Apostolo 15:7-22

⁷Ac sêjô biŋ tonaŋ sêmoa e Petere gêdi sa ma kêsôm gêdêŋ êsêac gebe “O lasitêwaac, amac taôm alicgac gebe gêmuŋgeŋ gaŋgôŋ gawiŋ amac ma Anôtô kêjaliŋ aê sa gebe aocsuŋ jasôm ŋawae ŋajam lasê êndêŋ lau samuc sêŋô ma sêkêŋ êwiŋ.

⁸Ma Anôtô, taŋ kêjala ŋamalacnêŋ ŋalêlôm naŋ, kêwaka lau samuc sa ma kêkêŋ Ŋalau Dabuŋ gêdêŋ êsêac amboac kêkêŋ gêdêŋ aêac.

⁹Eŋ kêmoasiŋ aêac to êsêac ŋadôŋ tageŋ. Êsêac sêkêŋ gêwiŋ, tec eŋ gêgôm nêŋ ŋalêlôm kêtu selec.

¹⁰Ma galoc abe ansaê Anôtô amboac ondoc, tec abe akêŋ gêŋ ŋawapac, naŋ aêac to tameŋi daôc e tatôm atom naŋ, ênsac ŋacseŋomi magiŋm.

¹¹Mago aêac tec takêŋ gêwiŋ gebe Anôtô gêjam aêac to êsêac kêsi kêtu Apômtau Jesu nê moasiŋŋa ŋa lêŋ tageŋ.”

¹²Lau samob sêjam tauŋ tôŋgeŋ ma sêkêŋ taŋeŋ Barnaba agêc Paulu nêŋ miŋ. Êsêagêc sêjac miŋ gêŋtalô to gêŋsêga, taŋ Anôtô gêgôm ŋa êsêagêc lemeŋ gêdêŋ lau samuc naŋ.

¹³Ŋaclagêc sêsôm biŋ e sêjac mata, go Jakobo gêjô êsêagêc aweŋ ma kêsôm gebe “O lasitêwaac, aŋô ŋoc biŋ acgom.

¹⁴Simon gêjac miŋ gebe andaŋgeŋ Anôtô kêtu ŋacleŋ lau samuc gebe êjaliŋ lau teŋ sa aŋga êsêacnêŋ têtu ênê lau.

¹⁵Biŋ tonaŋ to biŋ, taŋ propete teto naŋ, ŋam kêsêp tageŋ amboac tonec gebe

¹⁶‘Malôgeŋ acgom, go aê jamu jamêŋ ma jakwê Dawidnê bec, taŋ kêsêp jakêtap naŋ, sa êtiam. Ma jakwê gêŋ, taŋ kêku sa naŋ, sa êtiam to jamansaŋ êtu solop.

¹⁷Amboac tonaŋ lau nomŋa ŋagêdô to lau samuc samob, taŋ ŋoc ŋaê kêpi êsêac naŋ, sensom Apômtau.

¹⁸“Apômtau taŋ gêgôm biŋ tau kêtu awê gêdêŋ andaŋgeŋ naŋ, nê biŋ tau tonaŋ.’

¹⁹“Amboac tonaŋ aê taêc gêjam ŋoc biŋ tonec gebe Lau samuc, taŋ sênam tauŋ ôkwi dêndêŋ Anôtô naŋ, talênsôŋ êsêac atom.

²⁰Tageŋ tato papia êndêŋ êsêac gebe sêŋgamiŋ tauŋ êndêŋ gwam ŋagêŋ môp-môp ma êndêŋ mockaiŋo to mockaiŋ ma êndêŋ bôc sêgiŋ ênduŋa to êndêŋ dec,

²¹gebe Mosenê biŋ tônê tec sêjam mêtê laŋgwa-laŋgwa kêtôm gamêŋgeŋ ma sêsam lasê aŋga Judanêŋ lôm samob kêtôm sabatgeŋ.”

²²Sêsôm biŋ tonaŋ su, go aposolo to laumata ma gôlôac dabuŋ samob sêsôm kêtu tôŋ ma sêjaliŋ nêŋ lau ŋagêdô sa, gebe sêkêŋ êsêac sêwiŋ Paulu agêc Barnaba sêna Antiokia. Tec sêkêŋ lasitêwainêŋ gôliŋwaga Juda, taŋ sêsam eŋ sebe Barsaba naŋ, agêc Sila.