furene onaminu, ebu Badiꞌa ḡahunone manoḡa boroꞌa zeḡe niduꞌa mazao radiunu.

³⁴Ze tohe ꞌahoganiꞌa zu mene fereziro, mazaḡa habazeta azaḡa zu nezeta azaḡaniꞌa eꞌe seronadu, moniḡaꞌe apostolo azaḡa vaḡe odohe onaadu,

³⁵zamazeo tiro, ebu moniꞌa ferezeꞌeteꞌe azaḡa ḡahugo zinido.

³⁶Vaze ꞌahoga, niḡa Iosefa, Levi iduhu zu Kupro ꞌumuḡa vazeḡa. Aniꞌe apostolo azaḡaniꞌa Banabasi rae hunido. Ni eꞌe hugaꞌe inara ziniꞌeteꞌe vazeḡa.

³⁷Banabasi aniꞌe ane haba seronadu, moniḡaꞌe apostolo azaḡa zamao tiro.