Apostolo 17:6-29

⁶Ze mene horozirotene, Iasoni zu Zuhiꞌa Boro mone azaḡa nu ahasise buzadu, kanisoro azaḡa zamao ohoziro, ebu ḡihau ḡoeriro, raenaꞌa, “Paulo zu Silasiꞌe haba niduꞌa zamaḡano vaze mae ḡunuḡunuze onaeha. Ebu ze emeḡe ne zuni diuḡeha.

⁷Ebu Iasoniꞌa ane neo mae zouziro. Zeꞌe Roma zuhiꞌaḡa goro ḡoeꞌa variꞌeꞌohe, mazaḡa zeꞌe kini ꞌahoga ꞌeꞌe raꞌohe. Niḡaꞌe Iesu.”

⁸Eꞌea nuꞌoraroteꞌe azaḡa zu kanisoro azaḡaniꞌa eꞌe igirotene, zamazeꞌa adudu ḡouriro.

⁹Rehano zeꞌe Iasoni duḡuru mazaonoꞌo mae buziteꞌe moniḡa madu, tuḡuze onamiro.

¹⁰Eꞌe oheꞌano, Zuhiꞌa Boro mone azaḡaniꞌa Paulo zu Silasi zogone tuḡuzadu Berea neḡa onamiro. Berea neḡano feurirotene, Iuda azaḡa kuru neḡa diuḡiro.

¹¹Berea azaḡaꞌe zamaze mene riḡa, Tesalonika azaḡa mene heuḡa. Eꞌanoꞌo Pauloꞌa harameꞌeteꞌe ḡoeꞌa faifairu igiro, zu ane haramo ḡoeꞌaꞌe huga ga mene radu, mada niduꞌa buka zaḡoḡa meꞌode udahido.

¹²Ebu Iuda azaḡa ḡehaḡaniꞌa Zuhiꞌa Boro mazao fiiro, zuni Giriki roḡaeḡa zu Giriki ohozeḡa nize boroboro ḡehaḡaniꞌa Zuhiꞌa Boro mone reiro.

¹³Rehano Iuda azaḡa Tesalonika neḡano radiuꞌeteꞌeꞌa, Pauloꞌa Berea neḡano zuni Badiꞌa ḡoere haramiroteꞌe igirotene, zeḡe zuni Berea neḡa onamadu, Berea azaḡa soꞌoze tutuzadu, nuꞌoze harairo.

¹⁴Eꞌanoꞌo Zuhiꞌa Boro mone azaḡaꞌe Paulo daꞌo zogone tuḡune davara habaꞌa onamiro. U Silasi zu Timoteoꞌe Berea neḡano radiro.

¹⁵Paulo ḡatiniroteꞌe azaḡaꞌe Paulo Atena neḡa tutune onamiro. Ebu Pauloꞌa zeḡe mazao Silasi zu Timoteo veize ḡoere tuḡuriro, raenaꞌa, “Eḡe vaḡe ḡarihe aroꞌi!” reiro. Ebu ze ḡoere odohe, Berea neḡa bare onamiro.

¹⁶Pauloꞌa Atena neḡano Silasi zu Timoteo guhize radiroteꞌea, ḡuriro badiꞌaḡa ḡehaḡa eꞌea horonirotene, zamaḡaniꞌa adudaro.

¹⁷Eꞌanoꞌo ani Iuda azaḡa kuru neḡa diuḡadu, Iuda azaḡa, zu Giriki azaḡa Badiꞌa gubaneꞌeteꞌe teite, Iesu Keriso ḡoꞌanido, zuni mada niduꞌa ne huni maketi habaꞌano iniu iniuꞌa onairoteꞌe teite ḡoꞌanido.

¹⁸Ebu edeḡa azaḡa nu, Epikuro ga Sitoa rae huzeꞌeteꞌe teite hidadu, ḡoere ꞌuꞌue titiro. Ebu Pauloꞌa Iesu hariḡa zu Iesuꞌa rudanadu bare ḡabodiroteꞌe rae furenirotene, vaze nuꞌa ꞌahige reiro, raenaꞌa, “Ḡoeꞌa fuꞌa vazeḡa ꞌadi nagini reihi raꞌohe?” Ebu hena, nuꞌa raenaꞌa, “Badiꞌa ꞌahoga nu rae fureneꞌe gaogi.” reiro.

