Apostolo 19:1-26

¹Apoloꞌa Korinto neḡano radiunuteꞌe madaḡano, Paulo ani maḡa habaꞌa tihitihine onamadu, Efeso neḡano feuriro. Eꞌea Zuhiꞌa Boro tahiꞌa nu hidadu,

²ḡadiziro, raenaꞌa, “Za, Iesu mazao fiiroteꞌe zamaḡano, Vine Zaḡoḡaniꞌa zae vaḡe ovairo hehe?” Ze naenaeninaꞌa, “Mene! Eme, Vine Zaḡoḡa raꞌeteꞌe zuni mene igiro.”

³Eꞌanoꞌo Pauloꞌa ḡadizenaꞌa, “Za nagi bapatizo meiro?” reirotene, zeꞌa naenaeninaꞌa, “Ioane bapatizo meiro.” reiro.

⁴Pauloꞌa raenaꞌa, “Ioaneꞌa bapatizozirotaꞌaꞌe, zaeꞌa zamaze ḡihunadu, haḡai sauꞌa modoga. Ebu ani zinaꞌa, 'Eḡe ḡaruna onaiteꞌe vazeḡa mazao fioꞌi! Aꞌe Iesu.' rae reiro.”

⁵Ze ḡoere eꞌe igirotene, Zuhiꞌa Boro Iesu niḡano bapatizo meiro.

⁶Ebu Pauloꞌa ꞌevoꞌa zeḡe rana tirotene, Vine Zaḡoḡaniꞌa zeḡe vaḡe ovairo, ebu ze ago ꞌahoga ꞌahogano ḡoeriro, ebu Badiꞌaꞌa ihoziroteꞌe ḡoeꞌa rae fureniro.

⁷Eꞌe zamaḡanoꞌe, ohoze gaubanana zu aheu fare (12) heuḡaniꞌa radiro.

⁸Ebu Paulo ani, Iuda azaḡa kuru neḡa diuḡadu, eꞌea bato uḡidu inare haramido. Ebu Badiꞌaꞌa zuhiꞌaziteꞌe ḡoeꞌa Iuda azaḡa teite ḡihau ḡoꞌaniro, zeḡe zuni Iesu mazao fioga veize.

⁹Rehano Iuda azaḡa nuꞌe, teḡa riranadu, Paulo ḡoere hezaho haro, ebu vaze ḡehaḡa ubumao Zuhiꞌa Boro ibi sausaune ḡoeriro. Eꞌanoꞌo Pauloꞌe Iuda azaḡa kuru neḡa mode buanadu, Zuhiꞌa Boro tahiꞌa tahiꞌa zamaze onamiro. Ebu vaze ꞌahoga niḡa Turanu, aneꞌa ihozeꞌeteꞌe neḡa onamadu, mada niduꞌa eꞌea ḡoꞌane ihozido.

¹⁰ꞌOuge haḡae onamoo, muri aheu meiro. Eꞌanoꞌo Iuda azaḡa zu Giriki azaḡa Asia habaꞌano radiuꞌeteꞌeꞌa niduꞌa, Zuhiꞌa Boro ḡoere igiro.

¹¹Badiꞌa ani, Paulo gauonoꞌo gigiꞌa haḡaiḡa iḡaiḡa mene horoneꞌeteꞌe haḡaido.

¹²Vaze nuꞌe, Pauloꞌa odohe raudoteꞌe mukoḡa zu vidau gauidoteꞌe dabuaḡa afaꞌa madu, ugi azaḡa ranao tidotene, ugizeꞌa manorido, zu vine sauꞌaniꞌa buaudo.

¹³U Iuda azaḡa nu haba ꞌahoga ꞌahogano ragaveꞌenaꞌa, vaze mazaonoꞌo vine sauꞌa hegoze buzeꞌeteꞌeꞌa, ze Zuhiꞌa Boro Iesu ni rae nuriro. Ze vine sauꞌa zinu, raenaꞌa, “Iesu ni, Pauloꞌa rae harameꞌeteꞌe, eꞌe niḡano ḡaꞌohe. Vaze mazaonoꞌo buanoꞌi!” rae reiro.

