Apostolo 2:1-16

¹Iesuꞌa bare ḡabode iḡuniroteꞌe ḡarugano fura fuꞌo zu aheu fare (7) radirotene, Pentekosi madaḡa meiro. Eꞌe madaḡano Zuhiꞌa Boro mone azaḡa niduꞌa haba tibano nuꞌoru radiro.

²Eꞌe zamaḡano zavara boroꞌa onaeꞌeteꞌe teige guguḡa boroꞌa adureonoꞌo tabara gudau ovairo. Eꞌe guguḡaniꞌa zeḡeꞌa nuꞌoraroteꞌe neḡa irivaꞌoniro.

³Ebu ireꞌa duhuruꞌeteꞌe heuḡaniꞌa mazane teige rovotadu, vaze tiba tiba ranao duhuranoga horoniro.

⁴Ebu Vine Zaḡoḡaniꞌa eꞌea radiunuteꞌe azaḡa niduꞌa irivaꞌoziro, ebu Vine Zaḡoḡaniꞌa ibito zenadu, ḡoere ꞌahoga ꞌahogano ḡoeriro.

⁵Eꞌe madaḡanoꞌe, Iuda azaḡa haba ꞌahoga ꞌahogano radiuꞌeteꞌeꞌa, Pentekosi muiḡa ꞌauḡoga rae Ierusalema neḡa onaadu eꞌea radiunu. Zeꞌe Badiꞌa gubaneꞌeteꞌe azaḡa.

⁶Eꞌe haraḡa igirotene, vaze ḡuḡuvaḡaniꞌa isau onairo. Ebu ze zamaze ꞌadaꞌadaziro, mazaḡa Zuhiꞌa Boro mone azaḡaniꞌa ane ane ḡoereo ḡoeroga igiro ꞌahine. Aꞌe Iuda azaḡaniꞌa haba ꞌahoga ꞌahogano radiuꞌeteꞌe ḡoeꞌa.

⁷Ebu ze zaguzaganadu, ꞌahige reiro. “ꞌAdi duḡuruꞌe niduꞌa Galilea azaḡa rehano,

⁸nougaꞌahi emeḡe tiba tiba ḡoereo ḡoeroga igiꞌohe?

⁹Emeꞌe Patia azaḡa, Media azaḡa, Elama azaḡa, ebu Mesopotamia habaꞌano, Iudea zu Kapadokia habaꞌano, Ponto zu Asia habaꞌano radiuꞌeteꞌe azaḡa,

¹⁰Ferigia zu Pamufulia habaꞌano, Izipi habaꞌano radiuꞌeteꞌe azaḡa, zu Libia habaꞌa zamaḡano Kurene neḡa uhiḡano radiuꞌeteꞌe azaḡa. Ebu Roma neḡano radiuꞌeteꞌe azaḡa.

¹¹Eꞌe zamaḡanoꞌe Iuda azaḡa zu, Iuda mene azaḡa rehano zamaze ḡihuradu Iuda azaḡa teite kurau tiburuꞌeteꞌe azaḡa. Ebu Kerete ꞌumuḡa azaḡa zu Arabia habaꞌa azaḡa. Eme zeḡeꞌa Badiꞌa gigiꞌa haḡaiḡa emeḡe tiba tiba ḡoereo raꞌeteꞌe igiꞌohe.”

¹²Ze zaguzagaro ebu zamaze ꞌadaꞌadaziro, ebu “ꞌAdi nagini?” rae ḡadititiro.

¹³Rehano vaze nuꞌe ḡiriho ziniꞌenaꞌa, ꞌahige reiro. “Ze vaini vuḡa borofe gageha.”

¹⁴Ebu Peteroꞌa apostolo azaḡa gaubanana tiba fare (11) teite iḡune edanadu, vaze ḡuḡuvaḡa mazao agoḡa borofeꞌenaꞌa haramiro. “Iuda azaḡa, zu Ierusalema neḡano radiuꞌeteꞌe azaḡa niduꞌa, eꞌe, haḡai ꞌadaꞌa nouge nouge fureranateꞌe rae bohanihi. Eḡe ḡoere fairu abitoꞌi!

¹⁵Zaꞌe ꞌadi duḡuruꞌe vaini vuḡa gageha rae zamareꞌe gaogi. Ze mene gageha. ꞌAdi ꞌize oherebau, mada fuꞌo zu ḡazaḡa fare (9 koroko). Vazeꞌe oherebau mene gagiꞌuma.

¹⁶Rehano ꞌadiꞌe peroveta vazeḡa Ioelaꞌa amahi rae fureniroteꞌe haḡaiḡaniꞌa fureraneha.