Text copied!
CopyCompare
Uare Bible - Apostolo - Apostolo 15

Apostolo 15:1-40

Help us?
Click on verse(s) to share them!
1Eꞌe zamaḡano, vaze nuꞌa Iuda habaꞌanonoꞌo Antioka neḡa ovoiro, ebu Iuda mene azaḡa Zuhiꞌa Boro mone reiroteꞌe ihoziro, raenaꞌa, “Moseꞌa ibite aḡife ihozeꞌenaꞌa, ahiri rana iḡuri haḡaoꞌi reiro. Eꞌanoꞌo zaꞌe iḡuri mene haḡaine, ḡabone mene hidiꞌuma.”
2Paulo ani Banabasine eꞌe ḡoeꞌa igirotene, ꞌuguḡa haḡaiḡa mene haḡaiꞌuma radu, zeḡe teite taꞌiro titiro. Eꞌanoꞌo Antioka ekalesia azaḡaniꞌa Paulo zu Banabasi madu, nabudize nu teite Ierusalema neḡano tuḡuziꞌuma reiro, zeḡeꞌa apostolo azaḡa zu ekalesia vaze boroboro teite eꞌe ḡoeꞌa ḡoꞌanoga veize.
3Eꞌanoꞌo Antioka ekalesia azaḡaniꞌa Paulo duḡuru Ierusalema neḡano tuḡuziro. Ebu zeḡeꞌa Poinikia zu Samaria habaꞌa vitau onaminutene, nouge nouge Iuda mene azaḡaniꞌa Zuhiꞌa Boro mone ḡihuriroteꞌe hariḡa neḡaneḡano meꞌodo ziniro. Ebu Zuhiꞌa Boro mone azaḡa niduꞌa, eꞌe hariḡa igirotene, matuꞌe rudaro.
4Zeḡeꞌa Ierusalema neḡano feurirotene, Ierusalema ekalesia azaḡa, apostolo azaḡa zu ekalesia vaze boroboroꞌa matuꞌo ziniro. Ebu Badiꞌaꞌa zeḡe gauonoꞌo haḡairoteꞌe ḡauḡa niduꞌa, Paulo duḡuruꞌa meꞌodo ziniro.
5Rehano Farisea azaḡa, Zuhiꞌa Boro mazao fieꞌeteꞌe azaḡa nuꞌa iḡunadu, ꞌahige reiro. “Iuda mene azaḡa zuni ahirize rana Badiꞌa mone raꞌeteꞌe iḡuꞌa haḡaiꞌuma, ebu Mose goro ḡoeꞌano tiroteꞌe haḡaiḡa zuni haḡaiꞌuma.”
6Eꞌanoꞌo apostolo azaḡa zu ekalesia vaze boroboroꞌa ḡoere fainifine nuꞌoraro.
7Ze faḡa ḡoꞌaniroteꞌe enogano, Peteroꞌa iḡunadu ziro, raenaꞌa, “Nego nabudi, zae niduꞌa edeḡa, ibite zae boꞌaḡanonoꞌo Badiꞌaꞌa eḡe tuḡuhiro, Iuda mene azaḡaniꞌa hari manoḡa egadu Zuhiꞌa Boro mazao fioga veize.
8Badiꞌaꞌe vaze zama edereꞌeteꞌe Badiꞌaḡa. Eꞌe Badiꞌaḡaniꞌa Iuda mene azaḡa mazao zuni Vine Zaḡoḡa tuḡuniro, emeḡe mazao tuḡuniroteꞌe teige. Badiꞌa ani ꞌougeꞌenaꞌa, Iuda mene azaḡa zuni mae zouziꞌuma rae ihofiro.
9Badiꞌa ubumaoꞌe Iuda mene azaḡa zu emeꞌe mene nunu, mazaḡa zeḡeꞌa Zuhiꞌa Boro mazao fiiroteꞌeanoꞌo, zeḡe zama Badiꞌaꞌa deheniro.
10Zaeꞌa raꞌetaꞌaꞌe, emeḡe zu vouḡafeꞌa haḡaoga mene idararoteꞌe haḡaiḡa. Rehano za nougadu, Zuhiꞌa Boro tahiꞌa tahiꞌa eꞌe, haḡai aduga zinihi raꞌohe. Za ꞌougeꞌenaꞌa Badiꞌa tuꞌine nurihi raꞌohe.
