APOSTOLO 2:16-38

¹⁶Táit minái a tapam hut onin, na wa ái Ioel tám worwor tus a para páksi hirá sang ngo na ngoi,

¹⁷má a parai kán worwor ái Káláu ngoromin, ‘I áwáwatin bung, ina urai Taniang nák porta i matananu no. Rang nat gam, tan káláu má boh kalik átlái, da mánán tusi midang má dák arbin talas mai. Má kamu tan kalilik kaukak da mákái mákmák, má tan pupunkak tili narsá gam da mihi mihmih.

¹⁸Áá, a támin. Ina longoi ngorer mul mai kak tan tám arardos, tan káláu má boh wák. Ina urai Taniang uri di on á tan bung erei má da para talsai midang singin matananu.

¹⁹Má ina inngasi tara akiláng iamuni armongoh má adi naul bim mul. Na hut á dár má kámnah má lala tomon turán,

²⁰ngorer nas kápte na pos, na kuron pagas, má kalang na mirik ngoro dár. Má ngorer ngo tan akiláng ákte hut má, erei má tilik támin bung si Konom na purut.

²¹Mái sinih na sung Konom suri na tángni, ái Konom sang na aliu pasi.’

²²“Matananu Israel, gama longrai be táit ina parai sur Iesu kakun Nasaret. Gam talas ngo ái Káláu a longoi rakrakai án him má tara akiláng mai limán ái Iesu kabin a longoi main i katbán i gam má gamá mákái. Má bos akiláng erei a inngas tari ngo ái Káláu sang a tarwa palai.

²³Má á gam tiklik mai bos tám sápkin, gam no gam bás páptai uri páspáng ák mat. Ái sár kápgamte long bia on, kabin hirá sang be ái Káláu a mánán táilnai tan táit no erei ngo na hut singin ái Iesu, kabin ái Káláu sang a hol páksi ngorer ur on, má ái a tari rakrakai si gam suri gama longoi ngorer.

²⁴Mái sár a salaptur pasi tili minat ái Káláu, má ák asengsegeng on alari rangrangas tili minat, kabin minat kápate artálár suri kabat páptai.

²⁵Wa kángit kabisit ái Dewit ákte worwor tus sur Mesaia hirá sang, má kán worwor a inngasi ngo táit minái iakte parai a nokwan. A parai ngoromin, ‘Iau mák Konom a lu tiklik mam iau. Kabin ái Konom a tur tangan iau, ngorer kápte kesi taun a arwat suri ketuk pala iau.

²⁶Io, ngorer a laes i balang, má kermang a para aposoi kak gasgas. Káksiai ngo kápán páplun i iau na mat, balang na matau kabin kápán páplun i iau a ngangai suri kán kiskis namur.

²⁷Kápkabin káp una te hol pala iau iatung i tarang án minat, má káp una te káksiai kam toptop a pilpil suri nák beseng.

²⁸Ukte atalsa iau ngo una aptur kalengna iau alari minat, má ina laes kabin una kis tiklik mam iau sang.’

²⁹“Má rang buhang, kápate ru á kángit hol sur kámpup git ái Dewit ngo ákte mat má dikte tahni, má mátán hat er di tahni on a kis pagas onin main i narsá git inái.

³⁰Ái Dewit sang a tám worwor tus, má a mánán on ngo ái Káláu ákte oror pagas suri na ilwa pas tekesi subul on náng kis i kán kiskis án kabisit ngoro Dewit sang.

³¹A mákmák ur táilnai ái Dewit, má ák parai ngo Mesaia na aptur kaleng alari minat, má ngo kápnate páksiai iatung i tarang án minat má kápán páplun mul kápnate beseng.

³²Mái Iesu sár minái, ái ái koner ái Káláu a aliu kaleng on tili minat, má gim no min gim mákái má gim apapos ur on ngo a támin.

³³Mái Káláu sang a sángwái urami kiskis pakta i balsán mingin, pasi á ngorer ái Iesu ákte sara pasi tili limán ái Kákán á Tanián a Pilpil ngorer ái Kákán ákte oror pagas mai, má ákte urai bul ur si gim. Má táit minái gam mákái má longrai onin, ái á artabar erei ákte tari si gim.

³⁴Ái Dewit kápate tapam urami bát ngorer ái Iesu, má ngorer git longra ilmi ngo kán worwor a parai kápate worwor suri sang. Auh, a worwor suri lite er ák parai ngoromin, ‘Ái Káláu a parai singin kang Konom ngoromin, una kis main i risán minging,

³⁵má á iau ina suka bámiai kam tan kurtara uri lalin kikim má ina arumrum di.’”

³⁶Mái Petero a arahi kán worwor ngoromin, “Má ngorer gam á matananu Israel no, na tumran sang i kamu hol suri táit minái. Ái Iesu sang minái koner gamáte bás páptai, ái Káláu ákte oboi uri kiskis án Konom má Mesaia mul.”

³⁷Má ngo tan kálámul di longrai worwor si Petero, a soi nitán i di, má dik parai si Petero má bos apostolo ngoro minái, “Rang buh gim, dánih má gima longoi?”

³⁸Mái Petero a kos di ngoro minái, “Gam no gama tapriu alari kamu tan sápkin tatalen má gamáng kipi arsiu i ngisán ái Iesu Karisito suri ái Káláu na pah palai kamu bos sápkin. Má gamáng kipi Tanián a Pilpil ngorer i artangan káián ái Káláu uri narsá gam.