Apostolo 21:11-35

¹¹Ani emeḡe vaḡe onaadu, Paulo kibaꞌi ga bereta meiro, ebu eꞌe hina aneꞌa bare ꞌevoꞌa zu odaḡa ogoranadu, ꞌahige reiro. “Vine Zaḡoḡaniꞌa ꞌahige raꞌohe. 'Kibaꞌi ꞌadi vazeḡaꞌe, Iuda azaḡa Ierusalema neḡano radiuꞌeteꞌeꞌa ꞌahige ogoru tiꞌuma, ebu Iuda mene azaḡa ꞌevorao riꞌiniꞌuma.' ”

¹²Eꞌe igirotene, eme, Paulo teite raudoteꞌe azaḡa zu eꞌea radiroteꞌe azaḡaniꞌa “Ierusalema neḡa ago itoꞌi!” rae Paulo uminiro.

¹³Rehano Pauloꞌa raenaꞌa, “Za nougadu niauꞌenaꞌa, e zama zoreneꞌohe? Zuhiꞌa Boro Iesu niḡa uꞌano Ierusalema neḡano ḡuꞌano ohohoga idaḡa, zu rudanoga zuni idaḡa. E zamahe haneha.”

¹⁴Eme ani gararo ḡizirotene, eꞌea modiro, rehano 'Zuhiꞌa Boro mazao modeꞌohe!' rae reiro.

¹⁵ꞌOuge mada nu radiroteꞌe enogano eme, Paulo zu ane teite rauꞌeteꞌe azaḡa, tohefe ruhinadu, Ierusalema neḡa itiro.

¹⁶Kaisarea neḡanonoꞌo Zuhiꞌa Boro tahiꞌa nu zu eme teite itiro, ebu Ierusalema neḡano Nasona neo radifine tutufe onamiro. Ani Kupro vazeḡa, zu amahi Zuhiꞌa Boro tahiꞌa rae onairo.

¹⁷Eme Ierusalema neḡano feuriꞌ itirotene, Zuhiꞌa Boro mone azaḡaniꞌa matuꞌeꞌenaꞌa mae ḡihifiro.

¹⁸Irarirotene, Paulo zu emeḡe niduꞌaꞌe Iakobo ḡianiꞌ onamiro. Ierusalema ekalesia azaḡa boroboro niduꞌa zuni eꞌea.

¹⁹Paulo ani zeḡe teite hide ḡoretite hauḡiroteꞌe enogano, ane gau zamaḡano Badiꞌaꞌa Iuda mene azaḡa mazao haḡairoteꞌe haḡaiḡa niduꞌa fairu doḡoꞌani rae fureno ziniro.

²⁰Ze eꞌe igirotene, Badiꞌa niguniro. Ebu Paulo ninaꞌa, “Nego! Ḡae edeḡa, Iuda azaḡaꞌe ḡehaḡa bagaḡaniꞌa ꞌai Iesu ni mae ḡihineha, ebu zeḡe niduꞌa Mose goro ḡoeꞌa zu mae ḡihine huneꞌohe.

²¹Ze hariḡo ꞌahige igiro. Iuda azaḡa nuꞌe Iuda mene azaḡa boꞌaḡano radiuꞌohe. Ḡaꞌe zeḡe mazao ꞌahige haramiro. 'Mose goro ḡoeꞌaꞌe modoꞌi! Ebu eneze guraḡa guraḡa ahiri rana iḡuri ago haḡaoꞌi! Zu Iuda azaḡa ibiꞌa haḡaiḡa niduꞌa modoꞌi!'

²²Eme nougine manoḡa? Ze ḡaꞌa onaataꞌaꞌe ederiꞌuma.

²³Eꞌanoꞌo ḡaꞌe emeḡeꞌa ḡeiteꞌe haḡaiḡa haḡaoꞌi! Emeḡe boꞌaḡano Badiꞌa ubumao ḡoere riḡa rae teadu gore modiroteꞌe ohozeḡa ḡazaḡa ꞌada.

²⁴ꞌAhi duḡuru Dibuꞌo Neḡa zamaze onamadu, Badiꞌa ubumao deheraꞌuma haḡaiḡa zeḡe teite haḡaoꞌi! Zu vadinize ꞌohaniteꞌe naeḡa ḡaeꞌa feino zenoꞌi! ꞌOugine, vaze niduꞌa ederiꞌuma, hariḡo igirotaꞌaꞌe mene huga, rehano ḡa Mose goro ḡoeꞌa ibiḡano onameꞌeteꞌe horoniꞌuma.

