Apostolo 21:1-40

¹Mete tarulu puru ria, mete rike na aga, mete pori lakea na bodu e Kos. Na parava muri mete pori na bodu e Rodes, muri mete lakea na tanga dagi e Patara.

²Na tahuna mete bele vonga mete masia tara aga ta ge lakea o Ponesia, lakea mete rike polo vona, mete vano.

³Mete nunu polo na bodu e Saiprus, mete masia na maurine mateu, mete nunu lakea o Siria. Mete dili o Tair, mete vakaraga vonga a maka galesi.

⁴Mete pugai vonga e huriki a kabukabu, lakea mete made turane ria na parava i polorua. A Hanu Kiripiripi i taki ria, ri gi takia e Paulus nahea ge lakea o Ierusalem.

⁵Muri na parava i polorua i lobo mete vano. E huriki a bakovi turane girihine ria, e tune ria, ri taparaki mateu polo vavo na tanga dagi. Mi bele na lavu, mi turume puru mi vasileki.

⁶Muri mete tarulu mule ria, mete rike na aga, mete vano. Ri hamule vonga e huriki.

⁷Mete pasi tala vonga o Tair, mete lakea o Tolomis. Mete tagui vonga e huriki a kabukabu, mete mahita vonga.

⁸Na parava muri mete malaga, mete lakea na tanga dagi e Sisaria. Na tahuna mete bele vonga, mete lakea na ruma ne Pilip, a bakovi ni vara na Velenga Kamumu. Ia a turana bakovi ala polorua ni vulaki o Ierusalem, ge ria a bolekori.

⁹I tahoka e tuna a sirula ala va, ri rata a nita propet.

¹⁰Na tahuna mete made vonga na parava i kupo, a propet tara i bele taho mateu, i valai o Iudea. A rana e Agabus.

¹¹I valai mai mateu, i bolea a palabele ne Paulus, i kolo tata mule a vahana a limana. Lakea i ta maea, “A Hanu Kiripiripi i ta maea, ‘E huriki a Iuda ri made o Ierusalem bara ri kolotatea a tahona palabele iea. Muri bara ri habia na limane huriki i uka ma ria a Iuda.’”

¹²Na tahuna mete longoa a ngava iea, mateu turane huriki vonga mi taki torea e Paulus nahea ge lakea o Ierusalem.

¹³Pali e Paulus i ta maea, “I navai mu tatangi mu rata iau a dodo? Iau a dava kunana ni dili na bavi, ga mate o Ierusalem na rane Isu a Bakovi Dagi!”

¹⁴Mete masia e Paulus i uka ma ge longo a ningaru ne mateu, lakea i uka ma mete toni tabu ni pulo a niluhoi vona, lakea mete ta maea, “A maki e Bakovi Dagi i ngaru ge bele, bara i bele.”

¹⁵Mete made lobo vonga, mete kisi puru a maki mateu, mete lakea o Ierusalem.

¹⁶I ranga kabukabu vonga ne Sisaria ri laho turane mateu. Ri taparaki mateu na ruma ne Nason, a bakovi o Saiprus, mete ge made turana. I muga pali e Nason i luhoi torea e Kristo.

¹⁷Na tahuna mete bele o Ierusalem e huriki a murimuri ri vivi hateka ni tagui mateu.

¹⁸Na parava muri, mateu e Paulus mete vano, mete masia e Iakop. E huriki a gare na lotu ranga, ri made vonga.

¹⁹E Paulus i tagui ria, muri i vakalongo ria vona a maka maki i rata a Vure na limana ne huriki i uka ma ria a Iuda.

²⁰Na tahuna ri longo a ngavane Paulus, ri kavurikea a Vure. Muri ri takia e Paulus, ri ta maea, “Paulus ioe a turane mia. E huriki a Iuda ala kupo hateka ri luhoi torea e Isu ngane. Re huriki nga ri tora hateka na ni muri mai a vinara ne Moses.

²¹Ri longo ta ioe o tovo e huriki a Iuda ri made basi na tanga ne huriki i uka ma ria a Iuda, ta ri gi lohopile a vinara ne Moses, ta o taki ria nahea ri gi pala a kulina tune ria, nahea ri gi muri mai a naro hosi ne huriki a Iuda.

²²Ngane bara ri longo ioe o bele koea. Pali a ra si gi ratea ngane?

