Apostolo 17:1-25

¹Êsêac sêsêlêŋ e jasêsa Ampipoli to Apolonia ma jasêô lasê Tesaloniki, naŋ Judanêŋ lôm teŋ kêkô.

²Paulu kêsô lôm gêja amboac gêgômgêgôm gêmoa ma gêjam biŋgaŋm gêwiŋ êsêac kêpi Anôtônê biŋ kêtôm sabat têlêac.

³Eŋ kêsôm mêtê lasê to kêwaka Kilisi tau sa gêdêŋ êsêac gebe gêôc ŋandaŋ ma gêdi sa aŋga ŋacmatênêŋ naŋ gêjac eŋ ŋawae. Go kêsôm gêwiŋ gebe “Jesu, taŋ kasôm eŋ lasê gêdêŋ amac naŋ, eŋ Kilisi tau.”

⁴Ma êsêacnêŋ ŋagêdô sêkêŋ gêwiŋ ma sêsap Paulu agêc Sila tôŋ. Ma Helen, taŋ têtêc Anôtô naŋ, nêŋ taêsam sêwiŋ ma kasêganêŋ lauo ŋalêlêma atom amboac tonaŋgeŋ.

⁵Tec Judawaga têntac ŋandaŋ kêsa ma sejoŋ lau sec ŋagêdô aŋga malaclêlôm mêŋsêjac êsêac sa gebe sêkalom malac. Tec sêwa Jasonnê andu auc ma sêsôm Paulu agêc Sila sebe sêkôc êsêagêc dêndêŋ lau sêna.

⁶Mago têtap êsêagêc sa atom. Tec sê Jason to lasitêwai ŋagêdô dêdêŋ malac ŋagôliŋwaga sêja ma sêmôêc gebe “Lau tau, tê sêlênsôŋ gamêŋboa nê, sêjam aêacnêŋ gamêŋ tôŋ amboac tonaŋgoc.

⁷Jason tonec kêkôc êsêac sa. Lau samob tônê seseŋ kaisaranê biŋsu su ma sêsôm gebe kiŋ teŋ gêmoa nê ŋaê Jesu.”

⁸Lau malac tonaŋŋa to ŋagôliŋwaga sêŋô biŋ tonaŋ e kêlênsôŋ êsêac ŋanô.

⁹Tec sêsôm Jason to nê lau ŋagêdô sêkêŋ gêŋ sêjac da tauŋ su, go sêwi êsêac siŋ.

¹⁰Ŋagêbêc tonaŋ lasitêwai sêkêŋ Paulu agêc Sila sebeŋ sêja Beroia. Agêc sêô lasê su, go sêsô Judanêŋ lôm sêja.

¹¹Lau tau nêŋ lêŋ mansaŋ ŋajam sêlêlêc Juda Tesalonikiŋa nêŋ su. Ac sêkôc mêtê sa ŋapep sêjac ŋawaegeŋ ma sêkip buku dabuŋ ŋam sa kêtôm bêcgeŋ, sê dôŋ mêtê, taŋ aposolo sêsôm naŋ, gebe oc kêtôm tau me masi.

¹²Amboac tonaŋ êsêacnêŋ lau taêsam sêkêŋ gêwiŋ ma Helennêŋ lau towaeŋ nêŋ lauo to ŋacwaga ŋagêdô ŋalêlêma atom amboac tonaŋgeŋ.

¹³Juda Tesalonikiŋa sêŋô Paulu kêsôm Anôtônê mêtê aŋga Beroia gêwiŋ ŋawae, tec tauŋ sêja sebe sêlênsu to sêlênsôŋ êsêac amboac tonaŋgeŋ.

¹⁴Lasitêwai sêŋô ŋawae, tec sejoŋ Paulu sebeŋ sêsa gwêc sêja, ma Sila agêc Timote gacgeŋ sêŋgôŋ.

¹⁵Lau taŋ sêwiŋ Paulu naŋ, sêwê eŋ e jasêô lasê Ateŋ. Êsêac sebe sêmu sêna, go eŋ kêmasaŋ biŋ gêdêŋ êsêac gebe nasêkac Sila agêc Timote sebeŋ dêndêŋ eŋ sêna.

¹⁶Paulu gêôŋ êsêagêc gêŋgôŋ Aten ma gêlic sêkêŋ gwam taêsam gêjam malac auc, ma nê ŋalêlôm kêbôli auc ŋanô.

¹⁷Tec gêjam biŋgalôm gêwiŋ Judawaga aŋga nêŋ lôm to êsêac, taŋ têtêc Anôtô naŋ, kêtôm bêcgeŋ ma lau, taŋ kêtap êsêac sa aŋga malacluŋ naŋ, amboac tonaŋgeŋ.

¹⁸Ma Epikuri to Stoiki nêŋ lau tokauc ŋagêdô sebe sênsaê eŋ, tec lau ŋagêdô sêsôm sebe “Ŋac gwai-gwai ŋatau tonaŋ gebe êsôm asageŋ.” Ŋagêdô sêsôm gebe “Eŋ gebe êsôm anôtôi jaba ŋawae.” Êsêac sêsôm biŋ tonaŋ gebe Paulu kêsôm ŋawae ŋajam lasê kêpi Jesu gêdi sa aŋga ŋacmatênêŋ.

¹⁹Amboac tonaŋ sêkôc Paulu jasêwê eŋ sêja Areo Pagu (nêŋ sêmêtôc biŋ ŋamala) ma sêsôm gebe “Aêac abe ajala biŋ wakuc, taŋ kôdôŋ gêdêŋ lau naŋ awiŋ.

²⁰Aôm kôs m biŋ kaiŋ teŋ kêsêp aêac taŋeŋsuŋ, ma aêac abe ajala biŋ tonaŋ ŋam.”

²¹Lau Aten samob to lau jaba, taŋ sêŋgôŋ sêwiŋ êsêac naŋ, ôliŋ palê sebe sêsôm to sêŋô biŋ wakucgeŋ ŋapaŋ.

²²Tec Paulu gêdi jakêkô Areo Pagu ŋaluŋgeŋ, go kêsôm gebe “Lau Atenwaga, aê galic amac atoc anôtôi sa ŋapepgeŋ.

²³Kasêlêŋ katôm malacgêdôgeŋ gaja ma kêsala amacnêm gêŋ dabuŋ e katap altar teŋ sa teto ŋabiŋ gêc gebe ‘Anôtô taŋ tajam kauc eŋ naŋ nê.’ Tec gabe jawa gêŋ tau, taŋ ajam kauc ma atoc sa naŋ, sa êndêŋ amac.

²⁴Anôtô tau, taŋ kêkêŋ undambê to nom ma ŋagêŋ totau-totau samob naŋ, kêtu undambê to nom Ŋatau, mago gêŋgôŋ lôm dabuŋ, taŋ sêkwê ŋa lemeŋgeŋ naŋ atom.

²⁵Eŋ kêpô lêna gêŋ, taŋ ŋamalac sêgôm ŋa lemeŋ naŋ atom, gebe eŋ tau kêkêŋ êsêac sêmoa mateŋ jali to sêsê aweŋ ma kêkêŋ ŋagêŋ samob gêdêŋ êsêac.