Apostolo 16:28-35

²⁸Rehano Pauloꞌa ḡihau ḡoere iḡuneꞌenaꞌa, “Ago ꞌougoꞌi! Emeḡe niduꞌa ꞌada.” reiro.

²⁹Ḡuꞌa neḡa gadineꞌeteꞌe vazeḡaꞌe ḡurizabu raenaꞌa ihure huḡane madu ḡuꞌa neḡa dure diuḡiro. Ebu rereruꞌenaꞌa, Paulo zu Silasi zamao ḡuḡuriro.

³⁰Ebu ani ḡuꞌa neḡanonoꞌo mae buzadu ḡadiziro, raenaꞌa, “Vaze boroboro, e nagini haḡaine ḡabone hidiꞌuma?”

³¹Zeḡeꞌa naenaeninaꞌa, “Zuhiꞌa Boro Iesu mazao fioꞌi! ꞌOugine, ḡae zu ḡae neo radiuꞌeteꞌe azaḡaniꞌe ḡabone hidiꞌuma.” reiro.

³²Ebu ḡuꞌa neḡa gadineꞌeteꞌe vazeḡa zu neḡano raidiuꞌeteꞌe azaḡa niduꞌa mazao Zuhiꞌa Boro ḡoere rae fureno ziniro.

³³Ebu ꞌize ohere rehano, ḡuꞌa gadineꞌeteꞌe vazeḡaniꞌa anianine tutuze onamadu bouziroteꞌe iḡuꞌa vuzuꞌo ziniro. Ebu ane zu neḡano radiuꞌeteꞌe azaḡa niduꞌa zogone bapatizo meiro.

³⁴Ebu ḡuꞌa neḡa gadineꞌeteꞌe vazeḡaniꞌa ane ne tutuze onamadu ogomu ziniro. Aniꞌe neḡa azaḡa niduꞌa teite matuꞌu boro haḡairo, mazaḡa zeꞌe Badiꞌa mazao fiiro ꞌahine.

³⁵Eꞌe irarirotene, gavamani azaḡaniꞌa zeḡe gau azaḡa tuḡuziro, ḡuꞌa neḡa gadineꞌeteꞌe vazeḡa nouga veize, raenaꞌa, “Eꞌe azaḡa tuḡuze buzoꞌi!”