Apostolo 23:15-32

¹⁵Eꞌanoꞌo za zu kanisoro azaḡaꞌe uti vazeḡa boro uminine idaḡa hehe, zae mazao Paulo bare tuḡunoga? Za soꞌe faifairu bare ḡadiniꞌuma roꞌi! ꞌOugine ani ꞌize ꞌizema feurogano ibio maꞌuma.”

¹⁶Rehano Paulo ezeḡa ubuganiꞌa Paulo ganato hauꞌeteꞌe hariḡa igiro. Eꞌanoꞌo Roma uti azaḡa radone neḡa onamadu Paulo niro.

¹⁷Eꞌanoꞌo Pauloꞌa uti azaḡa ibito ziniꞌeteꞌe vazeḡa ꞌahoga hune onaadu niro, raenaꞌa, “Tahiꞌa ꞌadi, uti vazeḡa boro vaḡe tutune onamine idaḡa hehe? Ani hari ꞌahoga rae fureno hatihi raꞌohe.”

¹⁸Eꞌanoꞌo tahiꞌa eꞌe uti vazeḡa boro vaḡe tutune onamiro. Uti azaḡa ibito ziniꞌeteꞌeꞌa, boro ninaꞌa, “Ḡuꞌano radiuꞌeteꞌe vazeḡa, Pauloꞌa huhe onamadu umideha. 'Tahiꞌa ꞌadi uti vazeḡa boro vaḡe tutune onamoꞌi!' raha. Mazaḡa aniꞌe hari ꞌahoga rae fureno ḡanihi raꞌohe.”

¹⁹Uti vazeḡa boroꞌa tahiꞌa eꞌe genaḡa abine onamadu ḡadiniro, raenaꞌa, “Ḡa nagini ihihi raꞌohe?”

²⁰Aniꞌa ninaꞌa, “Iuda azaḡaniꞌa ḡoere idanadu, ohoḡore Pauloꞌe Kanisoro azaḡa mazao tutune onamoga rae umiꞌiꞌuma raꞌohe. Zeꞌe soꞌe Paulo faifairu bare ḡadinihi reꞌuma.

²¹Eꞌanoꞌo ḡoereze ago egoꞌi. Mazaḡa ḡae ḡazaḡa gaubanana (40) vitinoga azaḡaniꞌa ibio ganate radiꞌuma. Zeꞌe ḡoere riḡa ꞌahige gore ti modeha. Ze mene ogaꞌuma ga mene gagiꞌuma onamo Paulo maꞌuma. Izidi ꞌadi zamaḡano, zeꞌe ḡa ḡoere guhineꞌohe.”

²²Uti vazeḡa boroꞌa ninaꞌa, “Ḡaꞌa ihohiꞌ arateꞌe moneo, vaze ꞌahoga ago noꞌi!” Ebu tuḡune onamiro.

²³Ebu uti vazeḡa boroꞌa uti azaḡa ibito ziniꞌeteꞌe vazeḡa aheu huze onaadu ziro, raenaꞌa, 'Uti azaḡa maḡa aheu (200) huze nuꞌozoꞌi, ebu veine hina utiteꞌeteꞌe azaḡa maḡa aheu (200) zu hosi ranaonoꞌo utiteꞌeteꞌe azaḡa ḡae fuꞌo zu aheu fare gaubanana (70) huze nuꞌozoꞌi! Ebu izidi ohere 9 koroko zamaḡano iḡunadu, Kaisarea neḡa ovoroꞌi!

²⁴Paulo veize hosi nu moꞌi, ebu gavana vazeḡa Feliki vaḡe fairu tutune onamoꞌi!'

²⁵Uti vazeḡa boro ani, gavana vazeḡa veize miriho ḡoeꞌa tiro, raenaꞌa,

²⁶'Eḡe Klaudia Lusiaꞌa, ḡihiꞌa vazeḡa manoḡa, gavana vazeḡa Feliki mazao manoḡa tauḡi raꞌohe.

²⁷Vaze ꞌahiꞌe Iuda azaḡaniꞌa obone teadu matihi reiro, rehano eḡeꞌa uti azaḡa nu teite onamadu, Iuda azaḡa mazaonoꞌo mae vaḡiniro, mazaḡa ani Roma mone vazeḡa rae reiroteꞌe igiro ꞌahine.

²⁸Ebu eꞌe nagini uꞌano Iuda azaḡaniꞌa maḡuniroteꞌe ederihi radu, Kanisoro azaḡa nuꞌonuꞌo zamao vaze ꞌahi ohoniro.

²⁹Ebu eḡeꞌa ederirotaꞌaꞌe, aniꞌa Iuda azaḡa goro ḡoeꞌa variꞌiroteꞌe uꞌano maḡuniro. ꞌUguḡa haḡaiḡaꞌe ḡuꞌano mene ohoniꞌuma, zu runeo mene tuḡuniꞌuma ḡauḡa.

³⁰E izidi Iuda azaḡaniꞌa ani matihi rae neneḡaniroteꞌe ega ꞌahine, ḡae vaḡe zogone tuḡuneꞌohe. Ebu Iuda azaḡa zuni zeha, zeḡe zu ḡae vaḡe ovamadu, ḡae zamao aniꞌa haḡairoteꞌe haḡaiḡa rae furenoga veize.”

³¹Eꞌanoꞌo eꞌe oheꞌano uti azaḡa ze, ziroteꞌe idunaḡano, Paulo tutune ovoadu, Antipatri neḡano onamiro.

³²Irarirotene, hosi ranaonoꞌo utiteꞌeteꞌe azaḡaniꞌa daꞌo Paulo tutune Kaisarea neḡa ovoiro. U uti azaḡa odao onamirotaꞌaꞌe, Ierusalema neḡa bare itiro.