Apostolo 2:18-36

¹⁸Me kapughu tau ngai uungu etoa, taita ila me vause ila, aue atau sio tee Spirit Manga ateva etaira, me aue la aulia ngaotu inangarighi.

¹⁹Aghi aue aghapasunga aimatootoongana elomarase me epona tale kosa ateva, rae, kura ateae, me paka asu eteva.

²⁰Sinaka ateva aue saurrom, ulana ateva aue eraeraeana, me auena kinatama nau eteva emae, ia o nau eteva, aue aghi Vau ngepona ateva aue enaughi ia.

²¹Me lo atoa la kolo tau ararina ateae Vau ngepona ateva aue la saanga.’”

²²Pita ghe mene uela va, “Israeli etoa, am nongo. Iesu aNasareti ia God ghe sungie mae sio etaimim, ghe gheleila paka mirikol me aimatootoongana elome etaimim tani apasunga etaimim va ia ghe kasula ta God. Am akapa am kilakila isaa oia voto.

²³Ia o taumattu ngateva emua arau God ghe kilaiela me ghe loela tani taue sio etaimim, am me ssa taumattu ngatoa am ghe uvi emateala tale aikotoo.

²⁴God ang ghe totuela tale mammarikana nimate ateae, poli nimate ateae karika righi sarasarakaniaane tani poso aoghia.

²⁵Deivit ghe pitila va Mesaea ghe auliaala va, “‘Aghe taatara Vau ngepona ateva emua ta ngetaghi tale nau ekapa atoa, poli ia etokatoka tale pai muenna ativilau etaghi, me karika arooroo tani katuu.

²⁶Liuna avalua o me urunguitanighi eteva emasimasi me paaghi eteva ekkinari tau sae ararina ateae, me vaulanighi eteva aue etoka tale voto anannaa va aue aghaa maulue etana.

²⁷Poli io karika urooroo tani tau velueghi va alao tanganueira matena atoa, me karika aue utau velu kapum taumattu manga va emauu.

²⁸Ughe apasungaala va aue amene sakesake, me tokatokaam teeieghi aue eapasueghi tale nimasimasi.’

²⁹“Tueghi me nengaghi etoa, aghi aghaaulia ngakorokoronganaaili etaimim va, tuvuita ateva ta Deivit ghe matela, laghe kaieiniela, me liuna ateva, etokatoka teeita tale isaa oia nau.

³⁰Ia propete ia, me God ghe gheleila kinatama inangari nialokoi eteva va teva tuvuna aue ekingi nongina ia.

³¹Me ia ghe taatara lao sio emua, me ghe auliaala tottotuaane Mesaea, poli karika ghe tau veluela va ghe aso tanganueira matena atoa, me vilikina karika ghe mauula tale liu.

³²Ia o Iesu, God ghe totuela tale nimate, ami oia ami ghe taraiela, me ami aaulia ngaotua.

³³God ghe asaesaeala tani toka tale pai muenna ativilau, me ghe tau sio mae Spirit Manga ateva nongina ghe auliaala tale inangari nialokoi. Me Iesu ghe tau sio mae Spirit Manga ateva etaimami, ghaine am taataraia me am nongonongoa.

³⁴Poli Deivit karika ghe saela epona liu, me ghe uela va, “‘Vau ngepona ateva ghe uela ta kapughu Vau eteva va, “Toka siola tale pai muenna ativilau

³⁵lomosi ta aghatoka sio lo atoa la sessa teeio euu, me uatingina saoaa kkem etaira.”’

³⁶“Liuna avalua o me Israeli ekapa atoa am tani kila amasina va ia o taumattu ngateva am ghe avukalaie saela tale aikotoo, Iesu etana, God ghe gheleiela va Vau ia me Mesaea ia.”