Apostolo 26:3-19

³Ḡae edeḡa, Iuda azaḡa haḡai zuni zeḡeꞌa taꞌirotiteꞌeteꞌe ḡoeꞌa. Eꞌanoꞌo e umiꞌeꞌohe. Eḡe ḡoere ꞌadi fairu igi onamoꞌi ḡonaga!

⁴Iuda azaḡa zeḡe niduꞌa edeḡa, eḡeꞌa kobeꞌanonoꞌo nouge radiunutaꞌaꞌe, Iuda azaḡa boꞌaḡano ebu Ierusalema neḡano.

⁵Ze, ḡabonehe ḡadaheḡanonoꞌo edeḡa ꞌahine, zeꞌa uratine eꞌe Farisea vazeḡa rae reꞌuma zu idaḡa. Farisea azaḡaꞌe Iuda azaḡa goro ḡoeꞌa faifaine haḡaeꞌeteꞌe azaḡa.

⁶Ebu izidi eꞌe, Badiꞌaꞌa emeḡe vouḡa mazao rae tiroteꞌe ḡoeꞌaniꞌa hudanoga guhineꞌeteꞌe uꞌano kotaheꞌohe.

⁷Emeḡe iduhu gaubanana zu aheu fareꞌe (12), eꞌe ḡoeꞌaniꞌa hudanoga radu guhineꞌohe. Ze ohere zu madai Badiꞌa tuḡure inare haḡaeꞌohe. Kini vazeḡa! Eꞌe, eꞌe ḡoeꞌa guhineꞌeteꞌe uꞌano, Iuda azaḡaniꞌa eḡe rana ḡoere aduga riꞌineꞌohe.

⁸Za nuꞌe nougaꞌahi Badiꞌaꞌa rune azaḡa bare ḡaboziꞌuma raꞌeteꞌe ḡoeꞌa mene mae ḡihineꞌohe?

⁹Eḡe zuni ibite ꞌahige zamariro. Nazareta neḡa vazeḡa, Iesu niḡa ꞌuꞌuoga veize inare gauine manoḡa rae zamariro.

¹⁰E ꞌuguḡa haḡaiḡa Ierusalema neḡano haḡairo. Ebu Dibuꞌo hauꞌeteꞌe boroboro niḡano, Zuhiꞌa Boro mone azaḡa ḡehaḡa ḡuꞌano ohoziro, zu zimi ruzihi reirotene, eꞌe ḡoeꞌa mae ḡihiniro.

¹¹Ebu Iuda azaḡa kuru neḡa niduꞌa diuḡadu, 'Bouzoꞌi!' reiro. Ebu bouzeꞌenaꞌa, 'Iesu niḡa sausaune ḡoeroꞌi!' rae tatariro. Zuni e maḡune rudaro ꞌahine, haba faḡano neḡa ꞌahoga ꞌahoga onamadu, Zuhiꞌa Boro mone azaḡa vaḡadu sausauziro.

¹²Mada ꞌahogano eꞌe ꞌougihi radu, dibuꞌo hauꞌeteꞌe boroboro niḡano zu ḡoereze odohadu, Damaseko neḡa onamiro.

¹³Kini vazeḡa! Madai nemaḡano eꞌe ibiḡano onamiroteꞌea, e adureonoꞌo agaḡa boroꞌa agaranoga horoniro. Eꞌe agaḡaꞌe mada agaḡa vitinoga. Eḡe zu eḡe teite onamiroteꞌe azaḡa agafiꞌ ovairo.

¹⁴Ebu emeḡe niduꞌa rahao higau bauriro, ebu Iuda ḡoeꞌano ihiꞌeteꞌe agoḡa ꞌahoga igiro, raenaꞌa, 'Saulo! Saulo! Ḡa nougadu eḡe sausauheꞌohe? Ḡa ire meiga meiga futuneꞌohe. Aꞌe ḡaeꞌa ḡae bare sausauꞌeꞌohe.'

¹⁵Ebu eḡeꞌa ḡadinenaꞌa, 'Zuhiꞌa Boro, ḡa iniu?' reiro. Zuhiꞌa Boroꞌa naenaehinaꞌa, 'Eꞌe Iesu, ḡaeꞌa sausauheꞌeteꞌe vazeḡa.

¹⁶Iḡunadu edanoꞌi! Eḡeꞌa ḡae mazao fureranataꞌaꞌe, eḡe tuḡure vazeḡano ohoꞌifine, zu horohateꞌe hariḡa vaze mazao meꞌodo zinifine, zu eḡeꞌa ihoꞌiteꞌe ḡoeꞌa rae furenoga veize.

¹⁷Eꞌe Iuda azaḡa zu Iuda mene azaḡaniꞌa sausauꞌihi reiteꞌe zamaḡanonoꞌo mae vaḡiꞌiꞌuma. Ebu zeḡe mazao bare tuḡuꞌiꞌuma,

¹⁸ubumaze raꞌanadu uzaboonoꞌo agaḡa moneo mae ḡihuzoga veize, zu Satani ꞌuꞌuḡanonoꞌo mae vaḡizadu Badiꞌa mone rouga veize. ꞌOugine, sauꞌaze eḡeꞌa rae modiꞌuma, zu zeꞌe eḡe mazao fiadu, Zuhiꞌa Boro veize avo reiroteꞌe azaḡa teite ꞌauḡiꞌuma.

¹⁹Eꞌanoꞌo kini Agripa, eꞌe adureonoꞌo fureranadu ihohiroteꞌe ibiḡano daꞌo dureꞌohe.