Apostolo 16:8-19

⁸Eꞌanoꞌo ze Musia habaꞌa zogoradu, Toroa neḡa ovoiro.

⁹Eꞌe oheꞌano Paulo ani iḡunaro. Makedonia vazeḡa ꞌahoganiꞌa edanadu umineꞌenogano horoniro, raenaꞌa, “Makedonia habaꞌa fare onaadu, emeḡe danafoꞌi!”

¹⁰Pauloꞌa iḡuna eꞌe horonirotene, eme, eꞌea hari manoḡa haramoga veize Badiꞌaꞌa tuḡufeꞌohe rae zamaradu, Makedonia habaꞌa onamoga veize ḡarihe ruhibiro.

¹¹Eme Toroa neḡanonoꞌo ḡasi hina, roḡoroḡe Samotarake ꞌumuḡa ruhau onamiro, ebu irarirotene, Neapoli toḡatoḡaḡa ruhau onamiro.

¹²Eꞌeanoꞌo Filipi neḡa onamiro. Filipi neḡaꞌe Makedonia habaꞌa zamaḡano ne boro zu Roma azaḡa ne. Eme mada nu eꞌea radiunu.

¹³Fura madaḡano, eme Filipi neḡa ḡabiꞌa enoga buanadu vu onamiro. Eme ꞌane, Iuda azaḡaniꞌa eꞌea nuꞌoranadu kurauꞌe gaogi, rae zamariro. Ebu eꞌea ehoradu, nuꞌoraꞌ onairoteꞌe roḡaeḡa roḡaeḡa ḡoreziro.

¹⁴Paulo ḡoere abito haunuteꞌe roḡaeḡa ꞌahogaꞌe niḡa Lidia. Aniꞌe Tuatira neḡa roḡaeḡa, ebu dabua kanaḡa seroneꞌeteꞌe gauḡa boro haḡaido, zu Badiꞌa kurano haudoteꞌe roḡaeḡa. Zuhiꞌa Boroꞌa zamaḡa bohano haro. Eꞌanoꞌo ani Paulo ḡoere egadu mae ḡihiniro.

¹⁵Ebu Lidia zu ane neo radiuꞌeteꞌe azaḡa bapatizozirotene, aneꞌa umifiro, raenaꞌa, “Za, eꞌe hube hune Zuhiꞌa Boro mazao fieꞌohe rae zamaroꞌidene, eḡe ne onaadu eꞌea radoꞌi!” Ebu ani ꞌouge teꞌoteꞌanadu, ane ne zamafe onamiro.

¹⁶Mada ꞌahogano eme kuru habaꞌa onameꞌenogano, tuḡure roḡae tahiꞌaḡa hidiro. Aniꞌe vine sauꞌaniꞌa ane zamao radiunu. Eꞌanoꞌo aniꞌe zama moneo naginiꞌa fureratiteꞌe rae furenido. Aniꞌe ꞌouge haḡaeꞌenaꞌa ane boro azaḡa veize moni boro haḡaido.

¹⁷Aniꞌe, Paulo zu emeḡe hegoteꞌenaꞌa, ḡihau ḡoere iḡuniro. “ꞌAhi duḡuruꞌe Niḡa Hitaga Hune Badiꞌaḡa tuḡure azaḡa! Zeꞌe Badiꞌaꞌa nouge nouge za ḡaboziteꞌe ibiḡa rae fureno ziniꞌohe.”

¹⁸Ani mada ḡehaḡa ꞌouge daꞌo haḡae onaminutene, Paulo ani eꞌe egoga fuḡoniro. Eꞌanoꞌo tehadu roḡae tahiꞌaḡa zamao radiuꞌeteꞌe vineḡa sauꞌa eꞌe niro. “Iesu Keriso niḡano, eḡeꞌa ḡaꞌohe. Roḡae tahiꞌaḡa eꞌe mazaonoꞌo buanoꞌi!” Ḡoere eꞌe ariḡano vine sauꞌaniꞌa roḡae tahiꞌaḡa mazaonoꞌo buaro.

¹⁹Tuḡure roḡae tahiꞌaḡa eꞌe boro azaḡaꞌe ederiro, ani zeḡe veize moni mene haḡaiꞌuma. Eꞌanoꞌo ze Paulo zu Silasi oboze teadu, ne hunio ahase onamiro, gavamani azaḡaniꞌa kotazoga veize.