Apostolo 1:10-25

¹⁰Na tahuna ri tababana ni mata rike, a bakovi ala rua ru rodo a varakia keakea, ru bele vakaturutu. Ru pesi turane ria,

¹¹ru ta maea, “Mua o huriki a bakovi o Galili, i navai mu pesi mu mata rike na hunu? E Isu, ra ni bole tala ne mua, ni bole sike na hunu, bara i hamule valai i manga a hini mu masia i sike na hunu.”

¹²Muri ri pea a lolo e Oliva, ri hamule lakea o Ierusalem. A lolo e Oliva i tabukoi o Ierusalem, a maravana a kilomita i taku.

¹³Na tahuna ri bele o Ierusalem, ri lakea na ruma ri made vona, ri rike polomeli. E huriki ri bele vonga ra nga: e Petrus, e Ioanes, e Iakop e Andreas; e Pilip rua e Tomas; e Bartolemeus rua e Mateo; e Iakop tune Alpius, e Simon a tara ne huriki a Silot; e Iudas tune Iakop.

¹⁴Ri tahoka a niluhoi i taku. Ri vapopo vakaroro ri vasileki. E huriki a ngatavine, e Maria e kinane Isu, e huriki e tarine Isu, ria ranga ri bele, ri vasileki turane ria.

¹⁵Na tahuna iea e huriki ri luhoi torea e Isu ri ala 120. Ngane e Petrus i pesi rike na matane ria, i ta maea,

¹⁶“Mua o huriki a turagu, i bele muholi pali a ngava ni here puru hosi na hinere. A ngava iea a Hanu Kiripiripi i ta polo ne Davit, i vakalongo muga ne Iudas, ra bakovi i vakasiri a dala ne huriki a bakovi ri lakavua e Isu.

¹⁷Re Iudas, a turane hita hosi, ni vulaki ge leho turane hita.”

¹⁸Rira, na tahuna e Iudas i bole a moni na naro hale vona, i konea a hania. I vonga i boru mapasiri, i mapoda a kavutuna, i mahali tala a tamudina.

¹⁹E huriki lobo o Ierusalem ri longoa a velengana, lakea ri galea na nitane ria a hania iea, e Akeldama. I manga ‘a hania na dara’.

²⁰Muri e Petrus i ta maea, “I bele mavonga, a vuhuna a ngava ni here puru hosi na puhu na Linge i maea, ‘Ge ngeki a ruma vona, i uka tara viri ge made vona.’ Ni here puru tabu i ta maea, ‘A viri tara ge bole a murina.’

²¹I mavonga, i kamumu hateka si gi vulakia tara bakovi, ra i turane hita na parava vakaroro na tahuna e Isu i laho turane hita,

²²i vakatubu na tahuna e Ioanes i vahiloloa, i valai i harena na tahuna e Isu ni bole sike na hunu. Si gi vulakia tara bakovi i matai a maka naro nga i bele, ge turane hita, ge vakalongo a ngava ne Isu i mahuri mule na matenga.”

²³Lakea ri vakapesi a bakovi ala rua: e Iosep Barsabas, a rana tara e Iustus, turane Matias.

²⁴Muri ri vasileki, “Bakovi Dagi, o lohoka vona a hatene huriki lobo. O vakasiri mia vona e rei ne rua o ngarua,

²⁵ge ratea a leho na apostolo, ge bole a muri ne Iudas, ra viri i pe a leho vona, i bole a mapana.”