Apostolo 16:31-40

³¹Zeḡeꞌa naenaeninaꞌa, “Zuhiꞌa Boro Iesu mazao fioꞌi! ꞌOugine, ḡae zu ḡae neo radiuꞌeteꞌe azaḡaniꞌe ḡabone hidiꞌuma.” reiro.

³²Ebu ḡuꞌa neḡa gadineꞌeteꞌe vazeḡa zu neḡano raidiuꞌeteꞌe azaḡa niduꞌa mazao Zuhiꞌa Boro ḡoere rae fureno ziniro.

³³Ebu ꞌize ohere rehano, ḡuꞌa gadineꞌeteꞌe vazeḡaniꞌa anianine tutuze onamadu bouziroteꞌe iḡuꞌa vuzuꞌo ziniro. Ebu ane zu neḡano radiuꞌeteꞌe azaḡa niduꞌa zogone bapatizo meiro.

³⁴Ebu ḡuꞌa neḡa gadineꞌeteꞌe vazeḡaniꞌa ane ne tutuze onamadu ogomu ziniro. Aniꞌe neḡa azaḡa niduꞌa teite matuꞌu boro haḡairo, mazaḡa zeꞌe Badiꞌa mazao fiiro ꞌahine.

³⁵Eꞌe irarirotene, gavamani azaḡaniꞌa zeḡe gau azaḡa tuḡuziro, ḡuꞌa neḡa gadineꞌeteꞌe vazeḡa nouga veize, raenaꞌa, “Eꞌe azaḡa tuḡuze buzoꞌi!”

³⁶Ebu ḡuꞌa neḡa gadineꞌeteꞌe vazeḡaniꞌa Paulo niro. “Gavamani azaḡaniꞌa ḡoere tuḡureha, zae tuḡuze buzoga veize. Eꞌanoꞌo izidi ꞌada zama roḡeḡano onamoꞌi!”

³⁷Rehano Pauloꞌa gavamani gau azaḡa ziro, raenaꞌa, “Emeꞌe Roma mone azaḡa. Ze kotao zu mene ohofa rehano, hunio boufadu ḡuꞌano ohofeha. Ebu izidi ze, hena, sifu tuḡufe bufihi raꞌohe. Mene ꞌougiꞌuma! Zeḡe huneꞌa onaadu, tutufe bufiꞌuma.”

³⁸Gavamani gau azaḡaniꞌa gavamani azaḡa vaḡe onamadu ziro. “Paulo zu Silasiꞌe Roma mone azaḡa.” reirotene, ze rihau rudaro.

³⁹Eꞌanoꞌo gavamani azaḡaꞌe zeḡe vaḡe onamadu umiziro, zeḡe mazao nagini sauꞌa haḡairoteꞌe rae modoga. Ebu gavamani azaḡaniꞌa zamaze buzadu umiziro. “Filipi neḡa mode iḡunoꞌi!”

⁴⁰Ebu anianine ḡuꞌanonoꞌo buarotene, Lidia ne onamiro. Eꞌea Zuhiꞌa Boro mone azaḡa hidadu, inara ḡoeꞌa ziro, ebu Filipi neḡanonoꞌo iḡuniro.