¹⁹Ebu ze Paulo tutunadu Areopago maḡano kanisoro azaḡa nuꞌonuꞌo habaꞌa onamiro. Ebu zeḡeꞌa ninaꞌa, “Ḡaeꞌa rae fureneꞌeteꞌe ihoreḡa iziga ꞌadiꞌe nagini, eme ura ederihi raꞌohe,

²⁰mazaḡa emeḡe teḡao ibite mene hune zu igiroteꞌe hariḡa ꞌahoga rae fureneꞌohe. Eꞌanoꞌo ani hugaꞌe nagini, eme ura ederihi raꞌohe.”

²¹Mazaḡa Atena azaḡa, zu haba ꞌahoga ꞌahoga azaḡa eꞌea radiuꞌeteꞌe haḡaiꞌe ꞌahiguḡa. Zeḡe niduꞌa, zeḡe radiu tauḡeꞌenaꞌa, ihore iziga ḡoeroga zu egoga daꞌo uratiro.

²²Ebu Pauloꞌa Areopago kanisoro azaḡa zamao edanadu ḡoeriro, raenaꞌa, “Atena azaḡa, e za horozatene, ꞌahige zamareha. Zaꞌe badiꞌa ḡehaḡa kurano hauꞌeteꞌe azaḡa.

²³Mazaḡa eḡeꞌa zae neo ragavatene, zaeꞌa kurano hauꞌeteꞌe ḡauḡa ḡehaḡa horoneha. Eꞌe zamaḡano dibuꞌo fataḡano ḡoere ꞌahoga mirihoga horoneha, raenaꞌa, “EME AḠUꞌA BADIꞌAḠA VEIZE”. Za aḡuꞌa badiꞌaḡa mazao kurauꞌohe. Eꞌanoꞌo eḡeꞌa Badiꞌa aꞌe iniu rae furenihi raꞌohe.

²⁴Badiꞌa ani, haba zu eꞌe zamaḡano radiuꞌeteꞌe ḡauḡa niduꞌa haḡairo. Aniꞌe Zuhiꞌa Boro, adure zu raha zuhiꞌaniꞌohe. ꞌAhine dibuꞌo neḡa zamaḡano mene radiuꞌohe. Aꞌe vazeꞌa ꞌevore hina ogoraroteꞌe neḡa.

²⁵Ane hugaꞌe ḡabone, ḡabone iriga zu ḡau niduꞌa vaze niduꞌa ziniꞌeteꞌe Badiꞌaḡa. Eꞌanoꞌo ane mazaoꞌe fereneꞌeteꞌe ḡauḡa oꞌoꞌa. Vazeꞌa ane veize ḡau ꞌahoga mene haḡao haꞌuma.

²⁶Badiꞌa ani, vaze tibuhuga haḡaadu, anionoꞌo haba ꞌahoga ꞌahoga azaḡa niduꞌa haḡairo, vazeꞌa haba niduꞌa zamaḡano radoga veize. Ebu zeḡeꞌa radiꞌuma madaḡa rae tiro, zu radiꞌuma habaꞌa ḡonaneḡa haḡairo.

²⁷Badiꞌaꞌa ꞌougirotaꞌaꞌe, vazeꞌa Badiꞌa vaḡoga veize, ebu inare vaḡadu Badiꞌa hidoga veize. Rehano hugaꞌe aniꞌe emeḡe niduꞌa mazaonoꞌo mene faḡa.

²⁸Mazaḡa eme ane ḡabone zamaḡano ḡabode onameꞌohe, ebu hagareꞌohe, ebu radiuꞌohe. Zae boꞌaḡano bada garaheꞌeteꞌe vazeḡa ꞌahoganiꞌa ꞌahige tiroteꞌe teige, raenaꞌa, “Emeḡe zuni ane mariga.”

²⁹Eme Badiꞌa ene ꞌahine, Badiꞌa hugaꞌe golo (gold) ga siliva (silver) ga hadi hina vazeꞌa zamaradu haḡaeꞌeteꞌe ḡauḡa teite idaḡa rae mene zamariꞌuma.