Apostolo 23:14-21

¹⁴Ri lakea ne huriki a prister dagi, a gare, ri ta maea, “Mia lobo nga mi kaba pali nahea mi gi kani, ge harena na tahuna mi gi rabalakia e Paulus.

¹⁵Ngane mi ngaru mua mu gu rudu a ngava na ubu ne huriki a nugumaheto, ge turari vilia e Paulus. Bara i luhoi ngane mu gu nana tabua na maka ninana. Ia i uka ma ge valai tabukoi ma, bara mi rabalakia.”

¹⁶Na tahuna e hane Paulus i longoa a ngava iea, i nunu lakea na tabeke ne huriki a nugumaheto, i vakalongoa e Paulus.

¹⁷Muri e Paulus i gale vilia a nugumaheto, i takia, i ta maea, “O tulia a riau iea ge lakea taro na ubu vomu. I tahoka a ngava ge takia vona.”

¹⁸Lakea a nugumaheto i tungaria a riau, ru lakea na ubu, i ta maea, “A vorakato e Paulus i gale iau, a lakea vona. I taki iau ga tuli vilia vomu a riau iea, a vuhuna i tahoka tara ngava ge taki ioe vona.”

¹⁹Lakea a matakari i tulia na limana a riau iea, ru pesi gaviri. Muri i nanea, “A ra ngava go vakalongo iau vona?”

²⁰Lakea i takia, “E huriki a Iuda ri valongo mai a ngava pali, ta ri gi nana ioe go turari lakea ne huriki a tara na vaponga kuduvi e Paulus. Ri tami rabu mavonga go luhoi ga ngava muholi i valai ne ria ri gi nana tabua e Paulus.

²¹Naha ni longo mai ria! E huriki a bakovi ala ravulu va i tahoka a polona, ri kapiloho, ta ri gi rabalakia e Paulus. Ria lobo ri kaba pali nahea ri gi kani, o ri gi ninu, ge harena na tahuna ri gi rabalakia. Ngane ri dava ioe ta go longo vona a ninana ne ria.”