²⁵U Iuda mene azaḡa Iesu mazao fieꞌetaꞌaꞌe, eme, zeḡeꞌa haḡaiꞌuma haḡaiḡa soꞌao mirihadu tuḡuro ziniro, raenaꞌa, 'Ḡuriro badiꞌaḡa mazao ḡahuno hanateꞌe ogomuḡa ago anoꞌi! Zuni ꞌunuḡano harine runedateꞌe maniḡa zu ruꞌe ago anoꞌi! Ebu vaze ꞌahoga ane teite mene hahurateꞌe vazeḡa teite ibi ago veꞌonoꞌi!' ”

²⁶Irarirotene, Paulo ani vaze ḡazaḡa zamazadu deheraꞌuma haḡaiḡa zeḡe teite haḡairo. Ebu dibuꞌo neḡa diuḡadu, zeḡeꞌa Badiꞌa ubumao deheraꞌuma haḡaiḡa hauḡiꞌuma madaḡa, zu zeḡe tiba tiba veize naniꞌa Badiꞌa dibuꞌo hatiteꞌe rae fureniro.

²⁷Badiꞌa ubumao deheraꞌuma haḡaiḡa haḡaeꞌeteꞌe furaḡa ꞌai nariga hauḡiroteꞌe madaḡano, Iuda azaḡa Asia habaꞌanonoꞌo onairoteꞌeꞌa, Dibuꞌo Neḡano Paulo horoniro. Ze vaze ḡuḡuvaḡa niduꞌa tutuze harae iḡunadu, Paulo obone tiro.

²⁸Ebu ḡihau ḡoereꞌenaꞌa, “Isaraela azaḡa, danafoꞌi! Vaze ꞌadiꞌe habaꞌa habaꞌano vazevaze ihozeꞌenaꞌa ꞌahige raꞌohe. 'Isaraela azaḡa haḡaio ago onamoꞌi, zu Mose goro ḡoeꞌa modoꞌi!' Ebu Dibuꞌo Neḡa rae sausauneꞌohe. Zu emeḡe Dibuꞌo Neḡano Giriki azaḡa tutuze zouzadu, haba zaḡoḡa ꞌadi sausauneꞌohe.”

²⁹Ze ꞌouge reirotaꞌaꞌe, ibite Efeso vazeḡa Torofimoꞌe Paulo teite Ierusalema neḡano raunuteꞌe horoniro. Ebu ze ꞌane Dibuꞌo Neḡa zamaḡano tutune zouniro rae zamariro.

³⁰Ebu Ierusalema ne azaḡa niduꞌa harae ḡunuḡuniro, ebu vaze niduꞌa duduꞌohadu, Paulo obone teadu, Dibuꞌo Neḡanonoꞌo ahase buniro. Ebu ibihetaḡa niduꞌa ꞌai zogone hararo.

³¹Nariga mau runeꞌeteꞌe zamaḡano, hariḡaniꞌa Roma uti vazeḡa boro mazao buaꞌ onamiro, raenaꞌa, “Ierusalema ne niduꞌa haraꞌa iriꞌaveha.”

³²Ebu ani zogone uti azaḡa ibito ziniꞌeteꞌe zu uti azaḡa zamazadu vaze ḡuḡuvaḡa uꞌa dure ovoiro. Harairoteꞌe azaḡaniꞌa uti vazeḡa boro tahiꞌaḡeta onaoga horozirotene, Paulo ꞌai mene bouniro.

³³Uti vazeḡa boroꞌa aradu Paulo obone tiro, ebu tahiꞌaḡa tuḡuzadu auri adiriḡa aheu hina batuniro. Ebu ḡadimuꞌenaꞌa, “ꞌAdi iniu? Ani nagini haḡaeha?” reiro.

³⁴Ebu vazevazeꞌa ḡuḡuva ḡunuḡano ane ane edeḡano ḡoere iḡuniro. Uti vazeḡa boro ani, hara boro ꞌahine, nagini uꞌano ꞌougeꞌetaꞌaꞌe ederoga mene idararo. Eꞌanoꞌo tahiꞌaḡa zinaꞌa, “Vaze ꞌadi uti azaḡa radone neḡa tutune onamoꞌi!” reiro.

³⁵Ze tutune onamoo, ne ḡoraꞌaḡano reirotene, vaze ḡuḡuvaḡaniꞌa naenaeonoꞌo bounihi reiro ꞌahine, ani ꞌai herate ḡihiniro.