Apostolo 18:1-20

¹Eꞌe enogano, Paulo ani Atena neḡa modadu, Korinto neḡa onamiro.

²Eꞌea Iuda vazeḡa ꞌahoga, niḡa Akula hidiro. Aniꞌe Ponto habaꞌa vazeḡa. Itali habaꞌanonoꞌo inuga Priskila teite Korinto neḡa onaadu, mada nu daꞌo radiro, mazaḡa Roma zuhiꞌaḡa, niḡa Klaudioꞌa, “Iuda azaḡaꞌe niduꞌa Roma neḡanonoꞌo vaḡinoꞌi!” rae ziro ꞌahine. Ebu Paulo ani, ze ḡiaziꞌ onamiro.

³Paulo zu zeḡe moni gauḡaꞌe tiba: taruha ogoneꞌeteꞌe faraiḡa rafaḡa ꞌaune turinido. Eꞌanoꞌo Pauloꞌe zeḡe teite radadu gauido.

⁴Ebu aniꞌe Bana Madaḡa madaḡa niduꞌa, Iuda azaḡa kuru neḡano haramido, ebu Iuda zu Giriki azaḡaniꞌa Zuhiꞌa Boro mazao fioga veize inare ḡoerido.

⁵Silasi zu Timoteoꞌa Makedonia habaꞌanonoꞌo onairotene, Paulo ani, mada niduꞌa haramo moneo daꞌo gaue hunido, ebu Iuda azaḡa mazao “Iesuꞌe Keriso.” rae doḡoꞌani furenido.

⁶Rehano ze Paulo haramo ꞌue ḡoerinu, zu ḡoere sauꞌa hina roninutene, aniꞌe dabuaḡa zuꞌizuꞌinadu ziro, raenaꞌa, “Za ire roga diuḡoꞌidene, aꞌe zae sauꞌa uꞌano roꞌi! Eꞌe adugaꞌe eḡe mazao oꞌoꞌa. E izidionoꞌoꞌe onamadu, Iuda mene azaḡa mazao haramiꞌuma.”

⁷Ebu ani, Iuda azaḡa kuru neḡa modadu, vaze niḡa Titio Iusito, ani ne onamiro. Aniꞌe Badiꞌa kurano haudoteꞌe vazeḡa. Ani neꞌe Iuda azaḡa kuru neḡa genaḡano.

⁸Iuda azaḡa kuru neḡa ibitohauꞌeteꞌe vazeḡaꞌe niḡa Krisipo. Ani zu neḡano radiudoteꞌe azaḡa niduꞌa Zuhiꞌa Boro mazao fiiro. Korinto neḡa azaḡa ḡehaḡa zuni Paulo haramo egadu, Zuhiꞌa Boro mazao fiiro ebu bapatizo meiro.

⁹Ohere ꞌahogano, Zuhiꞌa Boroꞌa iḡunao Paulo niro. “Ago rihanoꞌi! Rehano ꞌize harame onamoꞌi! Hebeꞌo ago ꞌue radoꞌi!

¹⁰Mazaḡa eꞌe ḡae teite radiuꞌohe. Vaze ꞌahoganiꞌa zuni sausauꞌoga veize mene agato ḡaniꞌuma, mazaḡa ne ꞌadaoꞌe eḡe none reꞌuma azaḡa ḡehaḡa.”

¹¹Eꞌanoꞌo Pauloꞌe Korinto neḡano muri tiba zu bato fuꞌo tiba fare (6) radadu, Badiꞌa ḡoere ihozido.

¹²Vaze ꞌahoga, niḡa Galio, aniꞌa Akaia habaꞌa gavanaḡa reiroteꞌea, Iuda azaḡaniꞌa tiburanadu, Paulo obone tiro, ebu kota habaꞌa tutune onamiro.

¹³Ebu raenaꞌa, “Vaze ꞌadiꞌe, vazevazeꞌa Badiꞌa mazao kuranoga veize, zamaze auꞌohe. Badiꞌa ꞌahoga mazao kurauꞌetaꞌaꞌe, Roma azaḡa goro.”

¹⁴Ebu Pauloꞌa ḡoerihi raꞌenogano, Galioꞌa Iuda azaḡa ziro, raenaꞌa, “Egoꞌi! Iuda azaḡa! Vaze ꞌahoganiꞌa goro variꞌifo, ga haḡai sauꞌa boro haḡaifone, eḡeꞌa ḡoereze ego zinifo.

¹⁵Rehano zaꞌe Iuda azaḡa mone ḡoeꞌa ga niḡa ga goroḡa nunu moneo taꞌirotite ḡoꞌanoꞌidene, zae daꞌo ḡoꞌane fainoꞌi! Eꞌe ꞌuguḡa kotaḡa mene haḡaiꞌuma.”

¹⁶Ebu Galioꞌa kota habaꞌanonoꞌo tuḡuze buziro.

¹⁷Ebu zeḡe niduꞌa, Iuda azaḡa kuru neḡa ibitohauꞌeteꞌe vazeḡa, niḡa Sositene obone teadu, kota habaꞌa ꞌusiḡano bouniro. U Galioꞌe ḡiane reꞌoreꞌiro.

¹⁸Pauloꞌa Korinto neḡano ꞌize mada ḡehaḡa radiroteꞌe enogano, Zuhiꞌa Boro mone azaḡa muhizadu, Suria habaꞌa ruhau onamiro. Priskila zu Akulaꞌa ḡatine onamiro. Pauloꞌe ꞌize ꞌizema ruhanogano, Kenekrea toḡatoḡaḡano iguḡa variꞌiro, mazaḡa ani ibite Badiꞌa mazao kuranadu, ḡoere rinede tiroteꞌe zamaḡano radiunu ꞌahine.

¹⁹Ze Efeso neḡano feurirotene, Priskila zu Akulaꞌe eꞌea ohoze modiro, u aniꞌe Iuda azaḡa kuru neḡa diuḡadu, Iuda azaḡa teite hari manoḡa ḡoꞌaniro.

²⁰Zeꞌe Pauloꞌa zeḡe teite eꞌea faḡa radoga uminiro rehano, ani mene mae ḡihiniro.