Apostolo 2:30-45

³⁰Tago i ga propet, ma i nunure ba God i ga vatang ia ma ra vavalima, ba na vaki tika na natuna ta kana kiki na king,

³¹i nunure value go, ma i vatang ia ure ra nilaun mulai kai Kristo, ba pa di ga nur vue ara ra ruarua na tulungen, ma ra pakana bula pa i ga mareng.

³²God i ga valaun pa go Iesu, ma avet par ave ga giragire.

³³Ma ba di ga vaki ia urama ta ra lima i tuna God, ma tago i ga vatur vake bula ra vamading tai Tamana, ure ra Takodo na Tulungen, go i tar lolonge nina ava ti gire ma ava ti valongore.

³⁴Tago David pa i ga vana urama ra bala na bakut, tago ia iat i ga biti dari: “A Luluai i ga tatike tai kaugu Luluai: Una ki ta ra limagu tuna,

³⁵Tuk ta nam ra bung ba ina vadiop kaum lavur ebar upi ra ruarua na kakim.”

³⁶Boina ba ra kuba i Israel parika na nunure bulu, ba nam Iesu ava ga ot ia ta ra bolo, God i tar vaki ia upi na Luluai ma na Kristo bula.

³⁷Ba dia valongore go, i pinpidian ra bala i diat, ma dia tir Petero, diat ma ra umana apostolo, dari: A tara na tura i vevet, ava avet a pait ia?

³⁸Petero i biti ta diat: Avat par, tikatikai, avat a nukpuku, ma da baptaiso avat ta ra iang i Iesu Kristo, upi da pun vue kavava lavur varpiam, ma da tabar avat ma ra Takodo na Tulungen.

³⁹Tago di ga tatike go ra tinata tadav avat, ma tadav ra lavur natu i vavat, ma ta diat maro vailik bula, tadav avat par, ba God na oro pa avat pirana.

⁴⁰Ma mangoro na tinata bula i ve diat i tana, ma i vargat diat me dari: Avat a valaun avat kan go ra taun tarai i gegagege.

⁴¹Ma di baptaiso diat, dia kapupi kana tinata; ma di luk ra tarai dia tar agil diat ta nam ra bung, ba ra utul a arip na marmar.

⁴²Ma dia tur patuan vatikai ta ra vartovo kai ra umana apostolo, ma ta ra kini na varmari vargil, ma ta ra tabik gem, ma ta ra niaring.

⁴³Ma ra tarai par dia burburut, ma ra umana apostolo dia pait mangoro na magit na kinaian, ma mangoro na vakilang bula.

⁴⁴Ma diat dia tar nurnur, dia vura ki guvai, ma dia vung guve kadia vurvur magit;

⁴⁵ma dia ivure kadia vurvur magit, ma dia tibe diat par me tikatikai da kadia niiba.