Apostolo 2:14-46

¹⁴Ebu Peteroꞌa apostolo azaḡa gaubanana tiba fare (11) teite iḡune edanadu, vaze ḡuḡuvaḡa mazao agoḡa borofeꞌenaꞌa haramiro. “Iuda azaḡa, zu Ierusalema neḡano radiuꞌeteꞌe azaḡa niduꞌa, eꞌe, haḡai ꞌadaꞌa nouge nouge fureranateꞌe rae bohanihi. Eḡe ḡoere fairu abitoꞌi!

¹⁵Zaꞌe ꞌadi duḡuruꞌe vaini vuḡa gageha rae zamareꞌe gaogi. Ze mene gageha. ꞌAdi ꞌize oherebau, mada fuꞌo zu ḡazaḡa fare (9 koroko). Vazeꞌe oherebau mene gagiꞌuma.

¹⁶Rehano ꞌadiꞌe peroveta vazeḡa Ioelaꞌa amahi rae fureniroteꞌe haḡaiḡaniꞌa fureraneha.

¹⁷'Badiꞌaꞌa ziꞌohe. Mada ḡonaga madaḡa madaḡano, vaze niduꞌa mazao eḡe Vine Zaḡoḡa ovoe beꞌunadu, irivaꞌoziꞌuma, Ebu ubudeze zu aboezeꞌa eḡe hari rae fureniꞌuma. Zae ohoze iziga izigaꞌe Badiꞌaꞌa ihozeꞌeteꞌe haḡaiḡa zamaze hina horoniꞌuma, zu vaze boroboroꞌe Badiꞌaꞌa ihozeꞌeteꞌe haḡaiḡa iḡunaꞌuma.

¹⁸Eꞌe madaḡa madaḡano tuḡure azaḡa ḡuꞌa teige gaueꞌeteꞌe (slaves), ohoze zu roḡae mazao zuni eḡe Vine Zaḡoḡa ovoe beꞌunadu, irivaꞌoziꞌuma, ebu zeḡe zuni eḡe ḡoere rae fureniꞌuma.

¹⁹Ebu eḡeꞌa zaguzagaꞌuma haḡaiḡa adureo fureniꞌuma, zu eḡe tahi gigiꞌa haḡaiḡa rahao fureniꞌuma. Aꞌe ru, ire roga ebu ḡisi boro.

²⁰Madaꞌe uzaboraꞌuma, ebu batoꞌe ru teige kanaraꞌuma. Eꞌe ḡaruganobuꞌu Zuhiꞌa mada boro zu manoḡa huneꞌa onaiꞌuma.

²¹Ebu Zuhiꞌa Boro mazao umideꞌeteꞌe azaḡa niduꞌaꞌe ḡabone hidiꞌuma.' (Ioela 2:28-32)

²²Isaraela azaḡa, ḡoere ꞌadi egoꞌi! Za edeḡa. Iesu, Nazareta neḡa vazeḡa ani, Badiꞌaꞌa tuḡunadu, gigiꞌa haḡaiḡa, zaguzagaꞌuma haḡaiḡa zu Badiꞌa tahi haḡaiḡa ḡehaḡa zae boꞌaḡano haḡaido. Badiꞌa ani eꞌe haḡaiḡa Iesu mazaonoꞌo haḡaadu, Iesuꞌe aneꞌa tuḡuniroteꞌe rae deheniro.

²³Ebu Iesu ani zae ꞌevoreo riꞌinirotaꞌaꞌe, Badiꞌaꞌa amahi toganiroteꞌe zu fureraꞌuma rae ederiroteꞌe haḡaiḡa. Ebu zaꞌe Badiꞌa goro ḡoeꞌa aḡuꞌa azaḡa zeadu, satauroo ikokoneadu runediro.

²⁴Rehano eꞌe vazeḡaꞌe Badiꞌaꞌa rune zamaḡano ḡaniḡanauꞌeteꞌeanoꞌo mae vaḡinadu, bare ḡaboniro, mazaḡa rune gigiꞌaḡaꞌe Iesu obone touga mene idaḡa ꞌahine.

²⁵Davida ani Iesu hari ꞌahige rae reiro. 'Eꞌe mada niduꞌa eḡe uhiḡano Zuhiꞌa Boro horoninu. Mazaḡa ani eḡe edaꞌe moneo radiuꞌohe. Eꞌanoꞌo ḡau ꞌahoganiꞌa zuni mene hagahiꞌuma.

²⁶Eꞌanoꞌo zamaheꞌa matuꞌeꞌohe, zu hebehe hina Badiꞌa niguneꞌenaꞌa, matuꞌeꞌohe. Eꞌa zamareꞌetene, ahirihe zuni runeonoꞌo bare ḡaboniꞌuma rae reꞌuma.

²⁷Mazaḡa ḡaꞌe eḡeꞌa rudaune, vinehe rune habaꞌano mene modiꞌuma, ebu ḡae tuḡure haḡae huneꞌeteꞌe vazeḡaꞌe ahiꞌaniꞌa ruhuranoga veize mene modiꞌuma.

