Apostolo 18:1-22

¹Muri e Paulus i malaga o Atens, i lakea o Korin.

²Na tahuna i bele vonga i matavisia e Akuila, a bakovi o Iuda, ni poda na tabeke ne Pontus. I valai karaba o Itali turana e girihina, e Prisila, a vuhuna e Kaiser Klaudius i tono tala o Rom e huriki a Iuda. E Paulus i vano ge matai rua.

³I made turane rua, to leho palupu, a vuhuna ia a bakovi ni hae a kape, i manga rua.

⁴Na parava Nimalo lobo i lakea na roho na vaponga, i vata turane huriki a Iuda, e huriki a Grik. I ngaru ge rata ria ri gi luhoi torea e Isu.

⁵Ngane e Sailas e Timoti ru pea pali e Masedonia. Na tahuna ru luve ne Paulus, e Paulus i vara kunana, i vakalongo e huriki a Iuda ne Isu ia e Kristo.

⁶Pali e huriki a Iuda ri hehea, ri harogia e Paulus. Lakea i madihi a hatena, i kurudu pasi a habulo na varakia vona, i taki ria, “Mua bara mu velu, naha ni padi virihi iau na ngava! A maki mua. Ngane ga vakalongo a Velenga Kamumu ne huriki i uka ma ria a Iuda.”

⁷E Paulus i pe a roho na vaponga, i vano i made na ruma ne Titus Iustus, a bakovi ni kavurikea a Vure. A ruma vona i pesi tabukoi na roho na vaponga.

⁸E Krispus, a matakari na roho na vaponga turane huriki lobo na ruma vona ri luhoi torea e Kristo. E huriki a bakovi ala kupo o Korin ri longo a ngavane Paulus, ri luhoi torea e Kristo, ni vahilolo.

⁹Na rodo tara, e Bakovi Dagi i ta turane Paulus na vurena, i ta maea, “Naha ni mangenge, naha ni vulai. O vakalongo mavonga e huriki ne nau,

¹⁰a vuhuna iau a laho turamu, i uka tara viri ge habi a vuranga vomu. E huriki ala kupo koea, ria a viri nau.”

¹¹Lakea e Paulus i made turane ria na pida i taku, a keva i polotara, i vara ria na nitana Vure.

¹²Na tahuna e Galio a matakari na tabeke ne Akaia, e huriki a Iuda ri vadili vapopo, ri lakavua e Paulus, ri turaria lakea na muri na nivapelekado.

¹³Lakea ri ta maea, “A bakovi iea i tovo e huriki ri gi kavurikea a Vure na naro tebi, i uka ma i ramai a vinara.”

¹⁴Pali na tahuna e Paulus ta ge koli a nitane ria, e Galio i taki e huriki a Iuda, i ta maea, “Mua o huriki a Iuda, a bakovi iea ge putu puru ranga vinara, o ge rabalakia tara viri, bara longo mai mua.

¹⁵Pali mu padi virihia na rana vure, na ngava i rata. Mu padi virihia i uka ma i ramai a vinara ne mua. I mavonga mu pelekadoa. Iau i uka ma ga pelekadoa.”

¹⁶Lakea i lili tala ria na muri na nivapelekado.

¹⁷Muri e huriki a Korin ri lakavua e Sostenes, a matakari na roho na vaponga, ri ubia na matana roho na nivapelekado. Pali e Galio i matataro ria ri gi ratea.

¹⁸E Paulus i made vonga o Korin na parava ranga. Muri i pe e huriki a kabukabu vonga, i lakea o Senkria turana e Prisila, e Akuila. I ali vuroki vonga a vuna, a vuhuna i rata pali a maki tara i ta muholi vona na Vure ge ratea. Muri to rike na aga, to lakea na tabeke ne Siria.

¹⁹Na tahuna to bele o Epesus, to vapida. E Paulus kikeri i vano, i dili na roho na vaponga, i ta turane huriki a Iuda.

²⁰Na tahuna ri takia e Paulus ge made turane ria na parava ranga, i koi.

²¹Pali na tahuna i pe ria, i ta muholi ne ria, i ta maea, “A Vure ge ngaru iau ga hamule valai tabu, bara hamule valai.” Muri i rike na aga, i pea e Epesus.

²²Na tahuna i bele o Sisaria i sike o Ierusalem, i tagui e huriki a tara ne Kristo ri made vonga. Muri i lakea o Antiok.