Apostolo 3:1-18

¹Mada ꞌahogano Petero zu Ioaneꞌa kuru madaḡano Dibuꞌo Neḡa itiro. Aꞌe ḡorava mone mada uḡidu (3 koroko) zamaḡano.

²U ibiheta ꞌahoga, niḡa Iraḡa Manoḡa raꞌeteꞌe genaḡano, odaḡa sauꞌa vazeḡaniꞌa ehore radiro. Aniꞌe ꞌouge fureniro, ebu mada niduꞌa eꞌe habaꞌa tutune onamido, ebu Dibuꞌo Neḡa diuḡeꞌeteꞌe azaḡa mazao moni umidinu.

³Ani Petero zu Ioaneꞌa Dibuꞌo Neḡa diuḡihi raꞌenogano horozadu, moni umiziro.

⁴Rehano Petero zu Ioaneꞌe ḡiane runadu, Peteroꞌa niro, raenaꞌa, “Eme ḡiafoꞌi!”

⁵Odaḡa sauꞌa vazeḡaniꞌe ḡau ꞌahoga iniꞌuma rae zamare ḡiaziro.

⁶Rehano Peteroꞌa niro. “E monihe oꞌoꞌa rehano, eḡe mazao radiuꞌeteꞌe ḡauḡa ḡaniꞌuma. Eḡeꞌa ḡaꞌohe. Iesu Keriso, Nazareta neḡa vazeḡa niḡano iḡunadu onamoꞌi!”

⁷Ebu Peteroꞌa ane edaꞌe ꞌevoreḡa madu mae ḡihinirotene, odaḡa zu kekeḡaniꞌa tabara inariro.

⁸Eꞌanoꞌo ani rafate iḡunadu edaro, ebu oname onainu. Ebu rafate onameꞌenaꞌa zu Badiꞌa niguneꞌenaꞌa zeḡe teite Dibuꞌo Neḡa diuḡiro.

⁹Vaze niduꞌa aneꞌa Badiꞌa niguneꞌenaꞌa onameꞌeteꞌe horonirotene,

¹⁰aniꞌe Dibuꞌo Neḡa ibihetaḡa, niḡa Iraḡa Manoḡano iḡaiḡa ehoradu, vaze mazao moni umidinuteꞌe vazeḡa rae reiro. Ebu ane mazao naginiꞌa fureraroteꞌe uꞌano, zaguzagau rudaro.

¹¹Odaḡa manoriroteꞌe vazeḡaniꞌa Petero zu Ioane hegote ragavinuteꞌe zamaḡano, vaze niduꞌa zaguzaganadu, zeḡe vaḡe isau dure onairo. Aꞌe Solomona touraḡi raꞌeteꞌe habaꞌano.

¹²Peteroꞌa vaze ḡehaḡaniꞌa onaoga horozirotene, ziro, raenaꞌa, “Isaraela azaḡa, za nougaꞌahi zaguzagauꞌohe? Zu nougaꞌahi ḡiaḡiafeꞌohe? Zaꞌa zamareꞌetene, emeḡeꞌa gigiꞌafe hina vaze ꞌadi faina ga? Ga emeḡeꞌa hube hune Badiꞌa gubaneꞌeteꞌe uꞌano faina ga?

¹³Aberahamo, Isako, Iakobo, zu vouḡafeꞌa kurano haudoteꞌe Badiꞌaḡaniꞌa ane tuḡure vazeḡa Iesu mae ite nigune ḡihiniro. Rehano zaeꞌa Pirato ꞌevoreo riꞌiniro. Ebu Piratoꞌe tuḡune bunihi rae zamariro rehano, zaeꞌa Pirato zamao heꞌeheꞌeniro.

¹⁴Zaꞌe Vaze Zaḡoḡa zu Duduḡa heꞌeheꞌeniro, ebu vaze runediroteꞌe vazeḡa ꞌahoga mae bunoga veize umidiro.

¹⁵Zaꞌe ḡabone ziniꞌeteꞌe Zuhiꞌaḡa maro, rehano aniꞌe Badiꞌaꞌa runeonoꞌo bare ḡaboniro. Ebu eme eꞌe horonadu ꞌada rae fureneꞌeteꞌe.

¹⁶Ebu Iesu mazao fieꞌeteꞌe uꞌano vaze ꞌadi faineha. Za edeḡa vaze ꞌadiꞌe mene edau ragavido. Iesu ni gigiꞌaḡa uꞌano zu Badiꞌa mazao fieꞌeteꞌe Iesuꞌa rifateꞌe uꞌano vaze ꞌadaꞌa manore huneha. Zae niduꞌa ꞌada horoneꞌeteꞌe.

¹⁷Nego nabudi, eḡe edeḡa, Iesu maroteꞌe madaḡano bone zaꞌe aḡuꞌa, ani mazao nagini haḡairotaꞌaꞌe, zu zae vaze boroboro zuni aḡuꞌa.

¹⁸Rehano Badiꞌaꞌa peroveta azaḡa niduꞌa hebeonoꞌo amahi rae furenirotaꞌaꞌe Badiꞌaꞌa ꞌahige haḡae huniro, raenaꞌa, 'Badiꞌaꞌa tuḡuniteꞌe Kerisoḡaꞌe zaharaniꞌuma.'