²⁸Ḡaꞌe ḡabone ibiḡa ihoheha. Eꞌe ḡae zamao matuꞌu hina irivaꞌohiꞌuma.' (Salamo 16:8-11)

²⁹Nego nabudi, e hubehune ziꞌohe. Vouḡafe Davidaꞌe rudanadu ḡuriro, ebu ani iduꞌe izidi ꞌize radiuꞌohe.

³⁰Aniꞌe peroveta vazeḡa ꞌahine, ani edeḡa Badiꞌaꞌa ane mazao ḡoeꞌa rinede tiro, raenaꞌa, Davida mariga ꞌahoganiꞌa ane iḡuri madu Kini reꞌuma.

³¹Davida ani vesuꞌu fureraꞌuma haḡaiḡa horoneꞌenaꞌa, Kerisoꞌa bare ḡabode iḡuniꞌuma hariḡa rae fureniro, raenaꞌa, rune habaꞌano ani mene modiꞌuma, zu ahiꞌaꞌe mene ruhuraꞌuma.

³²Ebu Iesu ꞌadiꞌe Badiꞌaꞌa bare ḡaboniro. Emeḡe niduꞌa eꞌe horonadu, rae fureneꞌohe.

³³Ebu aniꞌe Badiꞌa edaꞌe moneo ohoniro, ebu Moga mazaonoꞌo Vine Zaḡoḡa madu emeḡe mazao ovoe beꞌunadu irivaꞌofiro. Vine Zaḡoḡaꞌe Badiꞌaꞌa tuḡuniꞌuma rae tiroteꞌe. Ebu zaꞌe eꞌe haḡaiḡa izidi ꞌada horoneꞌeteꞌe zu igiꞌeteꞌe.

³⁴U Davida ani Keriso teige adure ḡoha mene mae ḡihine itiro. Rehano ani ꞌahige reiro. 'Badiꞌaꞌa eḡe Zuhiꞌa Boro niro. Eḡe edaꞌe moneo ehoroꞌi!

³⁵Onamoo eḡeꞌa agireḡo mae raharahaziꞌuma.' (Salamo 110:1)

³⁶Eꞌanoꞌo Isaraela azaḡa niduꞌa fairu ederoꞌi! Zaeꞌa satauroniroteꞌe vazeḡa, Iesuꞌe, Badiꞌaꞌa Zuhiꞌa Boro zu Keriso rae ohoniro.”

³⁷Ze eꞌe igirotene, zamaze tuḡano babaharo, ebu Petero zu apostolo azaḡa ḡadiziro. “Negofe duḡuru, eme nagini haḡaine manoḡa?”

³⁸Peteroꞌa naenaezinaꞌa, “Zae niduꞌa, zamaze ḡihunoꞌi, ebu Iesu Keriso niḡano bapatizo moꞌi! ꞌOugine Badiꞌaꞌa zae sauꞌa rae modiꞌuma, ebu Badiꞌaꞌa Vine Zaḡoḡa ziniꞌuma.

³⁹Badiꞌaꞌa ḡoere ꞌadi rae tirotaꞌaꞌe, Zuhiꞌa Boro emeḡe Badiꞌaꞌa zamaziꞌuma azaḡa niduꞌa veize. Aꞌe zae, ubudeze zu haba faḡa faḡa azaḡa niduꞌa.”

⁴⁰Ebu ani bare ḡoere ḡehaḡa hina haramiro, zu bare bare iraduguziro, raenaꞌa, “Haḡai veꞌoḡa azaḡa ꞌadi mazaonoꞌo vaḡinadu, ḡabone moꞌi!”

⁴¹Eꞌanoꞌo iniu iniuꞌa ane haramo mae ḡihinirotaꞌaꞌe bapatizoziro. Ebu eꞌe madaḡano vaze maḡa boro uḡidu (3000) heuḡa bapatizo madu zeḡe moneo ragate mae zouziro.

⁴²Zeꞌe zamaze tiba hanadu, apostolo azaḡaniꞌa ihozidoteꞌe abito zinido ebu danatitido, tiburu ogaudo, zu tibano kuraudo.

⁴³Ebu apostolo azaḡaniꞌa zaguzagaꞌuma haḡaiḡa zu Badiꞌa tahi gigiꞌa haḡaiḡa ḡehaḡa haḡaido, ebu vaze niduꞌa zamazeo Badiꞌa rihone runiro.

⁴⁴Badiꞌa mazao fiiroteꞌe azaḡa niduꞌa tibano nuꞌoru radiudo, ebu ḡauze niduꞌa ḡahugotitido.

⁴⁵Ebu habaze, neze zu toheze seronadu, iniu monizeꞌa ferezinuteꞌe niduꞌa, zininu.

⁴⁶Ze mada niduꞌa Dibuꞌo Neḡano tibano nuꞌoranadu kuraudo. Ebu ane ane neo matuꞌuzeta zu zama tiba teite ogau tiburaudo,