Apostolo 27:22-35

²²Ma galoc janac biŋsu amac gebe têmtac êpa su, gebe amacnêm ŋac teŋ oc ênaŋa atom, waŋ tageŋ tec oc ênaŋa,

²³gebe gêdêŋ gêbêc tonaŋ ŋoc Anôtô, taŋ gajam sakiŋ gêdêŋ eŋ naŋ, nê aŋela teŋ mêŋgêdêŋ aê

²⁴ma kêsôm gebe ‘Paulu, ôtêc taôm atom, aôm oc ôkô kaisara laŋônêm. Ma ôlic acgom, Anôtô kêkêŋ samob, taŋ sêlac sêwiŋ aôm naŋ, gêdêŋ aôm.’

²⁵Lauac, amboac tonaŋ têmtac êpa su. Aê kakêŋ gêwiŋ Anôtôgac gebe biŋ, taŋ aŋela kêsôm gêdêŋ aê naŋ, êtu tôŋ.

²⁶Mago aêac oc dandam nadansac nuc teŋ acgom.”

²⁷Aêac adam gwêc Adriaŋa e bêc 14 gêjaŋa, ŋagêbêc e gêja lugeŋ ma lau waŋŋa sêsaê gebe têdabiŋ baugac.

²⁸Ac sêu poc e sêlic saka samuc 15.

²⁹Tec têtêc gebe moae waŋ naênsac poc, tec sêu aŋka aclê kêsêp waŋkuŋa ma sêpuc boageŋ gebe eleŋŋa sebeŋmaŋ.

³⁰Lau waŋŋa sebe sêwi waŋ siŋ ma sêc sêna, tec sebe sêlêwaŋ gomboa ma sêsau gebe sêu aŋka waŋ nêmŋa êsêp.

³¹Tec Paulu kêsôm gêdêŋ kapitai to siŋwaga gebe “Lau tônê embe sêmoa waŋ sêwiŋ atom, ma amac oc anaŋa samob.”

³²Tec siŋwaga dêdim gomboa tau ŋalêpoa gêŋgic ma gêu tau kêsêp gêjaŋa.

³³Kêdabiŋ gebe eleŋŋa, go Paulu awa gêjac êsêac ma keteŋ êsêac gebe sêniŋ gêŋ. Eŋ kêsôm gebe “Bêc 14 gêjaŋa ma aŋgôŋ ŋaômageŋ, aeŋ gêŋ teŋ atom.

³⁴Tec aoc gêjac amac gebe aniŋ gêŋ tekwem saki êsa, ma ênam amac sa gebe anam samuc, ma môkêmlauŋ teŋ êmbuc sa aŋga môkêmapac ênaŋa atom.”

³⁵Kêsôm su, go kêkôc mo mêŋgêjam daŋge Anôtô êsêac samob sêlic, go kêpô kêkôc ma geŋ.