11Mene! Eme ꞌahige hubehune zamareꞌohe. Zuhiꞌa Boro Iesuꞌa ḡahunofiꞌeteꞌeanoꞌo eme ḡabofeha. Iuda mene azaḡa zuni Badiꞌaꞌa eꞌe ibiḡano ḡabozeha.”
12Petero ḡoere igirotene, eꞌea radiroteꞌe azaḡa niduꞌa mene ḡoeriro. Ebu Paulo ani Banabasine, Badiꞌaꞌa zeḡe gauonoꞌo Iuda mene azaḡa boꞌaḡano ane tahi gigiꞌa haḡaiḡa zu zaguzagaꞌuma haḡaiḡa haḡaidoteꞌe fairu meꞌodo ziniroteꞌe zamaḡano, eꞌea radiroteꞌe azaḡaniꞌe abite radiro.
13Zeḡeꞌa ḡoere hauḡirotene, vaze boro ꞌahoga, Iakoboꞌa iḡunadu ḡoeriro, raenaꞌa, “Nego nabudi, eḡe ḡoere egoꞌi!
14Badiꞌaꞌa nouge nouge Iuda mene azaḡa zamaradu, Badiꞌa mone reifine zeḡe boꞌaḡanonoꞌo ḡadaheḡano vaze nu zamaziroteꞌe hariḡa, Peteroꞌa rae fureneha.
15Peroveta azaḡa zuni ꞌouge rae tiro, raenaꞌa,
16'Zuhiꞌa Boroꞌa ꞌahige raꞌohe. Eꞌe enogano, eꞌe bare onaiꞌuma. Ebu Davidaꞌa zuhiꞌaziroteꞌe neḡa fahanogaꞌe, eḡeꞌa bare ogoraꞌuma. Ane ḡahutu neḡaꞌe bare ogoru ḡehaniꞌuma. Ebu bare izifiꞌuma.
17Haba ꞌahoga ꞌahoga zamaḡano radiuꞌeteꞌe azaḡaniꞌa Zuhiꞌa Boro vaḡifine. Ebu Iuda mene azaḡa boꞌaḡano eḡe mone raꞌeteꞌe azaḡaniꞌa Zuhiꞌa Boro vaḡifine. Eꞌe haḡaiḡa fureniꞌuma Zuhiꞌaḡa Boroꞌa ꞌouge raꞌohe.
18Aꞌe Zuhiꞌa Boroꞌa amahi rae fureniroteꞌe ḡoeꞌa.' (Amosi 9:11-12)
19Eꞌanoꞌo eḡeꞌa zamareꞌetene, haḡai adugaꞌe, Iuda mene azaḡa boꞌaḡanonoꞌo Badiꞌa mone ḡihureꞌeteꞌe azaḡa, mene ziniꞌuma,
20rehano zeḡe veize soꞌao mirihadu, ꞌahige ḡoere tuḡuriꞌuma. Ze, ḡuriro badiꞌaḡa mazao tiꞌeteꞌe ogomuḡaꞌe mene aꞌuma, ebu vaze ꞌahogaꞌe ane teite mene hahurateꞌe vazeḡa teite ibi mene veꞌoniꞌuma, ebu ꞌunuḡano harine runateꞌe maniḡa zu ruꞌe mene aꞌuma.
21Mazaḡa Mose goro ḡoeꞌaꞌe amahionoꞌo neḡaneḡano Iuda azaḡa kuru neḡano Bana Madaḡa Madaḡano meꞌode harame onaido.”
22Eꞌanoꞌo apostolo azaḡa zu ekalesia vaze boroboroꞌa ekalesia azaḡa niduꞌa teite ḡoꞌanadu, zeḡe vaze nu meꞌuma reiro, Paulo zu Banabasi teite Antioka neḡano tuḡuzoga veize. Ze vaze ꞌahoga, niḡa Iuda, niḡa ꞌahogaꞌe Barasaba, zu vaze ꞌahoga, niḡa Silasi meiro. Anianineꞌe Zuhiꞌa Boro mone azaḡa ibito ziniꞌeteꞌe azaḡa.
23Ze soꞌao ꞌahige mirihadu tuḡuriro, raenaꞌa, “Eme, zae negoze, apostolo azaḡa, ekalesia vaze boroboro, zu ekalesia azaḡaniꞌa, Iuda mene azaḡa Iesu mazao fieꞌeteꞌe, Antioka neḡano zu Suria zu Kilikia habaꞌano radiuꞌeteꞌe mazao matuꞌu ḡoeꞌa tuḡureꞌohe.