¹⁴Dibuꞌo hauꞌeteꞌe boro ꞌahoga, niḡa Sikeva, ane ubuga fuꞌo zu aheu fare (7) zuni eꞌuge haḡairo.

¹⁵ꞌOugirotene, vine sauꞌaniꞌa naenaezinaꞌa, ꞌahige reiro. “Iesu eḡe edeḡa, zu Paulo eḡe edeḡa, u zaꞌe iniu?”

¹⁶ꞌOuge radu eꞌe vineḡa sauꞌaniꞌa radiuꞌeteꞌe vazeḡaniꞌa, zeḡe rana rafatiro, ebu ani inaraꞌe zeḡe teite mene idaḡa ꞌahine, zeḡe niduꞌa raharahaziro. Eꞌanoꞌo tahiꞌa tahiꞌaꞌe firina zu ahirize ruauꞌenaꞌa, neonoꞌo ferau buaro.

¹⁷Efeso neḡano Iuda azaḡa zu Giriki azaḡaniꞌa eꞌe hariḡa igirotene, zeḡe niduꞌa ḡiḡaroziro, ebu Zuhiꞌa Boro Iesu ni nigune ḡihiniro.

¹⁸Ebu Zuhiꞌa Boro mazao fiiroteꞌe azaḡa ḡehaḡaniꞌa onaadu, aneane haḡai sauꞌa rae fureniro.

¹⁹Nabone azaḡa ḡehaḡaꞌe zeḡe murava bukaḡa odohe onaadu, vaze niduꞌa ubumao hufi haoniro. Hufi haoniroteꞌe bukaḡa naeḡa niduꞌa meꞌode nuꞌonirotene, siliva moniḡa 50,000 reiro.

²⁰ꞌOugeꞌenaꞌa, Zuhiꞌa Boro ḡoereꞌe gigiꞌeita bororu onamiro zu inare onamiro.

²¹Efeso neḡano ꞌuguḡaniꞌa fureraroteꞌe ḡarugano, Vine Zaḡoḡaniꞌa Paulo ibito hanadu, ani Makedonia zu Akaia habaꞌa onamiꞌuduꞌu, Ierusalema neḡa onamiꞌuma rae zamariro, ebu raenaꞌa, “Ierusalema neḡa onamiteꞌe ḡarugano, Roma neḡa zu onamiꞌuma.” reiro.

²²Eꞌanoꞌo Pauloꞌe, ane dana vazeḡa aheu, Timoteo zu Erasto Makedonia habaꞌano ibite tuḡuziro, u aniꞌe mada nu Asia habaꞌano radiunu.

²³Eꞌe madaḡa heuḡano, Efeso neḡano aduga boroꞌa Zuhiꞌa Boro Ibi mae ḡihineꞌeteꞌe azaḡa moneo fureraro.

²⁴Eꞌe haḡaiḡaꞌe ꞌahige fureraro. Eꞌea vaze ꞌahoga, niḡa Demetrioꞌa radiunu. U Efeso roḡae badiꞌaḡa niḡaꞌe Atemisi. Demetrioꞌe, siliva hina eꞌe badiꞌaḡa dibuꞌo neḡa kobefe idane haḡaeꞌeteꞌe gauḡa odohe durido, ebu tahiꞌa ḡehaḡaniꞌa ane ꞌuꞌuḡano gauadu, moni boro meido.

²⁵Demetrioꞌe, ane gau azaḡa zu ane gau heuḡa haḡaeꞌeteꞌe azaḡa nuꞌozadu ziro, raenaꞌa, “Nego, zae edeḡa, emeꞌe gau ꞌadi haḡaadu moni boro maꞌohe.

²⁶Za, Efeso neḡano zu Asia habaꞌa niduꞌa zamaḡano Pauloꞌa vaze ḡehaḡa zamaze anadu, tutuze veꞌoziroteꞌe horoniro, zu igiro. Ani raenaꞌa, 'ꞌEvore hina haḡaeꞌeteꞌe badiꞌaḡaꞌe mene badiꞌa.' raꞌohe.