Apostolo 21:10-23

¹⁰Aêac aŋgôŋ bêc ŋagêdô, go propete teŋ kêsêp aŋga Judaia gêmêŋ, nê ŋaê Agaba.

¹¹Eŋ kêtu ŋacleŋ gêdêŋ aêac. Ŋac tau kêkôc Paulunê ômbiŋkap su mêŋgêsô tau akaiŋ to lêma tôŋ ma kêsôm gebe “Ŋalau Dabuŋ nê biŋ tau tonec gebe Judawaga oc sênsô ômbiŋkap tecenec ŋatau tôŋ amboac tonec aŋga Jerusalem ma sêkêŋ eŋ êsêp lau samuc lemeŋ.”

¹²Aêac to malac ŋatau aŋô biŋ tonaŋ, tec ateŋ eŋ gebe êpi Jerusalem êna atom.

¹³Mago Paulu gêjô aêac aweŋ gebe “Amboac ondoc ataŋ ma agôm aêŋoc ŋalêlôm ŋawapac kêsa. Embe sênsô aê tôŋ ma sêŋgômmaŋ. Aê gajac dabiŋ tauc gebe jamac êndu aŋga Jerusalem êtu Apômtau Jesu nê ŋaêŋa.”

¹⁴Aêac asôm biŋ elêmê tec ajam tauŋ tôŋ ma asôm gebe “Apômtaunê biŋ êtu anô.”

¹⁵Ŋabêc ŋagêdô gêjaŋa acgom, go aêac amasaŋ ma waba ma api Jerusalem aja.

¹⁶Ŋacseŋomi ŋagêdô aŋga Kaisarea sêwiŋ, tec sêwê aêac atu ŋacleŋ Nason. Eŋ ŋac buŋa laŋgwa teŋ aŋga Kupro.

¹⁷Aêac jaaô lasê Jerusalem su, go lasitêwai sêkôc aêac sa totêntac ŋajamgeŋ.

¹⁸Ŋageleŋ Paulu kêkôc aêac sa adêŋ Jakobo aja, ma laumata samob sêkac sa sêmoa tonaŋ.

¹⁹Êsêac aweŋ gêjac tauŋ su, go Paulu gêjac miŋ biŋ, taŋ Anôtô gêgôm gêdêŋ lau samuc gebe kêpuc ênê sakiŋ tôŋ naŋ tomalageŋ.

²⁰Lau tau sêŋô e sêlambiŋ Anôtô ma sêsôm gêdêŋ Paulu gebe “O lasitêwa, aôm gôlicgac, Judawaga taêsam ŋanô lasê sekêŋ gêwiŋ Kilisi, mago sêsap Mosenê biŋsu tôŋ sêjac ŋawae.

²¹Lau tonaŋ sêŋô ŋawae gebe aôm kôdôŋ Judawaga, taŋ sêsêp lau samuc ŋasawa naŋ, gebe sêwi Mose siŋ, ma kôsôm gebe sêsa nêŋ ŋapalê atom to sêwi lêŋ mêtê laŋgwaŋa siŋ.

²²Ma galoc daŋgôm amboac ondoc. Lau samob oc sêŋô aôm gômôêŋ ŋawae su.

²³Amboac tonaŋ ôŋgôm êtôm biŋ, tec aêac abe asôm êndêŋ aôm nec. Aêacma lau aclê sêjac mata biŋ kêpi biŋ teŋ tec sêŋgôŋ.