²³Ngane mi gi taki ioe vona a naro go ratea. A bakovi ala va koea ri ta muholi lakea na Vure.

²⁴O vano o dili turane ria na naro ni vakamatapado a viri. O kona a maka nihabi ne ria, lakea bara ri ali vuroki a ivu na gine ria. Bara o rata mavonga, bara i vakasiri ria vona a ngava ri longoa ta o ratea, i uka ma a ngava muholi. Bara ri lohoka vomu ioe tara o muri mai kunana a vinara ne Moses.

²⁵Pali e huriki i uka ma ria a Iuda, mi here lakea pali ne ria, naha ri gi kani a kania ni habi na nitamina vure. Naha ri gi kani a kania i vona darana o a kania ni hori a lohona. Naha ri gi rata a naro na molenga.”

²⁶Na parava muri e Paulus i tuli e huriki a bakovi nga, ri rata a vilo na ni vakamatapado. Muri ri lakea na roho na Vure, ri vakalongo e huriki a prister na parava ge lobo vona a naro iea, lakea ni gi rata a nihabi ne ria takutaku.

²⁷Na tahuna i tabukoi ge lobo a parava i polorua nga, e huriki a Iuda ranga o Asia ri masia e Paulus pololilo na roho na Vure. Ri piurike e huriki, ri lakavua e Paulus.

²⁸Lakea ri gale tala ri ta maea, “Mua o huriki a Israel, mu kori mia! A bakovi iea i lakea na tanga lobo, i vara e huriki ri gi tepu e huriki a kabune hita, a vinara ne Moses, a roho na Vure. Ngane i bole dili na roho na Vure e huriki a Grik, ri kinimutoa!”

²⁹Muga e huriki a Iuda ri masia e Tropimus a bakovi o Epesus i laho turana e Paulus na tanga dagi. Ri pahaluhoia ta e Paulus ngane i bole dilia na roho na Vure.

³⁰E huriki lobo na tanga dagi ri roro, ri nunu palupu. Ri lakavua e Paulus, ri turari talea na roho na Vure, ri malaviriri kunana ri tukaria a logo na roho na Vure.

³¹Na tahuna ta ri gi rabalakia, a ubu na tara na nugumaheto ne huriki a Rom i longoa a rongova i bele o Ierusalem.

³²I malaviriri kunana i bole ranga nugumaheto, ri nunu lokovonga. Na tahuna e huriki ri matai a ubu turana e huriki a nugumaheto, ri lobo ni ubina e Paulus.

³³Muri a ubu i lakea maia e Paulus, i tangotatea. I taki e huriki a nugumaheto ri gi kolotatea e Paulus na sen i rua. Muri i nana, “E rei a bakovi iea? A ra naro hale i ratea?”

³⁴Lakea e huriki ri gale tala, ri taki a maka ngava viliha. Pali a ubu na tara i keri ni lohoka vona a rongova iea a vuhuna e huriki ri roro, ri gale viliha. Lakea i taki e huriki a nugumaheto ri gi turari lakea na roho ne ria e Paulus.

³⁵Na tahuna e Paulus ta ge laho rike na nirike, e huriki a nugumaheto ri bole rikea, ri kaloho langa ia, a vuhuna e huriki a bakovi ri ngaru ni rabalakia.

³⁶E huriki a tara na ni rata tuhare ri muri ne huriki a nugumaheto ri gale maea, “Mu rabalakia!”

³⁷Na tahuna e huriki a nugumaheto ta ri gi bole dilia na roho ne ria, i takia a ubu na nita Grik, i ta maea, “Iau a ngaru ni ta turamu.” Lakea a ubu i nana mulea, i ta maea, “Ioe, o lohoka na nita Grik?

³⁸A luhoi ta ioe a bakovi o Egipto, ra i rata a rongova rira ne huriki a matakari, muri i tuli lakea na tabeke i ngeki e huriki a tara ni varata tuhare ala rangale va (4,000).”

³⁹Lakea e Paulus i lavuni i ta maea, “Iau a Iuda. A valai na tanga e Tarsus na tabeke ne Silisia. Iau a tahotanga na tanga i dagi hateka a rana. A ngaru hateka ni ta turane huriki.”

⁴⁰A ubu i longo vona ge ta, lakea i pesi na nirike, i tolokave e huriki ri gi vulai. Na tahuna ri vulai i taki ria na nita Hibru, i ta maea,