Text copied!
CopyCompare
Mussau-Emira Bible - Apostolo - Apostolo 2

Apostolo 2:11-46

Help us?
Click on verse(s) to share them!
11ita aJiu etoa me lo atoa ghavirina laghe mene aiesoaa teeitala, aKrit me aArabia, ita akapa ngita nongola kinatama voto ateva God nge gheleila nau ngila ppooaala tale inangari tanganueita.”
12Laghe soghila me aloira ghe kapaala me laghe aikolomieinila va, “Sa malloeana llo oia?”
13Katoa laghe aanamisainila tani ue va, “La ropila manu eteva sarasarakana ia.”
14Pita ghe tingina aitauaa teela kasangaulu kateva (11) apostolo, ghe sama anamuula me ghe uela va, “Am aJiu etoa me lo atoa am tokatoka eJerusalem, am nongo amasina inangari aghauliaa.
15Taumattu oia karika la ropila nongina am aauliaa. Elue talaua arau oia ta 9 kilok.
16Isaa oia voto am taatara, propet Joel ang ghe aulia ngalokoila,
17ghe uela va, “‘God eue va, Airuuruu tale kosa ateva, aue atau sio kapughu Spirit Manga ateva tale taumattu ngatoa. Natuimim taita atoa me vause atoa aue la aulia ngaotu inangarighi. Aliki taita atoa aue la tara nitaatara, me taita namu ngatoa aue la asoasopoi.
18Me kapughu tau ngai uungu etoa, taita ila me vause ila, aue atau sio tee Spirit Manga ateva etaira, me aue la aulia ngaotu inangarighi.
19Aghi aue aghapasunga aimatootoongana elomarase me epona tale kosa ateva, rae, kura ateae, me paka asu eteva.
20Sinaka ateva aue saurrom, ulana ateva aue eraeraeana, me auena kinatama nau eteva emae, ia o nau eteva, aue aghi Vau ngepona ateva aue enaughi ia.
21Me lo atoa la kolo tau ararina ateae Vau ngepona ateva aue la saanga.’”
22Pita ghe mene uela va, “Israeli etoa, am nongo. Iesu aNasareti ia God ghe sungie mae sio etaimim, ghe gheleila paka mirikol me aimatootoongana elome etaimim tani apasunga etaimim va ia ghe kasula ta God. Am akapa am kilakila isaa oia voto.
23Ia o taumattu ngateva emua arau God ghe kilaiela me ghe loela tani taue sio etaimim, am me ssa taumattu ngatoa am ghe uvi emateala tale aikotoo.
24God ang ghe totuela tale mammarikana nimate ateae, poli nimate ateae karika righi sarasarakaniaane tani poso aoghia.
25Deivit ghe pitila va Mesaea ghe auliaala va, “‘Aghe taatara Vau ngepona ateva emua ta ngetaghi tale nau ekapa atoa, poli ia etokatoka tale pai muenna ativilau etaghi, me karika arooroo tani katuu.
26Liuna avalua o me urunguitanighi eteva emasimasi me paaghi eteva ekkinari tau sae ararina ateae, me vaulanighi eteva aue etoka tale voto anannaa va aue aghaa maulue etana.
27Poli io karika urooroo tani tau velueghi va alao tanganueira matena atoa, me karika aue utau velu kapum taumattu manga va emauu.
28Ughe apasungaala va aue amene sakesake, me tokatokaam teeieghi aue eapasueghi tale nimasimasi.’
29“Tueghi me nengaghi etoa, aghi aghaaulia ngakorokoronganaaili etaimim va, tuvuita ateva ta Deivit ghe matela, laghe kaieiniela, me liuna ateva, etokatoka teeita tale isaa oia nau.
30Ia propete ia, me God ghe gheleila kinatama inangari nialokoi eteva va teva tuvuna aue ekingi nongina ia.
31Me ia ghe taatara lao sio emua, me ghe auliaala tottotuaane Mesaea, poli karika ghe tau veluela va ghe aso tanganueira matena atoa, me vilikina karika ghe mauula tale liu.
32Ia o Iesu, God ghe totuela tale nimate, ami oia ami ghe taraiela, me ami aaulia ngaotua.
33God ghe asaesaeala tani toka tale pai muenna ativilau, me ghe tau sio mae Spirit Manga ateva nongina ghe auliaala tale inangari nialokoi. Me Iesu ghe tau sio mae Spirit Manga ateva etaimami, ghaine am taataraia me am nongonongoa.
34Poli Deivit karika ghe saela epona liu, me ghe uela va, “‘Vau ngepona ateva ghe uela ta kapughu Vau eteva va, “Toka siola tale pai muenna ativilau
35lomosi ta aghatoka sio lo atoa la sessa teeio euu, me uatingina saoaa kkem etaira.”’
36“Liuna avalua o me Israeli ekapa atoa am tani kila amasina va ia o taumattu ngateva am ghe avukalaie saela tale aikotoo, Iesu etana, God ghe gheleiela va Vau ia me Mesaea ia.”
37Nau laghe nongola inangarina Pita ghe ppooaala, ghe pasala urunguitaniira me laghe uela ta Pita me mene katoa apostolo va, “Kapumami etoa, sa ateva ami gheleia?”
38Pita ghe liula etaira me ghe uela va, “Am nna ngaioghioghiaa, me am ghaa niaasuu tale ararina ateae Iesu Karisto, me kaluimim ssavoto aue ekapa, me God aue etau aatu Spirit Manga ateva etaimim.
39Inangari nialokoi uneimim me natuimim atoa me taumattu ngeleka atoa, lo akapa atoa oia Vau ngepona ateva kapuita Goto ia aue ekolola.”
40Oroieili inangari Pita ghe aulia ngasarasarakanaailiila etaira tani ue va, “Am asaangiem tale vituu eteva oia sesa ia.”
41Lo atoa laghe aikaaiaala inangari laghe ghaala niaasuu, ghe roola kotolu airari (3,000) taumattu taita me vause tale ia o nau eteva.
42Nau ekapa atoa tau ngaikaaia ngatoa laghe veluvelu eitauaa tee apostolo atoa, me laghe nongonongo me laghe taatara voto apostolo atoa laghe aapasunga, me laghe namanama, me laghe looloo sae aitauaa.
43Ila akapa laghe taatara sarasarakaniaane God tale mirikol me aimatootoongana apostolo atoa laghe gheelei, liuna avalua o me laghe oneoneaa God.
44Me ghe kateva nonga ilala, me laghe aaitauaa peiira.
45Laghe tautau velu kasina kosa me peiira laghe polipoli me viliki veu laghe kookoitaa ta lo atoa laghe tuutukuna tale kasina voto.
46Nau ekapa atoa laghe veluvelu eitauaa tale ale ngeleka atiulu tale ale manga, me laghe aaikasuaa see elome tale paa ngaleira tani namanama me laghe masimasi eitauaa,

Read Apostolo 2Apostolo 2
Compare Apostolo 2:11-46Apostolo 2:11-46