24Eme hari ꞌahoga igiro. Vaze nuꞌa emeḡe mazaonoꞌo amadu, ḡoere nunu hina zamaze mae ḡunuḡununiro, ebu zamazeꞌa adudaroteꞌe igiro. Rehano zeꞌe emeḡeꞌa mene tuḡuziro.
25Eꞌanoꞌo emeḡe niduꞌa ḡoꞌane idanadu, vaze nu maha, ebu negofe manoḡa Banabasi zu Paulo teite zae vaḡe tuḡuziꞌuma raꞌohe.
26Banabasi zu Pauloꞌe emeḡe Zuhiꞌa Boro Iesu Keriso veize zeḡe ḡabone ahetiroteꞌe azaḡa.
27Eꞌanoꞌo eme Iuda zu Silasi tuḡuzeꞌohe, emeḡeꞌa soꞌao mirihateꞌe ḡoeꞌa, zeḡeꞌa hebe hina zu rae furenoga veize.
28Vine Zaḡoḡaniꞌa ibitofeadu, emeḡeꞌa ḡoꞌanateꞌe ḡoeꞌaꞌe ꞌahiꞌeꞌe. Emeꞌe goro haḡaiḡa nunu haḡaoꞌi radu, aduga mene ziniꞌuma. Rehano zaeꞌa haḡaiꞌuma haḡaiḡaꞌe ꞌahi daꞌo.
29Ḡuriro badiꞌaḡa veize teateꞌe maniḡa mene aꞌuma, ebu ru zu ꞌunuḡano harine runateꞌe maniḡa mene aꞌuma, ebu vaze ꞌahogaꞌe ane teite mene hahurateꞌe vazeḡa teite ibi mene veꞌoniꞌuma. Za haḡai ꞌuguḡa mene haḡaine, zaꞌe haḡaizeꞌa manohudaꞌuma. Eꞌe daꞌo. Zae niduꞌa bazoꞌi!”
30Eꞌanoꞌo zeḡe ḡazaḡaꞌe tuḡuzadu, Antioka neḡa onamiro, ebu Antioka ekalesia azaḡa niduꞌa nuꞌozadu, soꞌa ziniro.
31Ebu zeḡeꞌa meꞌodirotene, ze iraduguziꞌeteꞌe ḡoeꞌa egadu matuꞌiro.
32Iuda ani Silasineꞌe peroveta azaḡa. Ze Zuhiꞌa Boro mone azaḡa mazao iradugu ḡoeꞌa borofe haramadu, inara ziniro.
33Ze mada nu eꞌea radiroteꞌe enogano, Antioka neḡano Zuhiꞌa Boro mone azaḡaꞌe zama roḡeḡa veize zeḡe rana kuranadu bare tuḡuziro. Ebu ze Ierusalema neḡa bare onamiro, zeḡe tuḡuziroteꞌe azaḡa vaḡe.
34U Silasiꞌe mene bariꞌuma radu eꞌea radiro.
35Paulo zu Banabasiꞌe Antioka neḡano radadu, vaze ḡehaḡa teite Zuhiꞌa Boro ḡoere ihoziro, zu haramo ziniro.
36Mada nu enogano, Pauloꞌa Banabasi niro, raenaꞌa, “Aro, emeḡeꞌa ibite Zuhiꞌa Boro ḡoere haramiroteꞌe neḡaneḡa niduꞌa bare onamihi, ebu eꞌea Zuhiꞌa Boro mone azaḡaniꞌa nouge radiuꞌeteꞌe ḡiazihi.”
37Banabasi ani uraꞌe tahiꞌa ꞌahoga, niḡa Ioane, niḡa ꞌahogaꞌe Mareko, ani zuni zamahatihi reiro.
38Rehano Paulo ani, Mareko zamahanogaꞌe mene manoḡa rae zamariro, mazaḡa Marekoꞌe ibite Pamufulia habaꞌanonoꞌo muhize baradu, zeḡe teite mene gaue onamiro.
39Paulo zu Banabasiꞌe ḡoerezeꞌa riraꞌ onamirotene, ze rovotadu, avoavo onamiro. Banabasiꞌe Mareko zamahanadu, Kupro ꞌumuḡa ruhau onamiro.
40U Pauloꞌe Silasi zamaharo, ebu Zuhiꞌa Boro mone azaḡaniꞌa Zuhiꞌa Boro ḡahunone manoḡaniꞌa zeḡe rana rouga veize, ze ani ꞌevoreo teadu iḡuniro.

Read Apostolo 15Apostolo 15
Compare Apostolo 15:1-40Apostolo 15:1-40